సాధారణ 'జలుబు' అనుకుంటే.. 20ఏళ్ల జీవితాన్నే మర్చిపోయింది!

క్లైర్​ మఫ్పెట్​ రీస్​ అనే మహిళ.. తన భర్త స్కాట్​, ఇద్దరు కుమారులతో కలిసి యూకేలోని ఎస్సెక్స్​లో నివాసముంటోంది. కొన్ని నెలల క్రితం.. జలుబుతో బాధపడింది. చిన్న విషయమే, తగ్గిపోతుందని అనుకుంది. జలుబుతోనే ఓ రోజు రాత్రి నిద్రపోయింది. కానీ ఆ తర్వాత 16రోజుల వరకు ఆమె నిద్ర లేవలేదు. కోమాలోకి జారుకుంది. ఆసుపత్రికి తరలించగా.. ఆమెకు ఎన్సిఫలైటిస్​ అనే వ్యాధి సోకినట్టు తెలిసింది. 16రోజుల తర్వాత కోమా నుంచి బయటకొచ్చిన ఆమె.. తన 20ఏళ్ల జీవితాన్ని మర్చిపోయింది!

ఫిబ్రవరి 22న 'వరల్డ్​ ఎన్సిఫలైటిస్​ డే' సందర్భంగా.. తమ కథను ఓ టీవీ షో ద్వారా ప్రపంచంతో పంచుకుంది రీస్​ కుటుంబం.

"ఆ ఘటన జరిగిన రెండు వారాల ముందు.. రీస్​కు జలుబు సోకింది. ఆ తర్వాత అది తీవ్రమైంది. ఓరోజు రాత్రి బెడ్​ మీద నిద్రపోయింది. ఆ తర్వాతి రోజు తనను లేపేందుకు నేను చాలా ప్రయత్నించాను. కానీ రీస్​ లేవలేదు. వెంటనే ఆసుపత్రికి తీసుకెళ్లాను. వెంటిలేటర్​పై చికిత్స అందించారు. తర్వాత రాయల్​ లండన్​ హాస్పిటల్​కు తరలించారు. మెదడులో బ్లీడింగ్​ వల్ల ఆమె కోమాలోకి వెళ్లినట్టు తొలుత భావించారు. కానీ తర్వాత చేసిన పరీక్షల్లో.. రీస్​కు ఎన్సిఫలైటిస్​ సోకినట్టు తేలింది," అని నాటి పరిస్థితిని వివరించాడు రీస్​ భర్త స్కాట్​.

ఎన్సిఫలైటిస్​ అనే వ్యాధి వైరల్​ ఫీవర్​తో వచ్చే అవకాశం ఉంది. చాలా సందర్భంల్లో ఫ్లూ వంటి లక్షణాలు కనిపిస్తాయి. అయితే కొన్ని సందర్భాల్లో ఈ వ్యాధి అత్యంత ప్రమాదకరంగా మారే అవకాశం ఉంది. దీర్ఘకాల ప్రభావం చూపే ముప్పు కూడా ఉంది.

ఈ వ్యాధితో.. జీవితంలోని ఎన్నో విషయాలను మర్చిపోయినట్టు రీస్​ చెప్పింది.

"నాకు పిల్లలు ఉన్నట్టు తెలుసు. వారిని నేను గుర్తుపట్టాను. కానీ వారి పుట్టిన రోజులు, నేను వారికి జన్మనివ్వడం వంటి విషయాలను మర్చిపోయాను. అందరిని గుర్తుపట్టగలను కానీ వారి జ్ఞపకాలు మాత్రం నాకు గుర్తుకు రావడం లేదు. స్కాట్​ని మర్చిపోయి ఉంటే పరిస్థితి ఇంకా దారుణంగా ఉండేది," అని రీస్​ చెప్పుకొచ్చింది.

మర్చిపోయిన 20ఏళ్ల జ్ఞాపకాలు తిరిగి వచ్చే అవకాశం ఉందని రీస్​ చెప్పింది. అలా జరగకపోయినా, కొత్త జీవితాన్ని ఆస్వాదిస్తానని స్పష్టం చేసింది.