షాకింగ్​! గుండెపోటుతో 42ఏళ్లకే బిగ్​బాస్​ నటి​ మృతి..

ప్రముఖ నటి- మోడల్​, హిందీ బిగ్​ బాస్​ ఫేమ్​ షెఫాలీ జరివాలా కన్నుమూశారు. శుక్రవారం అర్థరాత్రి 42ఏళ్ల షెఫాలీని ఆమె భర్త పరాగ్​ త్యాగీ ముంబైలోని బెల్లెవూ ఆసుపత్రికి తరలించగా, అప్పటికే ఆమె మరణించారని వైద్యులు ధ్రువీకరించారు. గుండెపోటు వల్ల షెఫాలీ జరివాలా మృతిచెందారు.

ప్రముఖ జర్నలిస్ట్​ విక్కీ లాల్వాని సోషల్​ మీడియా వేదికగా షెఫాలీ మరణ వార్తపై తొలి పోస్ట్​ చేశారు.

“షెఫాలీ జరివాలా, ది కాంటా లగా గర్ల్​ ఇక మన మధ్యలో లేరు. ఆమె మరణానికి ఇంకా కారణం తెలియదు. కానీ ఆమెను ముంబైలోని ఆసుపత్రికి తీసుకెళ్లేసరికే మరణించారు. షెఫాలీ భర్త పరాగ్​ త్యాగీ, మరో ముగ్గురు ఆమెను ఆసుపత్రికి తీసుకెళ్లారు. ఈ వార్తను ఆసుపత్రిలోని రిసెప్షన్​ స్టాఫ్​ ధ్రువీకరించారు. “ఇక్కడికి తీసుకొచ్చే లోపే షెఫాలీ జరివాలా ప్రాణాలు కోల్పోయారు,” అని వారు చెప్పారు,” అని విక్కీ పోస్ట్​ చేశారు.

షెఫాలీ జరివాలా గుండెపోటుతో మరణించారని ఆ తర్వాత వెలువడింది.

ఎవరు ఈ షెఫాలీ జరివాలా?

కంప్యూటర్​ ఇంజినీర్​ అవ్వాలనుకున్న షెఫాలీ జరివాలా.. 2002లో “కాంటా లగా” అనే మ్యూజిక్​ వీడియోలో నటించి ఫేమస్​ అయ్యారు. అప్పుడామే వయస్సు 20ఏళ్లు. 1972లోని ప్రముఖ పాటకు ఇది రీమిక్స్​. అప్పటి నుంచి షెఫాలీ అనేక మ్యూజిక్​ ఆల్బమ్స్​లో నటించారు. 2020లో సల్మాన్​ ఖాన్​ హిందీ బిగ్​ బాస్​లో కూడా ఆమె కనిపించారు.

మ్యూజీషియన్​ హర్మీత్​ సింగ్​తో 2009లో విడాకుల అనంతరం షెఫాలీ జరివాలా.. పరాగ్​ త్యాగీని కలిశారు. వారిద్దరు నాలుగేళ్లు డేటింగ్​ చేసి 2014లో పెళ్లి చేసుకున్నారు. ఉత్తర్​ప్రదేశ్​కి చెందిన పరాగ్​ త్యాగీ టీవీ, సినిమాల్లో పనిచేశారు. జీటీ పవిత్ర రిష్త (2009-2014) సీరియల్​తో వినోద కరంజ్​కర్​గా పరాగ్​ త్యాగీ మంచి గుర్తింపు పొందారు. 2016లో వచ్చిన బ్రహ్మరాక్షస్​లో కూడా నటించారు.

షెఫాలీ జరివాలా- పరాగ్​ త్యాగీ దంపతులు అనేక రియాలిటీ షోలలో కలిసి పాల్గొన్నారు.

షెఫాలీ జరివాలా మరణం తర్వాత, ఆమె పాత ఇంటర్వ్యూ ఒకటి సోషల్​ మీడియాలో ఇప్పుడు వైరల్​గా మారింది.

“ప్రపంచంలో ఒక్కరంటే ఒక్కరే కాంటా లగా గర్ల్​ ఉండగలరు. అది నేనే! అది నాకు చాలా ఇష్టం. నేను చనిపోయేంత వరకు అందరు నన్ను “కాంటా లగా గర్ల్​” అని గుర్తుపెట్టుకోవాలి,” అని షెఫాలీ అన్నారు.

షెఫాలీ మరణంపై పలువురు ప్రముఖులు స్పందించారు.

“షాక్​ అయ్యాను. బాధగా ఉంది. గుండె బరువెక్కింది. నా ప్రియమైన స్నేహితురాలు షెఫాలీ జరివాలా మనల్ని వదిలేసి వెళ్లిపోయింది. ఈ వార్తను ఇంకా నమ్మలేకపోతున్నాను. నీ నవ్వు, స్ఫూర్తికి ఎప్పటికీ గుర్తుండిపోతావు. ఓం శాంతి,” అని ప్రముఖ సింగర్​ మికా సింగ్​ సోషల్​ మీడియాలో పోస్ట్​ చేశారు.