అమెరికాలో టోర్నడోల బీభత్సం.. పలు రాష్ట్రాల్లో ఎమర్జెన్సీ.. వైరల్ వీడియో

వినాశకరమైన టోర్నడోలు అమెరికాలోని కొన్ని ప్రాంతాలను ఛిన్నాభిన్నం చేశాయి. తుపాను కారణంగా 26 మంది మృతి చెందారు. శనివారం రాత్రి మరింత తీవ్ర వాతావరణం నెలకొనే అవకాశం ఉంది.

శుక్రవారం షెర్మాన్ కౌంటీలో ధూళి తుఫాను కారణంగా హైవే పైలప్‌లో ఎనిమిది మంది మరణించినట్లు కన్సాస్ హైవే పెట్రోలింగ్ నివేదిక ధృవీకరించింది. దాదాపు 50 వాహనాలు ప్రమాదానికి గురయ్యాయి. మిస్సోరీలో అత్యధికంగా 12 మంది చనిపోయారు. టోర్నడో తన ఇంటిని కూలగొట్టడంతో ఒక వ్యక్తి మరణించాడు.

"గత రాత్రి టోర్నడోల వల్ల జరిగిన నష్టాన్ని సర్వే చేసే బృందాలు మాకు ఉన్నాయి. సహాయం చేయడానికి క్షేత్రస్థాయిలో రెస్పాన్స్ టీమ్ ఉంది" అని అర్కాన్సాస్ గవర్నర్ సారా హుకాబీ శాండర్స్ ఎక్స్ లో చెప్పారు. రాష్ట్రంలో ఎమర్జెన్సీ ప్రకటించినట్టు తెలిపారు.

అలాగే జార్జియా గవర్నర్ బ్రియాన్ కెంప్ ఎమర్జెన్సీ ప్రకటించారు. శనివారం తర్వాత తీవ్ర వాతావరణం నెలకొనే అవకాశం ఉన్నందున ఈ ప్రకటన చేస్తున్నట్లు కెంప్ తెలిపారు. విపరీతమైన వాతావరణ పరిస్థితులకు సంబంధించిన మరిన్ని వివరాలు ఇలా ఉన్నాయి.

• దేశవ్యాప్తంగా భారీ తుఫాను వల్ల ఈదురుగాలులు వీస్తున్నాయి.
• విపరీతమైన వాతావరణ పరిస్థితులు 100 మిలియన్లకు పైగా ప్రజలు నివసించే ప్రాంతాన్ని ప్రభావితం చేస్తాయని అంచనా వేశారు.
• కెనడా సరిహద్దు నుంచి టెక్సాస్ వరకు గంటకు 80 మైళ్ల వేగంతో గాలులు వీస్తాయని, ఉత్తర ప్రాంతాల్లో మంచు తుఫాను పరిస్థితులు, దక్షిణాన వెచ్చని, పొడి ప్రాంతాల్లో కార్చిచ్చు ముప్పు పొంచి ఉందని యంత్రాంగం తెలిపింది.
• అమెరికాలోని పశ్చిమ మిన్నెసోటా, తూర్పు దక్షిణ డకోటాలోని కొన్ని ప్రాంతాలకు శనివారం తెల్లవారుజాము నుంచి మంచు తుఫాను హెచ్చరికలను నేషనల్ వెదర్ సర్వీస్ జారీ చేసింది. 3 నుండి 6 అంగుళాల మంచు పేరుకుపోతుందని, కొన్నిచోట్ల ఒక ఫీట్ వరకు పేరుకుపోయే అవకాశం ఉందని భావిస్తున్నారు.

• ఓక్లహోమా రాష్ట్రంలో 130కి పైగా అగ్నిప్రమాదాలు సంభవించాయి. దాదాపు 300 ఇళ్లు ధ్వంసమయ్యాయి. తమ రాష్ట్రంలో 266 చదరపు మైళ్లు (689 చదరపు కిలోమీటర్లు) అగ్నికి ఆహుతయ్యాయని గవర్నర్ కెవిన్ స్టిట్ శనివారం విలేకరుల సమావేశంలో చెప్పారు. గాలులు చాలా బలంగా వీచాయని స్టేట్ పెట్రోలింగ్ తెలిపింది. రోడ్లపై విరిగిపడిన చెట్లను చాాలావరకు తొలగించామని నివేదించింది.
• వేగంగా కదులుతున్న తుఫాను వడగళ్లను సృష్టించగలవని, గంటకు 100 మైళ్ళ (160 కి.మీ) వేగంతో గాలులు వీస్తాయని తుఫాను అంచనా కేంద్రం తెలిపింది.