Mumbai Fire accident : ముంబైలోని ఓ భవనంలో భారీ అగ్నిప్రమాదం.. ఏడుగురు మృతి!

Mumbai Fire accident : ముంబైలో విషాదకర ఘటన చోటుచేసుకుంది. గోరేగావ్​లోని ఓ 7 అంతస్తుల భవనంలో శుక్రవారం తెల్లవారుజామున అగ్నిప్రమాదం సంభవించింది. ఈ ఘటనలో ఏడుగురు మరణించారు. మరో 51మంది గాయపడ్డారు. మృతుల సంఖ్య మరింత పెరిగే అవకాశం ఉంది.

పశ్చిమ్​ ఆజాద్​ నగర్​ ప్రాంతంలోని జయ భవాని బిల్డింగ్​లో మంటలు చెలరేగాయి. ఘటనపై సమాచారం అందుకున్న వెంటనే రంగంలోకి దిగిన అధికారలు.. ఘటనాస్థలానికి పరుగులు తీశారు. అగ్నిమాపక సిబ్బంది సైతం అక్కడి చేరుకుని మంటలను అదుపుచేసేందుకు కృషి చేసింది. 

Mumbai fire accident today : ఈ ఘటనలో మరణించిన ఏడుగురిలో ఇద్దరు మైనర్లు కూడా ఉన్నట్టు తెలుస్తోంది. గాయపడిన వారిలో 12మంది పురుషులు, 28మంది మహిళలతో పాటు ఒక మైనర్​ ఉన్నట్టు సమాచారం. ఆసుపత్రిలో ప్రస్తుతం 35మంది చికిత్స పొందుతున్నారు. వీరిలో ఐదుగురి పరిస్థిత విషమంగా ఉంది.

కాగా.. అగ్నిప్రమాదానికి గల కారణాలపై అధికారులు ఇంకా ఎలాంటి ప్రకటన చేయలేదు.. అయితే.. షార్ట్​ సర్క్యూట్​ కారణంగా ఈ ఘటన జరిగిందని ఓ స్థానికుడు తెలిపాడు.

Mumbai fire accident death toll : "మా అత్త చనిపోయారు. మా కుటుంబసభ్యులు ఆసుపత్రిలో ఉన్నారు. అర్ధరాత్రి 1:30లకు షార్ట్​ సర్క్యూట్​ జరిగింది. మంటలు చెలరేగాయి. 7వ అంతస్తు వరకు మంటలు వ్యాపించాయి," అని ఓ వ్యక్తి తెలిపాడు.

కాగా.. మంటలు అంటుకున్న కొన్ని నిమిషాల్లోనే.. అవి భవనం మొత్తానికి వ్యాపించాయని, కింద ఉన్న దుకాణాలు, చెత్త, కార్లను కూడా విడిచిపెట్టలేదని సమాచారం.

ఈ ఘటనపై మహారాష్ట్ర డిప్యూటీ సీఎం దేవేంద్ర ఫడణవీస్​ స్పందించారు.

"గోరేగావ్​ ఘటనలో ప్రజలు మరణించారన్న వార్త విని బాధ కలిగింది. బీఎంసీ, ముంబై పోలీసు అధికారులతో టచ్​లో ఉన్నాము. అన్ని విధాలుగా సాయం చేస్తాము. మరణించిన వారి కుటుంబసభ్యులకు నా ప్రగాఢ సానుభూతి. గాయపడిన వారు తొందరగా కోలుకోవాలని ఆశిస్తున్నాము," అని దేవేంద్ర ఫడణవీస్​ వెల్లడించారు.