Cyclone Michaung : భారీ వర్షాలతో తమిళనాడు అతలాకుతలం..!

Cyclone Michaung live updates : భారీ వర్షాలకు తమిళనాడు అతలాకుతలమవుతోంది. ఆంధ్రప్రదేశ్​ తీరంవైపు మిచౌంగ్​ తుపాను దూసుకొస్తున్న తరుణంలో చెన్నై సహా తమిళనాడులోని అనేక ప్రాంతాల్లో ఆదివారం రాత్రి నుంచి భారీ నుంచి అతి భారీ వర్షాలు పడుతున్నాయి. అనేక ప్రాంతాల్లో రోడ్లు జలమయమయ్యాయి. విద్యుత్​ సరఫరాకు ఆటంకం ఏర్పడింది. అనేక లోతట్టు ప్రాంతాలు నీట మునిగాయి. చెన్నై, చెంగల్​పట్టు, కంచీపుర్​, నాగపట్టణం, కుద్దలూరు, థిరువల్లూర్​లో పరిస్థితులు ఆందోళనకరంగా ఉన్నాయి.

తమిళనాడు అతలాకుతలం..

ఈ మిచౌంగ్​ తుపాను.. మంగళవారం ఉదయం నెల్లూర్​- మచిలీపట్నం మధ్యలో తీరం దాటుతుందని వాతావరణశాఖ అంచనా వేసింది. ఈ నేపథ్యంలో సోమవారం ఉదయం 5:30 గంటలవరకు, గడిచిన 24 గంటల్లో తమిళనాడులో మీనంబాక్కమ్​లో 196ఎంఎం వర్షపాతం నమోదైంది. నుంగంబాక్కంలో 154.3 ఎంఎం వర్షపాతం నమోదైంది.

Tamil Nadu rains : భారీ వర్షాల నేపథ్యంలో చెన్నైతో పాటు మరో మూడు జిల్లాల్లోని విద్యాసంస్థలకు సోమవారం సెలవును ప్రకటించింది అధికార యంత్రాంగం. ఉద్యోగులకు వర్క్​ ఫ్రం హోం ఆప్షన్​ని ఇవ్వాలని ప్రైవేటు సంస్థలను సూచించింది. తీర ప్రాంతాల్లోని మత్స్యకారులు వేటకు వెళ్ల వద్దని అధికారులు ఆదేశాలిచ్చారు.

మరోవైపు.. తుపానును ఎదుర్కొనేందుకు తమిళనాడు ప్రభుత్వం అన్ని ఏర్పాట్లు పూర్తి చేసింది. 5వేలకుపైగా రిలీఫ్​ క్యాంప్​లను ఏర్పాటు చేసింది. ముప్పు ప్రాంతాల్లోని ప్రజల తరలింపు ప్రక్రియ.. ఇప్పటికే కొనసాగుతోంది. పరిస్థితులను ఎప్పటికప్పుడు దగ్గరుండి సమీక్షిస్తున్నారు తమిళనాడు సీఎం ఎంకే స్టాలిన్​.

Chennai rains today : భారీ వర్షాల కారణంగా చెన్నైలో జనజీవనం స్తంభించింది. మరీ ముఖ్యంగా విమాన సేవలకు అంతరాయం ఏర్పడింది. చెన్నై ఎయిర్​పోర్ట్​లోని రన్​వేని నేటి రాత్రి 11 గంటల వరకు మూసివేస్తున్నట్టు ప్రకటించారు అధికారులు. అనేక రైళ్లు కూడా రద్దయ్యాయి. ప్రయాణికులకు రీఫండ్​ ఇస్తామని భారతీయ రైల్వే వెల్లడించింది.

భారీ వర్షాలకు చెన్నైలోని కనాథూర్​ ప్రాంతంలో ఓ గోడ కూలింది. ఈ ఘటనలో ఇద్దరు మరణించినట్టు, ఒకరు గాయపడినట్టు సమాచారం.

మిచౌంగ్​ తుపాను కారణంగా.. పుదుచ్చేరిలో కూడా భారీ వర్షాలు కురుస్తున్నాయి. కేంద్ర పాలిత ప్రాంతంలో ప్రస్తుతం 144 సెక్షన్​ అమల్లో ఉంది. అవసరమైతే కానీ ప్రజలు బయటకు రావొద్దని అధికారులు సూచించారు.