Saif Ali Khan stabbing : సైఫ్​ అలీ ఖాన్​పై దాడి చేసింది ఇతనే! ఎట్టకేలకు పట్టుకున్న పోలీసులు..-saif ali khan attacker arrested confesses to stabbing actor say police ,జాతీయ - అంతర్జాతీయ న్యూస్
తెలుగు న్యూస్  /  జాతీయ - అంతర్జాతీయ  /  Saif Ali Khan Stabbing : సైఫ్​ అలీ ఖాన్​పై దాడి చేసింది ఇతనే! ఎట్టకేలకు పట్టుకున్న పోలీసులు..

Saif Ali Khan stabbing : సైఫ్​ అలీ ఖాన్​పై దాడి చేసింది ఇతనే! ఎట్టకేలకు పట్టుకున్న పోలీసులు..

Sharath Chitturi HT Telugu
Jan 19, 2025 06:32 AM IST

Saif Ali Khan stabbing case : సైఫ్​ అలీ ఖాన్​పై దాడి కేసులో ప్రధాన నిందుతుడు విజయ్​ దాస్​ని పోలీసులు అరెస్ట్​ చేశారు. థానే జిల్లాలో అతను పోలీసులకు చిక్కాడు.

సైఫ్​ అలీ ఖాన్​పై దాడి కేసు నిందుతుడు విజయ్​ దాస్​
సైఫ్​ అలీ ఖాన్​పై దాడి కేసు నిందుతుడు విజయ్​ దాస్​ (ANI)

ప్రముఖ బాలీవుడ్ నటుడు సైఫ్ అలీ ఖాన్ ఇంట్లోకి చొరబడి, ఆయనపై దాడి చేసిన వ్యక్తి.. ఎట్టకేలకు పోలీసులకు చిక్కాడు! గురువారం తెల్లవారుజామున ఈ ఘటన జరగ్గా.. సైఫ్​ అలీ ఖాన్​పై దాడి కేసులో ప్రధాన నిందితుడు విజయ్​ దాస్​ని​ ముంబై పోలీసులు ఆదివారం తెల్లవారుజామున మహారాష్ట్రలోని థానే జిల్లాలో అరెస్టు చేశారు.

అరెస్టయిన నిందితుడు విజయ్ దాస్ ఓ రెస్టారెంట్​లో వెయిటర్​గా పనిచేస్తూ ఈ నేరానికి పాల్పడినట్టు పోలీసులు వెల్లడించారు. సైఫ్​ అలీ ఖాన్​పై దాడిని అతను అంగీకరించాడని తెలిపారు.

సైఫ్​ అలీ ఖాన్​పై దాడి కేసుకు సంబంధించి ముంబై పోలీసులు ఆదివారం ఉదయం 9 గంటలకు డీసీపీ జోన్ 9 కార్యాలయంలో మీడియా సమావేశం నిర్వహించనున్నారు. అప్పుడు మరిన్ని వివరాలు వెలువడే అవకాశం ఉంది. నిందితుడు అసలు ఎందుకు ఈ నేరానికి పాల్పడ్డాడు? అని పోలీసులు ఆరా తీస్తున్నారు.

కాగా సైఫ్​ అలీ ఖాన్​ కేసు నిందితుడిని కోర్టులో హాజరుపరిచి, రిమాండ్​కి తరలించేందుకు పోలీసులు ఏర్పాట్లు చేస్తున్నట్టు తెలుస్తోంది.

వరుస విచారణలు, గాలింపు చర్యలు..

అయితే ఈ కేసుకు సంబంధించి శుక్రవారం ఉదయం నుంచి పోలీసులు పలువురు అనుమానితులను అదుపులోకి తీసుకుని ప్రశ్నిస్తూ వచ్చారు. చివరిగా.. శనివారం రాత్రి ఓ వ్యక్తిని ఛత్తీస్​గఢ్​లోని ఓ రైల్వే స్టేషన్​లో పట్టుకుని విచారించారు. అయితే అదుపులోకి తీసుకున్న వారెవరూ సైఫ్​ అలీ ఖాన్​పై దాడికి పాల్పడలేదని తేలింది.

నిందితుడిని పట్టుకునేందుకు 3 రోజులుగా 30కిపైగా టీమ్స్​ తీవ్రస్థాయిలో గాలింపు చర్యలు చేపట్టారు. ఈ క్రమంలోనే ఆదివారం తెల్లవారుజామున ప్రాంతంలో ప్రధాన నిందితుడు విజయ్​ దాస్​ పోలీసులకు దొరికాడు.

సైఫ్ అలీఖాన్ పై దాడి కేసు..

గురువారం తెల్లవారుజామున పలుమార్లు కత్తిపోట్లకు గురైన సైఫ్ అలీ ఖాన్ ప్రస్తుతం ఆసుపత్రిలో చికిత్స పొందుతున్నారు. ముంబై బాంద్రా వెస్ట్ ప్రాంతంలోని 'సద్గురు శరణ్' భవనంలోని తన 12వ అంతస్తు అపార్ట్​మెంట్​లో ఈ ఘటన చోటుచేసుకుంది.

గురువారం తెల్లవారుజామున సైఫ్ అలీ ఖాన్ కుమరుడు, పనిమనిషిపై ఓ దుండగుడు కత్తితో దాడి చేయబోయాడు. అడ్డుకునేందుకు ప్రయత్నించిన సైఫ్​పై దాడి జరగడంతో ఘర్షణకు దారితీసింది. చివరికి సైఫ్​ అలీ ఖాన్​ కత్తిపోట్లకు గురయ్యారు.

వెన్నెముకకు కత్తిపోట్లు సహా తీవ్ర గాయాలు కావడంతో వెంటనే చికిత్స నిమిత్తం ముంబైలోని లీలావతి ఆసుపత్రికి సైఫ్​ని తరలించారు. సైఫ్ వెన్నెముకలో ఉన్న కత్తి కారణంగా థొరాసిక్ వెన్నెముకకు తీవ్ర గాయమైందని వైద్యులు తెలిపారు.

సైఫ్ అలీ ఖాన్ ఆరోగ్యం నిలకడగా ఉందని, ఐసీయూ నుంచి సాధారణ గదికి తరలించామని ఆసుపత్రి వర్గాలు తెలిపాయి. 2.5 ఇంచ్​ పొడవైన బ్లేడ్​ని తొలగించే శస్త్రచికిత్స విజయవంతమైందని, సైఫ్ ప్రస్తుతం ప్రమాదం నుంచి బయటపడినప్పటికీ, వైద్య సిబ్బంది ఆయన పరిస్థితిని నిశితంగా పర్యవేక్షిస్తూనే ఉన్నారు.

ఐసీయూ నుంచి తరలించిన ఈ బాలీవుడ్ నటుడు నడవగలుగుతున్నాడని, సాధారణ ఆహారం తీసుకుంటున్నారని వైద్యులు తెలిపారు. సోమవారం నాటికి సైఫ్ ఆసుపత్రి నుంచి డిశ్చార్జ్ అయ్యే అవకాశం ఉంది.

Whats_app_banner

సంబంధిత కథనం

జాతీయ, అంతర్జాతీయ తాజా వార్తలను మన తెలుగు హిందుస్తాన్ టైమ్స్ న్యూస్ సైట్‌లోని జాతీయ అంతర్జాతీయ సెక్షన్‌లో చూడవచ్చు.