Supreme Court: అలహాబాద్ హైకోర్టు ‘రేప్’ తీర్పుపై సుప్రీంకోర్టు స్టే; హైకోర్టు తీరుపై ఆగ్రహం

Allahabad high court: వక్షోజాలను పట్టుకోవడం లేదా పైజామాను తొలగించాలని ప్రయత్నించడం వంటి చర్యలు అత్యాచార యత్నంగా పరిగణించలేమని, అత్యాచార నిందితుడిపై అభియోగాలను నిరూపించడానికి ప్రాసిక్యూషన్ ఈ "సన్నద్ధత దశ" దాటి వెళ్లాలని సూచిస్తూ అలహాబాద్ హైకోర్టు ఇచ్చిన వివాదాస్పద ఉత్తర్వులపై సుప్రీంకోర్టు బుధవారం స్టే విధించింది. అలహాబాద్ హైకోర్టు మార్చి 17న ఇచ్చిన ఈ తీర్పును సవాల్ చేస్తూ 'వి ది ఉమెన్ ఆఫ్ ఇండియా' అనే సంస్థ సుప్రీంకోర్టును ఆశ్రయించడంతో సుప్రీంకోర్టు ఈ కేసును సుమోటోగా స్వీకరించింది.

సున్నితత్వం లేని తీర్పు

అలహాబాద్ హైకోర్టు న్యాయమూర్తి ఇచ్చిన తీర్పు ఏ మాత్రం సున్నితత్వం లేనిదని సుప్రీంకోర్టు న్యాయమూర్తులు జస్టిస్ బీఆర్ గవాయ్, జస్టిస్ అగస్టీన్ జార్జ్ మాసిహ్ లతో కూడిన ధర్మాసనం ఆగ్రహం వ్యక్తం చేసింది. ‘తీర్పు రాసిన వ్యక్తి సున్నితత్వ లోపానికి ఇది నిదర్శనమని చెప్పడానికి మేము బాధపడుతున్నాము. ఇది క్షణికావేశంలో చేసిన వ్యాఖ్య కూడా కాదు. దానిని రిజర్వ్ చేసిన 4 నెలల తరువాత డెలివరీ చేయబడింది. అందువలన, మనస్ఫూర్తిగానే ఆ వ్యాఖ్యలు చేసినట్లు భావిస్తున్నాం. సాధారణంగా ఈ దశలో స్టే ఇవ్వడానికి సంకోచిస్తాం. కానీ 21,24,26 పేరాల్లోని పరిశీలనలు చట్టానికి తెలియనివి, అమానవీయ వైఖరిని ప్రదర్శిస్తున్నాయి. ఆ పారాల్లోని పరిశీలనలపై స్టే విధిస్తున్నాం’ అని సుప్రీంకోర్టు ధర్మాసనం స్పష్టం చేసింది. దీనిపై స్పందించాలని కేంద్రం, ఉత్తరప్రదేశ్ ప్రభుత్వాన్ని కోరిన సుప్రీంకోర్టు సొలిసిటర్ జనరల్ తుషార్ మెహతా, అటార్నీ జనరల్ ఆర్ వెంకటరమణి సాయం కోరింది.

అలహాబాద్ హైకోర్టు ఏం చెప్పింది?

నిందితుడి క్రిమినల్ రివిజన్ పిటిషన్ ను అనుమతిస్తూ అలహాబాద్ హైకోర్టులోని జస్టిస్ రామ్ మనోహర్ నారాయణ్ మిశ్రా ధర్మాసనం ఈ వివాదాస్పద ఉత్తర్వులు జారీ చేసింది. నిందితుడిని ఐపీసీ సెక్షన్ 354-బి (విచక్షణా రహితంగా దాడి చేయడం లేదా నేరపూరిత శక్తిని ఉపయోగించడం) పోక్సో చట్టంలోని సెక్షన్లు 9/10 (తీవ్రమైన లైంగిక దాడి) కింద విచారించాలని హైకోర్టు ఆదేశించింది.

అసలేం జరిగింది?

యూపీలో 2021 నవంబర్ 10న బాధితురాలిని మోటారుసైకిల్ పై తీసుకెళ్లి ఆమె ఇంటి వద్ద దింపేందుకు నిందితులు ముందుకొచ్చాడు. వారి హామీని నమ్మిన ఆమె తండ్రి బాధితురాలిని వారితో వెళ్లేందుకు అనుమతించాడు. మార్గమధ్యంలో ముగ్గురు నిందితులు బాలికపై లైంగిక దాడికి ప్రయత్నించారు. నిందితులు 11 ఏళ్ల బాధితురాలి వక్షోజాలను పట్టుకున్నారని, వారిలో ఒకరు ఆమె పైజామాను తొలగించేందుకు ప్రయత్నించారని, ఆ బాలికను సమీపంలోని కల్వర్టు కిందకు లాక్కువెళ్లేందుకు ప్రయత్నించారని ప్రాసిక్యూషన్ ఆరోపించింది. బాలిక అరుపులు విని, అక్కడి వారు రావడంతో నిందితులు బాధితురాలిని అక్కడే వదిలేసి పరారయ్యారు.

అత్యాచార యత్నం కాదు..

నిందితులు పవన్, ఆకాష్ లపై వచ్చిన ఆరోపణలు, కేసు వాస్తవాలు ఈ కేసులో అత్యాచారయత్న నేరంగా పరిగణించబడవని అలహాబాద్ హైకోర్టు వ్యాఖ్యానించింది. అత్యాచార యత్నం అభియోగంగా పేర్కొనాలంటే, అది ప్రిపరేషన్ దశను దాటి ఉండాలని ప్రాసిక్యూషన్ నిరూపించాలని కోర్టు వ్యాఖ్యానించింది. నిందితులు తమ ప్రయత్నంలో తదుపరి దశ చర్యలు తీసుకోనందున అత్యాచారానికి పాల్పడినట్లు నిరూపించడానికి ఇటువంటి చర్యలు సరిపోవని న్యాయమూర్తి తీర్పు చెప్పారు. నిందితుల చర్యలు బాధితురాలిని నగ్నంగా లేదా బట్టలు లేకుండా ఉంచాయని సాక్షులు చెప్పలేదని ఉత్తర్వుల్లో పేర్కొన్నారు.