డెలివరీ బాయ్ నని చెప్పి ఇంట్లోకి ప్రవేశించి యువతిపై అత్యాచారం; సెల్ఫీ తీసుకుని బెదిరింపు

మహారాష్ట్రలోని పుణెలో కొరియర్ డెలివరీ బాయ్ నని చెప్పి ఇంట్లోకి ప్రవేశించిన ఒక వ్యక్తి ఆ ఇంట్లో ఒంటరిగా ఉంటున్న యువతిపై అత్యాచారానికి పాల్పడ్డాడు. ఆ తరువాత, అతడు ఆ యువతితో సెల్ఫీ దిగి, ఈ విషయాన్ని ఎవరికైనా చెబితే ఆ ఫొటోను సోషల్ మీడియాలో వైరల్ చేస్తానని బెదిరించాడు.

డెలివరీ బాయ్ నని చెప్పి..

పుణెలోని కొంధ్వా ప్రాంతంలో ఉన్న హౌసింగ్ సొసైటీలో రాత్రి 7.30 గంటల సమయంలో ఈ ఘటన జరిగింది. కొరియర్ వచ్చిందని, దాన్ని డెలివరీ చేయడానకిి వచ్చానని చెప్పి మహిళ ఇంట్లో ఒంటరిగా ఉన్న సమయంలో ఆ వ్యక్తి తలుపు తట్టాడు. ఆ సమయంలో ఆమె సోదరుడు పనిమీద బయటకు వెళ్లాడు. ఇంట్లో ఆ యువతి ఒంటరిగా ఉండడంతో ఆమెపై నిందితుడు అత్యాచారానికి పాల్పడ్డాడు. అనంతరం, బాధితురాలితో సెల్ఫీ తీసుకొని, నేరం గురించి ఎవరికీ చెప్పొద్దని, ఎవరికైనా చెబితే ఆ ఫొటోలు సోషల్ మీడియాలో షేర్ చేస్తానని హెచ్చరించాడు.

పోలీసులకు ఫిర్యాదు

‘‘నిన్న రాత్రి 7.30 గంటల సమయంలో డెలివరీ బాయ్ ని అని చెప్పి బ్యాంక్ కవర్ తో నిందితుడు 22 ఏళ్ల ఆ యువతి ఫ్లాట్ లోకి ప్రవేశించాడు. కొరియర్ కోసం పిన్ తీసుకురావడానికి ఆమె తన ఇంట్లోకి వెళ్లగా, అతను తలుపు మూసివేసి ఆమెపై అత్యాచారానికి పాల్పడ్డాడు’’ అని డిప్యూటీ పోలీస్ కమిషనర్ (జోన్ 5) రాజ్ కుమార్ షిండే తెలిపారు.

మత్తులోకి నెట్టి..

ఆ ఘటన తరువాత బాధితురాలు అపస్మారక స్థితిలోకి వెళ్లింది. రాత్రి 8.30 గంటల సమయంలో స్పృహలోకి వచ్చిన తరువాత కూడా వెంటనే ఆమెకు ఏమీ గుర్తురాలేదు. ఆ తరువాత బాధితురాలు తన కుటుంబ సభ్యులకు సమాచారం అందించడంతో వారు పోలీసులకు సమాచారం ఇచ్చారు. అత్యాచారం చేసిన తరువాత ఆమెను అపస్మారక స్థితిలోకి నెట్టేందుకు దుండగుడు ఏదైనా మత్తు పదార్థాన్ని కానీ, స్ప్రేను కానీ ఉపయోగించి ఉండవచ్చని పోలీసులు అనుమానిస్తున్నారు. ఆ విషయాన్ని నిర్ధారించడానికి ఫోరెన్సిక్ నిపుణులను సంఘటనా స్థలానికి పిలిపించారు.

కేసు నమోదు

పుణెలోని కొంధ్వా పోలీస్ స్టేషన్ పరిధిలో బీఎన్ఎస్ సెక్షన్లు 64, 77, 351(2) కింద కేసు నమోదు చేశామని డీసీపీ షిండే తెలిపారు. క్రైమ్ బ్రాంచ్ కు చెందిన ఐదు బృందాలు, ఐదు జోనల్ బృందాలు కలిపి మొత్తం 10 బృందాలు ఈ కేసును దర్యాప్తు చేస్తున్నాయని తెలిపారు. ఆ ప్రాంతంలోని సీసీటీవీ ఫుటేజీలో నిందితుడి ముఖం రికార్డవడంతో పోలీసులు అతడిని గుర్తించి ఆచూకీ కనుగొనేందుకు ప్రయత్నిస్తున్నారు.