Tesla self driving cars : ఏడాది చివరి నాటికి- టెస్లా ‘సెల్ఫ్​ డ్రైవింగ్​’ కార్స్​..!

Self driving cars Tesla : సెల్ఫ్​ డ్రైవింగ్​ కార్స్​పై కీలక అప్డేట్​ ఇచ్చారు టెస్లా సీఈఓ, అపర కుబేరుడు ఎలాన్​ మస్క్​. ఈ ఏడాది చివరి నాటికి.. సెల్ఫ్​ డ్రైవింగ్​ టెస్లా కార్లను సిద్ధం చేయడం లక్ష్యంగా పెట్టుకున్నట్టు వెల్లడించారు. అమెరికా, యూరోప్​లో ఈ టెస్లా కార్ల విస్తృత వినియోగం జరుగుతుందని ఆశిస్తున్నట్టు పేర్కొన్నారు.

నార్వోలో జరిగిన ఓ సమావేశంలో పాల్గొన్నారు ఎలాన్​ మస్క్​. సెల్ఫ్​ డ్రైవింగ్​ టెస్లా కార్లతో పాటు అనేక అంశాలపై వ్యాఖ్యానించారు. ప్రపంచంలో మునుపెన్నడూ లేనంతగా.. ప్రస్తుతం చమురు, గ్యాస్​ అవసరం ఉందని ఆయన అభిప్రాపడ్డారు. శిలాజ ఇంధనాలకు తాను వ్యతిరేకం కాదని స్పష్టం చేశారు. అదే సమయంలో రినివెబుల్​ ఎనర్జీ సప్లైపై అందరు దృష్టిసారించాలని పేర్కొన్నారు.

ఇంధన సంక్షోభంతో యూరోప్​ కొట్టుమిట్టాడుతున్న నేపథ్యంలో ఎలాన్​ మస్క్​ ఈ వ్యాఖ్యాలు చేయడం ప్రాధాన్యత సంతరించుకుంది.

ట్విట్టర్​ వ్యవహారం..

Elon Musk twitter deal : ఎలాన్​ మస్క్​- ట్విట్టర్​ వ్యవహారం ప్రస్తుతం కోర్టులో ఉన్న విషయం తెలిసిందే. అయితే.. ఈ వ్యవహారంపై ఇటీవలే కోర్టులో విచారణ జరిగింది. ఫేక్​ ఖాతాలపై మస్క్​కు మరింత డేటాను అందించాలని ట్విట్టర్​ను ఆదేశించింది కోర్టు.

ఈ 'ఫేక్​ అకౌంట్​' డేటా వల్లే ఎలాన్​ మస్క్​ ట్విట్టర్​ డీల్​ నిలిచిపోయింది. ట్విట్టర్​ చెప్పిన దాని కన్నా ఎన్నో రెట్ల ఫేక్​ అకౌంట్లు ఉన్నట్టు మస్క్​ భావిస్తున్నారు. డేటా ఇవ్వడానికి ట్విట్టర్​ నిరాకరించింది.

స్టాక్​ మార్కెట్​పై మస్క్​ పాఠాలు..

సామాజిక మాధ్యమాల్లో ఎలాన్​ మస్క్​ చురుకుగా ఉంటారు. ముఖ్యంగా ట్విట్టర్​లో తన ఫాలోవర్స్​తో అనేక విషయాలు పంచుకుంటారు. ఈ క్రమంలోనే.. స్టాక్​ మార్కెట్​పైనా పాఠాలు చెప్పారు ఎలాన్​ మస్క్​.

స్టాక్​ మార్కెట్​ నుంచి డబ్బులు సంపాదించాలని చాలా మంది ఆశిస్తూ ఉంటారు. కానీ అనేకమంది స్టాక్​ మార్కెట్​లో నష్టాలు చూస్తారు. స్టాక్స్​ ఎప్పుడు కొనాలి? ఎప్పుడు అమ్మాలి? అన్న విషయంపై సరైన స్పష్టత, అవగాహన లేక తప్పులు చేసి, నష్టపోతూ ఉంటారు. వారి కోసమే.. అపర కుబేరుడు, టెస్లా సీఈఓ ఎలాన్​ మస్క్​.. తన అనుభవం నుంచి కొన్ని టిప్స్​ ఇచ్చారు.

Elon Musk news : స్టాక్స్​ కొనుగోళ్లు, అమ్మకాలపై తనకు తరచూ ప్రశ్నలు వస్తుంటాయని మస్క్​ అన్నారు. ఈ మేరకు ట్వీట్​ చేశారు.

"మీరు నమ్మే ప్రాడక్టులు, సర్వీసులపైనే దృష్టిపెట్టండి. అలాంటి సంస్థల స్టాక్స్​ మాత్రమే బై చేయండి. ఇక ప్రాడక్టులు, సర్వీసులు దారుణంగా ఉన్నాయి అనుకున్నప్పుడు మాత్రమే వాటిని అమ్మేయండి," అని మస్క్​ పేర్కొన్నారు.

ఈ క్రమంలోనే మరో టిప్​ కూడా ఇచ్చారు మస్క్​. 'మార్కెట్​ తీవ్ర ఒడుదొడుకుల్లో ఉన్నప్పుడు.. మీరు కంగారు పడకండి. దీర్ఘకాలంలో ఇది మీకు ఉపయోగపడుతుంది,' అని వెల్లడించారు.

ఎలాన్​ మస్క్​కు ట్విట్టర్​లో 89మిలియన్​ మంది ఫాలోవర్లు ఉన్నారు. వారిలో చాలా మంది స్టాక్​ మార్కెట్​ బిగినర్స్​ ఉండే అవకాశం ఉంది. వారికి మస్క్​ టిప్స్​ చాలా ఉపయోగపడతాయి. పైగా.. తమకు ఇష్టమైన, లేదా సక్సెస్​ఫుల్ వ్యాపారవేత్త నుంచి సూచనలను పొందాలని చాలా మంది భావిస్తూ ఉంటారు.