Ukraine | ఆ విషయంలో 'తగ్గేదే లే' అంటున్న ఉక్రెయిన్.. రష్యా ఏం చేస్తుంది?
Russia Ukraine crisis | రష్యాతో సరిహద్దు ఉద్రిక్తతల నేపథ్యంలో.. నాటో సభ్యత్వంపై ఉక్రెయిన్ కీలక వ్యాఖ్యలు చేసింది. కొన్ని దేశాలు.. తమ ఆలోచనను ఉపసంహరించుకోవాలని చెబుతున్నా, తాము మాత్రం నాటో సభ్యత్వాన్ని ఆశిస్తున్నట్టు స్పష్టం చేసింది. మరోవైపు పరిస్థితిని అదుపుచేసేందుకు బైడెన్- పుతిన్ భేటీ అయ్యే అవకాశం ఉందని వస్తున్న వార్తలపై రష్యా నీళ్లు చల్లేసింది!
Ukraine NATO news | రష్యా- ఉక్రెయిన్ మధ్య విభేదాలు దాదాపు 30ఏళ్ల నుంచి ఉన్నా.. ఇటీవలి కాలంలో ఉద్రిక్తతలు తారస్థాయికి చేరడానికి గల ముఖ్య కారణం.. 'నాటో సభ్యత్వం'. నాటోలో చేరాలని ఉక్రెయిన్ సంకల్పించగా.. దాన్ని రష్యా తీవ్రంగా వ్యతిరేకించింది. ఆలోచనలు విరమించుకోవాలని హెచ్చరించింది. అందుకు తగ్గట్టుగానే ఉక్రెయిన్ను మూడువైపులా చుట్టుముట్టి.. సరిహద్దులో 10లక్షలకుపైగా సైనికులను మోహరించింది. రష్యా.. ఏ క్షణంలోనైనా ఉక్రెయిన్పై దండయాత్ర చేసేందుకు సిద్ధంగా ఉందని ప్రపంచ దేశాలు భయపడుతున్నాయి. పరిస్థితి ఇంత తీవ్రంగా మారిన వేళ.. రష్యా ఒత్తిడికి ఉక్రెయిన్ తలొగ్గుతుందా? నాటోలో చేరే ఆలోచనలను ఉపసంహరించుకుంటుందా? అన్న ప్రశ్నలపై గత కొంతకాలంగా ఊహాగానాలు జోరందుకున్నాయి. తాజాగా.. వాటికి ఉక్రెయిన్ జవాబు చెప్పేసింది. ఇప్పటికీ.. నాటో సభ్యత్వం పొందాలన్న ఆలోచనతోనే ఉన్నట్టు స్వయంగా ఉక్రెయిన్ విదేశాంగమంత్రి దిమిత్రో కులేబా వెల్లడించారు. కొన్ని పాశ్చాత్య దేశాలు.. తమ ఆలోచనలు విరమించుకోవాలని సూచిస్తున్నా.. తాము మాత్రం దాన్ని వ్యతిరేకిస్తున్నట్టు పేర్కొన్నారు.
ట్రెండింగ్ వార్తలు
రష్యాతో సరిహద్దు ఉద్రిక్తతల వేళ.. ఓ అంతర్జాతీయ మీడియాకు ఇంటర్వ్యూ ఇచ్చారు కులేబా.
"ఉక్రెయిన్లో మెజారిటీ మంది ప్రజలు.. నాటోలోకి దేశం చేరాలనే ఆశిస్తున్నారు. మేము కూడా అదే ఆలోచనలో ఉన్నాము. కొన్ని దేశాలు.. మా ఆలోచనను విరమించుకోవాలని అభ్యర్థిస్తున్నాయి. అయితే అందులో అమెరికా లేదు. మేము చెప్పేదంతా ఒక్కటే. రష్యా.. తన బలగాలను ఉపసంహరించుకుని, ఉక్రెయిన్ కోరుకున్నది సాధిస్తే.. ప్రపంచంలో ప్రజాస్వామ్య వ్యవస్థ మరింత బలపడుతుంది. మరింత భద్రతగా ఉంటుంది," అని కులేబా అన్నారు.
ఉక్రెయిన్ తూర్పు ప్రాంత ప్రజలు.. రష్యాకు మద్దతుగా నిలుస్తున్నారు. అయితే.. నాటో దళాలు సరిహద్దులో తిష్టవేసుకుని కూర్చుంటే.. ఉక్రెయిన్పై ఆధిపత్యం చెలాయించడం కష్టమవుతుందని రష్యా భావిస్తోంది. అందుకే ఉక్రెయిన్ ప్రయత్నాలను తీవ్రస్థాయిలో వ్యతిరేకిస్తోంది.
మరి ఇప్పుడు.. నాటో సభ్యత్వం కోసం ప్రయత్నిస్తామని ఉక్రెయిన్ తేల్చిచెప్పడంతో రష్యా ఎలాంటి నిర్ణయాలు తీసుకుంటుందని సర్వత్రా ఆందోళన నెలకొంది.
శాంతి సదస్సుపై నీళ్లు చల్లిన రష్యా..!
Biden Putin Ukraine | మరోవైపు.. రష్యా అధ్యక్షుడు పుతిన్, అమెరికా దేశాధినేత జో బైడెన్.. త్వరలో సమావేశం అవుతారని సోమవారం వార్తలొచ్చాయి. ఉద్రిక్తతలు తగ్గించేందుకు వారు కృషి చేస్తారని ఊహాగానాలు వెలువడ్డాయి. ఫలితంగా శాంతి స్థాపనపై ప్రపంచ దేశాల్లో ఆశలు చిగురించాయి. అయితే ఇప్పుడు ఆ ఆశలపై రష్యా నీళ్లు చల్లినట్టే కనిపిస్తోంది. అగ్రనేతల మధ్య సదస్సు నిర్వహించేందుకు ప్రణాళికలేవీ లేవని రష్యా వెల్లడించింది. పైగా.. ఈ దశలో అధ్యక్షులు భేటీకావడంలో అర్థం లేదు అన్నట్టుగా వ్యాఖ్యానించింది.
సంబంధిత కథనం