Man hammers wife : అనుమానం పెట్టిన చిచ్చు- సుత్తితో భార్యను కొట్టి, కొట్టి కిరాతకంగా చంపిన భర్త!
Man kills wife : నోయిడాలో ఓ వ్యక్తి తన భార్యను అతి కిరాతకంగా చంపేశాడు. భార్యకు వివాహేతర సంబంధం ఉందన్న అనుమానంతో, ఆమెను సుత్తితో కొట్టి, కొట్టి హత్య చేశాడు. చివరికి పోలీసుల ఎదుట లొంగిపోయాడు.
నోయిడాలో అత్యంత దారుణ ఘటన వెలుగులోకి వచ్చింది. అనుమానం అనే భూతంతో అంధుడైన ఓ వ్యక్తి.. తన భార్యను అతి కిరాతకంగా హత్య చేశాడు. సుత్తితో కొట్టి, కొట్టి చంపేశాడు. అనంతరం పోలీసుల ముందు లొంగిపోయాడు.
ఇదీ జరిగింది..
నోయిడాలోని సెక్టర్ 15 ప్రాంతంలో శుక్రవారం మధ్యాహ్నం ఈ ఘటన వెలుగులోకి వచ్చింది. నిందితుడి పేరు నూర్ ఉల్ లాహ్ హైదర్. అతని వయస్సు 55ఏళ్లు. కంప్యూటర్ ఇంజినీర్ గ్యాడ్యుయేట్ అతను. అతని భార్య పేరు ఆస్మా ఖాన్ (42). ఒక ప్రైవేట్ కంపెనీలో సివిల్ ఇంజినీర్గా పనిచేస్తోంది. వారికి ఇద్దరు పిల్లలు ఉన్నారు. ఒకరు బీటెక్ స్టూడెంట్ సమద్. ఇంకొకరు 12ఏళ్ల ఇనాయా.
కాగా తన భార్యకు వివాహేతర సంబంధం ఉందని నూర్కి చాలా కాలంగా అనుమానాలు ఉన్నాయి. ఈ విషయంపై ఇద్దరి మధ్య తరచూ గొడవ జరిగేదని తెలుస్తోంది. కుటుంబసభ్యుల సమాచారం ప్రకారం గురువారం ఈ గొడవ మరింత ముదిరింది. దంపతులు రాత్రంగా గొడవపడ్డారు. చివరికి, శుక్రవారం మధ్యాహ్నం బెడ్రూమ్ డోర్ని లాక్ చేసిన నూర్.. భార్య మీద దాడి చేశాడు. ఆమెపై దిండు పెట్టి, ఊపిరాడనివ్వకుండా చేశాడు. చివరికి, సుత్తి తీసుకుని ఆమె చనిపోయే దాకా తలపై బలంగా కొట్టాడు. ఆ రక్తం బెడ్ అంతా చిమ్మింది.
శుక్రువారం మధ్యాహ్నం 1గంటకు సమద్, తన తల్లి సోదరి ఫరిదాకు ఫోన్ చేశాడు. తన తల్లి చనిపోయిందని, తన తండ్రే ఆమెను చంపేశాడని వివరించాడు. బెడ్ మొత్తం రక్తపుమడుగుగా మారిందని చెప్పాడు. ఫరిదా, ఆమె భర్త ఘటనాస్థలానికి పరుగులు తీశారు.
ఈలోగా భార్యను హత్య చేసిన నిందితుడు నూర్.. దాదాపు 2 కిలోమీటర్లు నడిచి, పోలీస్ స్టేషన్కి వెళ్లి, జరిగినది చెప్పి లొంగిపోయాడు. వివాహేతర సంబంధం ఉందన్న అనుమానంతో తన భార్యను చంపినట్టు ఒప్పుకున్నాడు.
"అనుమానంతోనే తన భార్యను చంపినట్టు నూర్ వెల్లడించాడు. హత్య చేసినందుకు అతను పశ్చాత్తాపం ఏం చూపించలేదు. మేము ఘటనాస్థలానికి వెళ్లాము. ఆస్మా మృతదేహాన్ని స్వాధీనం చేసుకుని పోస్టుమార్టం కోసం ఆసుపత్రికి తరలించాము. ఘటనాస్థలంలో సుత్తిని స్వాధీనం చేసుకున్నాము. ఈ ఘటనపై దర్యాప్తు కొనసాగుతోంది," ని నోయిడా అదనపు డీసీపీ సుమిత్ శుక్లా వెల్లడించారు.
కుటుంబసభ్యుల వివరాల ప్రకారం..
ఈ ఘటనపై ఆస్మా తరఫు కుటుంబసభ్యులు మరికొన్ని వివరాలను వెల్లడించారు. గురువారం రాత్రంతా గొడవపడటంతో ఆస్మా తన సోదరి, తల్లికి ఫోన్ చేసి పిలిపించింది. ఆస్మా సోదరి, ఆమె తల్లి.. శుక్రవారం ఉదయం 5 గంటలకు నోయిడాలో ఇంటికి వెళ్లారు. ఆస్మా, నూర్తో మాట్లాడారు. నూర్కి నచ్చజెప్పేందుకు ప్రయత్నించారు.
ఆ తర్వాత ఉదయం 11 గంటలకు ఫరిదా ఆమె ఇంటికి వెనుదిరిగింది. ఆస్మా తల్లి, ఆస్మా పిల్లలు ఎవరి గదులకు వాళ్లు వెళ్లిపోయారు. అప్పుడే, ఆస్మా- నూర్లు తమ రూమ్ని లాక్ చేసుకున్నారు. నూర్ తన భార్యను సుత్తితో కిరాతకంగా హతమార్చాడు.
ఈ ఘటన స్థానికంగా కలకలం సృష్టించింది. భార్యను అతి కిరాతకంగా చంపిన వ్యక్తిని కఠినంగా శిక్షించాలని డిమాండ్లు వెల్లువెత్తుతున్నాయి.
సంబంధిత కథనం