సోషల్ మీడియాలో ఈ పని చేస్తే అమెరికా వీసా రాదు, గ్రీన్ కార్డు కూడా క్యాన్సిల్

ఇకపై అమెరికాలో వీసా లేదా పర్మినెంట్ రెసిడెన్సీ(గ్రీన్ కార్డు) పొందాలనుకునే వారు సోషల్ మీడియాలో చేసే ప్రతి పోస్ట్ పై ప్రత్యేక శ్రద్ధ తీసుకోవాల్సి ఉంటుంది. సోషల్ మీడియా ప్లాట్‌ఫామ్‌లలో యూదులకు వ్యతిరేకంగా ఎవరైనా రాస్తే వీసా లేదా గ్రీన్ కార్డును తిరస్కరించవచ్చని లేదా ఇప్పటికే జారీ చేసిన వీసాను రద్దు చేయవచ్చని యూఎస్ సిటిజన్‌షిప్ అండ్ ఇమ్మిగ్రేషన్ సర్వీసెస్(యూఎస్సీఐఎస్) అధికారికంగా ప్రకటించింది.

ఉగ్రవాద సంస్థలకు మద్దతు ఉంటే

ఉగ్రవాద సంస్థలుగా అమెరికా ప్రభుత్వం ప్రకటించిన గ్రూపుల మద్దతు ఉన్న అభిప్రాయాలను పంచుకునే సోషల్ మీడియా ఖాతాలను ఇకపై సమీక్షిస్తామని యూఎస్సీఐఎస్ విడుదల చేసిన ఒక ప్రకటనలో తెలిపింది. హమాస్, హిజ్బుల్లా, హౌతీ తిరుగుబాటు సానుభూతిపరులను నిశితంగా పర్యవేక్షించనున్నారు. ఇప్పటికే ఈ సంస్థలను అమెరికా ప్రభుత్వం ఉగ్రవాద సంస్థలుగా ప్రకటించింది.

ఒక విదేశీయుడు ఉగ్రవాదం, ఉగ్రవాద సంస్థలు, ఇతర వ్యతిరేక కార్యకలాపాలకు మద్దతు ఇస్తున్నట్లు తేలితే సోషల్ మీడియా కంటెంట్‌ను ప్రతికూలంగా పరిగణిస్తామని తెలిపింది.

వీసా, గ్రీన్ కార్డ్ క్యాన్సిల్

ప్రపంచవ్యాప్తంగా ఉన్న ఉగ్రవాద మద్దతుదారులకు అమెరికాలో చోటు లేదని డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ (డీహెచ్ఎస్) పబ్లిక్ అఫైర్స్ అసిస్టెంట్ సెక్రటరీ ట్రిసియా మెక్లౌగ్లిన్ తెలిపారు. వారిని దేశంలోకి రానివ్వాల్సిన, ఇక్కడే ఉండాల్సిన బాధ్యత మాకు లేదని స్పష్టం చేశారు. స్టూడెంట్ వీసాలు, గ్రీన్ కార్డులపై ఈ ప్రభావం తక్షణమే అమల్లోకి వస్తుందన్నారు. స్టూడెంట్ వీసాలు (ఎఫ్ -1, జే-1 మొదలైనవి), గ్రీన్ కార్డు దరఖాస్తులు, వర్క్ పర్మిట్లు, వీసా పొడిగింపులతో సహా అన్ని కేసులపై ఇది ప్రభావం చూపుతుంది.

300 మందికి పైగా వీసాలను రద్దు చేసినట్లు అమెరికా విదేశాంగ మంత్రి మార్కో రుబియో స్వయంగా గత కొన్ని వారాల్లో అంగీకరించిన తర్వాత ఈ విధానం వచ్చింది.

ప్రభావం ఏమిటి?

ఈ కొత్త విధానం కారణంగా ఇమ్మిగ్రేషన్ కోరుకునే వారు ఇకపై తమ సోషల్ మీడియా పోస్టులు ఏ ఉగ్రవాద సంస్థకు మద్దతుగా లేవని, వారికి ఎలాంటి యూదు వ్యతిరేక సెంటిమెంట్ లేదని నిర్ధారించుకోవాలి. దీంతో అమెరికాలో వీసా పొందడం గతంలో కంటే చాలా సంక్లిష్టమైన, శ్రమతో కూడుకున్న ప్రక్రియగా మారింది.