Uber | బడా కంపెనీ సీఈఓ.. మీ క్యాబ్ డ్రైవర్గా మారితే?
క్యాబ్ బుక్ చేసిన తర్వాత.. కార్ నెంబర్, డ్రైవర్ పేరు చూడటం సహజం. ఒకవేళ.. మీ డ్రైవర్ ఓ బడా కంపెనీకి సీఈఓ అని తెలిస్తే? ఢిల్లీవాసులకు ఇటీవల ఇలాంటి అనుభవమే ఎదురైంది. ఇంతకి అసలు కథ ఏంటంటే..
Uber India CEO | వర్క్ ఫ్రం ఆఫీస్ హడావుడి మొదలైపోయింది. రెండేళ్ల తర్వాత మళ్లీ ఉరుకుల పరుగుల జీవితం తిరిగొచ్చింది. ఆఫీసుకు ఆలస్యమవుతోందని కంగారు పడటం మళ్లీ మామూలైపోయింది. క్యాబ్ దొరుకుతుందా? లేదా? దొరికితే సమయానికి ఆఫీసుకు వెళతామా? అన్న సందేహాలతో గుండెల్లో అలజడి మళ్లీ షురూ అయ్యింది. ఈ పరిస్థితుల్లో.. క్యాబ్ ఎక్కిన తర్వాత.. డ్రైవర్ ఓ బడా కంపెనీకి సీఈఓ అని తెలిస్తే? ఢిల్లీ- ఎన్సీఆర్ ప్రజలకు ఇటీవల ఈ అనుభవమే ఎదురైంది. ఇంతకీ ఏం జరిగిందంటే..
ట్రెండింగ్ వార్తలు
డ్రైవర్గా సీఈఓ..
ఉబెర్ ఇండియా, దక్షిణాసియా సీఈఓ ప్రభజీత్ సింగ్.. సంస్థ చేపట్టిన ఓ రీసెర్చ్ కోసం ఇటీవలే కొన్ని గంటల పాటు డ్రైవర్ అవతారం ఎత్తారు. ఢిల్లీ వీధుల్లో క్యాబ్ డ్రైవ్ చేసి ప్రయాణికులను ఎక్కించుకున్నారు. వారితో కొంతసేపు ముచ్చటించి.. వారిని గమ్యస్థానాలకు చేర్చారు.
ఈ విషయాలను.. క్యాబ్లో ఎక్కిన ప్రయాణికులు సామాజిక మాధ్యమాల్లో వెల్లిడించారు. ఈ వార్త వెంటనే వైరల్గా మారిపోయింది.
లింక్డిన్ యూజర్.. అనన్యా ద్వివేదీ.. ఈ విషయంపై తన అనుభవాలను పంచుకుంది.
"చాలా రోజుల తర్వాత వర్క్ ఫ్రం ఆఫీస్ కోసం బయటకొచ్చి నేను క్యాబ్ బుక్ చేశాను. డ్రైవర్ ఎవరో తెలుసా? ఉబెర్ ఇండియా బాస్.. ప్రభజీత్ సింగ్! ఓ రీసెర్చ్ కోసం డ్రైవర్గా మరారంట. తొలుత నాకు ఏదో డౌట్ కొట్టింది. ఆయన గురించి గూగుల్ చేశాను. ఫొటోలు చూసిన తర్వాతే నేను నమ్మాను. ఇది నిజమే. సమస్యలను అర్థం చేసుకునేందుకు.. ఇలా డ్రైవర్ అవతారం ఎత్తడమనేది చాలా గొప్ప విషయం," అని ఆమె రాసుకొచ్చింది.
Prabhjeet Singh Uber | మరో ప్రయాణికుడు సౌరభ్ కుమార్ కూడా తన అనుభవాలను షేర్ చేసుకున్నాడు.
"ఓ బడా కంపెనీకి సీఈఓ.. మన క్యాబ్ డ్రైవర్గా మారితే మనకు ఎంతో విలువనిస్తున్నట్టే కదా! మనం మరింత భద్రంగా ఉన్నట్టే కదా. ప్రయాణికులను మరింతగా అర్థంచేసుకునేందుకు ప్రభజీత్ సింగ్ ప్రయత్నిస్తున్నారు. అందుకే వారితో మాట్లాడుతున్నారు. వారిని పిక్ చేసుకుని, కావాల్సిన చోట దింపుతున్నారు. కుడోస్," అని అన్నాడు.
మరో ప్రయాణికురాలు మధువంతి సుందర్రాజన్ కూడా దీనిపై స్పందించారు.
"'నేను వస్తున్నాను' అని ఉబెర్ డ్రైవర్ నుంచి మెసేజ్ వచ్చింది. నా డ్రాప్ లోకేషన్ కూడా అడగలేదు. కాస్త ఆశ్చర్యమేసింది. క్యాబ్ కోసం ఎదురుచూస్తుండగానే.. వచ్చింది. 'హాయ్ మధువంతి నేను ఉబెర్ ఇండియా సీఈఓ! ఈరోజు మీరే నా మొదటి ప్రయాణికురాలు,' అని ఆయన అన్నారు. నాకు చాలా సంతోషంగా అనిపించింది," అని ఆమె చెప్పుకొచ్చింది.
ఈ వార్త సామాజిక మాధ్యమాల్లో వైరల్గా మారగా.. నెటిజన్లు విశేషంగా స్పందిస్తున్నారు. ఉబెర్ ఇండియా సీఈఓపై ప్రశంసల వర్షం కురిపిస్తున్నారు.
సంబంధిత కథనం