Saif Ali Khan case : సైఫ్ అలీ ఖాన్పై దాడి కేసులో నిందితుడి పక్షాన వాదించేందుకు గొడవపడ్డ లాయర్లు..!
Saif Ali Khan attacker lawyers : సైఫ్ అలీ ఖాన్పై దాడి కేసు నిందితుడి పక్షాన వాదించేందుకు ఇద్దరు లాయర్లు గొడవపడ్డారు! కోర్టులో అసలేం జరిగిందంటే..
ముంబై బాంద్రా కోర్టులో ఆదివారం నాటకీయ పరిణామాలు చోటుచేసుకున్నాయి! బాలీవుడ్ నటుడు సైఫ్ అలీ ఖాన్పై దాడి కేసు నిందితుడిని పోలీసులు కోర్టులో హాజరుపరచగా, అతని పక్షాన వాదించేందుకు ఇద్దరు న్యాయవాదులు గొడవపడ్డారు.
ఇదీ జరిగింది..
బాంద్రా అపార్ట్మెంట్లోకి జనవరి 16 తెల్లవారుజామున చొరబడి సైఫ్ అలీఖాన్పై పదేపదే కత్తితో దాడి చేసిన మహ్మద్ షరీఫుల్ ఇస్లాం షెహజాద్ని ముంబై పోలీసులు ఆదివారం ఉదయం థానేలో అరెస్ట్ చేశారు. బంగ్లాదేశీ జాతీయుడిగా పోలీసులు అనుమానిస్తున్న షెహజాద్ను ఆదివారం మధ్యాహ్నం బాంద్రాలోని మెట్రోపాలిటన్ మేజిస్ట్రేట్ కోర్టులో హాజరుపరిచారు. పోలీసులపై ఏమైనా ఫిర్యాదులు ఉన్నాయా అని కోర్టు ప్రశ్నించగా షెహజాద్ లేదని సమాధానమిచ్చాడు. అనంతరం కోర్టు వెనుక భాగంలో నిందితుల కోసం ఏర్పాటు చేసిన బాక్స్ వద్దకు నిందితుడిని తీసుకెళ్లారు.
అనంతరం షెహజాద్ తరఫున వాదిస్తున్నట్లు ఒక న్యాయవాది ముందుకు వచ్చారు. అయితే, 'వాకలతామన' (ఒక కేసులో వాదించడానికి న్యాయవాదికి అధికారం ఇచ్చే చట్టపరమైన పత్రం) పై నిందితుడి సంతకం తీసుకునే లోపే నాటకీయ పరిణామాలు చోటుచేసుకున్నాయి.
వెనుక నుంచి మరో లాయర్ నిందితుడి బాక్స్ వద్దకు హడావుడిగా వెళ్లి షెహజాద్ సంతకాన్ని తన వాకలతమానాపై తీసుకునేందుకు ప్రయత్నించాడు. దీంతో దాడికి పాల్పడిన వ్యక్తి తరఫున ఎవరు హాజరవుతారనే దానిపై ఇద్దరు కొంతసేపు గొడవపడ్డారు.
అయితే, సైఫ్ అలీ ఖాన్పై దాడి కేసు నిందితుడి పక్షాన ఇద్దరూ వాదించమని మెటిస్ట్రేట్ సూచించారు.
"మీరిద్దరూ హాజరుకావచ్చు," అని మేజిస్ట్రేట్ చెప్పడంతో న్యాయవాదులు అంగీకరించారు. అలా గొడవ సద్దుమణిగింది.
అనంతరం కోర్టు షెహజాద్కు ఐదు రోజుల పాటు పోలీసు కస్టడీ విధించింది.
సైఫ్ అలీఖాన్ పై దాడి కేసు..
జనవరి 16 తెల్లవారుజామున బాంద్రాలోని 'సద్గురు శరణ్' భవనంలోని 12వ అంతస్తు అపార్ట్మెంట్లో సైఫ్ అలీ ఖాన్ని ఓ దుండగుడు కత్తితో పొడిచాడు. తెల్లవారుజామున 2.30 గంటల ప్రాంతంలో జరిగిన ఈ ఘటనతో 54 ఏళ్ల నటుడికి లీలావతి ఆసుపత్రిలో అత్యవసర శస్త్రచికిత్స జరిగింది. సైఫ్ అలీ ఖాన్ కోలుకుంటున్నారని, త్వరలోనే డిశ్చార్జ్ కావచ్చని వైద్యులు తెలిపారు.
అయితే సైఫ్పై దాడి కేసు నిందితుడిని అరెస్టు చేయడానికి ముందు, నటుడి భవనంలోని సీసీటీవీ కెమెరా ఫుటేజీ ఆధారంగా పోలీసులు అతనిని పోలిన కనీసం ఇద్దరు వ్యక్తులను అదుపులోకి తీసుకుని విచారించారు. కానీ వారెవరూ నేరం చేయలేదని తేలడంతో విడిచిపెట్టారు. చివరికి అసలు నిందితుడు షెహజాద్ చిక్కాడు.
దక్షిణ బంగ్లాదేశ్ బరిసాల్ డివిజన్లోని ఝలకతి అని కూడా పిలిచే ఝలోకతికి చెందిన షెహజాద్ గత ఐదు నెలలుగా ముంబైలో ఉన్నాడని, ఈ సమయంలో అతను హౌస్ కీపింగ్ ఏజెన్సీతో పాటు చిన్న చిన్న ఉద్యోగాలు చేశాడని పోలీసులు తెలిపారు.
సంబంధిత కథనం