వివాహేతర బంధానికి మరో ‘భర్త’ బలి! ముక్కలు ముక్కలుగా నరికి..

ఉత్తర్​ ప్రదేశ్​లో కొన్ని నెలల క్రితం కలకలం రేపిన సౌరభ్​ రాజ్​పుట్​ మర్డర్​ కేసు తరహాలో, అదే రాష్ట్రంలో మరో దారుణ ఘటన వెలుగులోకి వచ్చింది. బల్లియాలో ఓ వ్యక్తిని అతని భార్య, ఆమె ప్రియుడు చంపేశారు. అనంతరం అతడి మృతదేహాన్ని ముక్కలుముక్కలుగా నరికారు.

ఆరు భాగాలుగా కోసి.. బ్యాగుల్లో కుక్కి!

ఉత్తర్​ప్రదేశ్​ హరిపూర్​లో జీవించే 62ఏళ్ల దేవేంద్ర రామ్​ ఒక మాజీ సైనికుడు. అతని భార్య పేరు మాయ. కాగా, మాయకు వివాహేతర బంధం ఉంది. ఆమె లవర్​ పేరు అనిల్​ యాదవ్​. తమ ప్రేమకు దేవేంద్ర అడ్డుగా ఉన్నాడని, ఆ అడ్డును తొలగించుకోవాలని మాయ- అనిల్​లు భావించారు. దేవేంద్రను చంపడానికి ప్లాన్​ చేశారు.

గత శుక్రవారం రాత్రి మాయ, దేవేంద్ర తినే ఆహారంలో మత్తుమందు కలిపింది. ఆయన అపస్మారక స్థితిలోకి జారుకున్న తర్వాత, మాయ తన భర్తను చంపేసింది. అనంతరం మాయ, అనిల్​లు మృతదేహాన్ని ఆరు భాగాలుగా ముక్కలు ముక్కలు చేసి పాలిథీన్​ బ్యాగుల్లో పెట్టారు. ఎవరు గుర్తించకుండా ఉండేందుకు, ఆ బ్యాగులను వేరువేరు చోట్ల పడేశారు. ఇందుకోసం అనిల్​ యాదవ్​ సహచరులు సతీశ్​ యాదవ్​, మిథిలేష్​ యాదవ్​లు సైతం సహకరించారు.

తన భర్త కనిపించడం లేదంటూ మరుసటి రోజు, అంటే మే 10న మాయ పోలీస్​ స్టేషన్​కు వెళ్లి ఫిర్యాదు చేసింది. తన కూతురిని ఇంటికి తీసుకొచ్చేందుకు రైల్వే స్టేషన్​కి వెళ్లి దేవేంద్ర, ఇంటికి తిరిగి రాలేదని ఫిర్యాదులో పేర్కొంది.

మిస్సింగ్​ కేసు నమోదు చేసుకున్న పోలీసులు దర్యాప్తు చేపట్టారు. ఇంతలో సికిందరపూర్​ పోలీస్​ స్టేషన్​ పరిధిలో పడి ఉన్న ఓ బ్యాగులో ఓ వ్యక్తి శరీర భాగం కనిపించింది. అది దేవేంద్రదే అని నిర్థరణ అయ్యింది. ఇక సోమవారం, దేవేంద్ర మొండెం కూడా అధికారులు గుర్తించారు.

ఘటనపై మర్డర్​ కేసు నమోదు చేసుకున్న పోలీసులు దర్యాప్తు చేపట్టగా, దేవేంద్ర భార్య మయపై అనుమానాలు పెరిగాయి. దేవేంద్ర ఫోన్​ కూడా ఇంట్లోనే ఉండటంతో మాయను విచారించారు. ఆమె నేరాన్ని అంగీకరించింది. లవ్​ ఎఫైర్​ కారణంగా మరో ప్రాణం బలైపోయిందని పోలీసులకు తెలిసింది.

ప్రేమకు అడ్డొస్తున్నాడన్న కారణంతో భర్తను తానే చంపినట్టు మహిళ ఒప్పుకుంది. ఈ క్రమంలోనే అనిల్​ యాదవ్​తో పాటు అతని ఇద్దరు సహచరుల పేర్లు కూడా బయటపెట్టింది. వారందరిని పోలీసులు అరెస్ట్​ చేశారు. నేరానికి రెండు ఆయుధాలను స్వాధీనం చేసుకున్నారు.

నిందితులను కోర్టులో హాజరుపరచిన పోలీసులు, అనంతరం వారిని జైలుకు తరలించారు.

ఘటనపై దర్యాప్తు కొనసాగుతోంది.

సౌరభ్​ రాజ్​పుట్​ మర్డర్​ కేసు..

మార్చ్​ నెలలో సౌరభ్​ రాజ్​పుట్​ అనే నేవీ అధికారిని, అతని భార్య ముస్కాన్​, తన ప్రియుడితో కలిసి హత్య చేసింది. అనంతరం డ్రమ్​లో మృతదేహాన్ని పెట్టి సిమెంట్​ పోసి కప్పేసింది. ఆ తర్వాత ప్రేమికులు ఇద్దరు విహారయాత్రలకు కూడా వెళ్లారు. చివరికి పోలీసులకు దొరికిపోయారు. ఈ ఘటన దేశవ్యాప్తంగా సంచలనం సృష్టించింది.