Tomato price : కేజీ టమాటా ధర రూ. 250- 'మా ఫుడ్​లో ఇక వాడట్లేదు'- మెక్​డీ!

Tomato price in India : దేశంలో టమాటా ధరలు పెరుగుతున్న తీరు చూసి అందకు షాక్​ అవుతున్నారు. ముఖ్యంగా సామాన్యుడి గుండెపై టమాటా భారం రోజురోజుకు పెరిగిపోతోంది. ఒకటి, రెండు ప్రాంతాలు అని కాకుండా.. దేశవ్యాప్తంగా ఇదే పరిస్థితి నెలకొంది. తాజాగా ఉత్తరాఖండ్​లో కేజీ టమాటా ధర రూ. 250ని తాకడం గమనార్హం. మరోవైపు తాజా పరిణామాల మధ్య ప్రముఖ ఫుడ్​ చెయిన్​​ మెక్​డొనాల్డ్​ ఓ కీలక నిర్ణయం తీసుకుంది. ఇకపై తమ ఫుడ్​లో టమాటాలు ఉండవని తేల్చి చెప్పి కస్టమర్లకు షాక్​ ఇచ్చింది.

టమాటా ధరలకు రెక్కలు..

తెలంగాణ, ఆంధ్రప్రదేశ్​లో కేజీ టమాటా రూ. 120 కన్నా ఎక్కువగానే అమ్ముడవుతోంది. కాగా.. ఉత్తరాఖండ్​లో పరిస్థితులు మరింత తీవ్రంగా ఉన్నాయి. గంగోత్రి ధామ్​లో కేజీ టమాటా ధర రూ. 250ని తాకింది. ఉత్తర కాశీ జిల్లాలోని ఇతర ప్రాంతాల్లో కేజీ టమాటా రూ. 180 నుంచి రూ. 200 మధ్యలో ఉంది.

దేశవ్యాప్తంగా టమాటా ధరలు భారీగా పెరగడానికి కొన్ని కారణాలు ఉన్నాయి. కొన్ని ప్రాంతాల్లో భారీ వర్షాల కారణంగా పంట చేతికి అందలేదు. ఇంకొన్ని ప్రాంతాల్లో.. భారీ ఉష్ణోగ్రతల కారణంగా అసలు పంటే పండలేదు. ఈ నేపథ్యంలో మార్కెట్​లలో డిమాండ్​- సప్లైకి మధ్య వ్యత్యాసం చాలా పెరిగిపోయింది. ఫలితంగా టమాటా రేట్లు ఆకాశాన్ని తాకుతున్నాయి.

నిత్యావసర వస్తువల్లో టమాటాలు, ఉల్లిగడ్డలు చాలా కీలకం. వీటిని త్వరగా వాడుకోకపోతే, కుళ్లిపోయే ప్రమాదం ఉంటుంది. అందుకే టమాటాలను నిల్వ ఉంచి, తర్వాత వాడుకునే అవకాశం కూడా ఉంది. ఈ నేపథ్యంలో జేబులకు చిల్లు పడుతున్నా.. చాలా మంది టమాటాలను కొనుగోలు చేసుకోవాల్సి వస్తోంది.

టమాటాలు ఉండవు- మెక్​డీ..

Tomato price latest news : దిల్లీలోనూ టమాటా ధరలు ఎక్కువగానే ఉన్నాయి. కేజీ టమాటా ధర రూ. 110- రూ. 120 మధ్య పలుకుతోంది. ఈ నేపథ్యంలో ప్రముఖ ఫుడ్​ ఔట్​లెట్​ మెక్​డీ ఓ నిర్ణయం తీసుకుంది. తమ ఫుడ్​లో టమాటాలు వాడకూడదని ఫిక్స్​ అయ్యింది. ఈ విషయాన్ని సెబీ రిజిస్టర్డ్​ ఇన్​వెస్ట్​మెంట్​ అడ్వైజర్​ ఆదిత్య షా ట్వీట్​ చేశారు. ట్వీట్​లో మెక్​డీకి సంబంధించిన నోటీసు ఉంది.

"దిల్లీ మెక్​డొనాల్డ్స్​లో ఈ నోటీసు కనిపించింది. మెక్​డీ కూడా భరించలేనంతగా టమాటా ధరలు పెరిగిపోయాయి," అని ఆదిత్య షా ట్వీట్​ చేశారు.

McDonald tomato notice : నాణ్యమైన టమాటాలను కొనుగోలు చేయలేకపోతున్నామని, మార్కెట్​లో ధరలు ఎక్కువగా ఉన్నాయని, అందుకే వాటిని తమ ఫుడ్​లో వాడట్లేదని మెక్​డీ నోటీసులో రాసి ఉంది. మరి ఇది ఒక్క ఔట్​లెట్​కో వర్తిస్తుందా? లేకా దేశవ్యాప్తంగా ఇదే పరిస్థితి ఉంటుందా? అన్నది తెలియాల్సి ఉంది.

ఇక ఈ విషయం ఇప్పుడు సోషల్​ మీడియాలో వైరల్​గా మారింది. నెటిజన్లు విపరీతంగా స్పందిస్తున్నారు. పాపం మెక్​డీ అంటూ కామెంట్లు పెడుతున్నారు. ఇంకొందరు మాత్రం.. ఈ విషయాన్ని చాలా సీరియస్​గా తీసుకున్నారు! ప్రభుత్వాలు మందుకొచ్చి.. ప్రజలు సాయం చేయాలని కోరుతున్నారు.

వాస్తవానికి పలు ప్రభుత్వాలు ఇప్పటికే ముందుకొచ్చాయి. సామాన్యుడిపై భారం పడకుండా.. మార్కెట్​లో సబ్సిడీకి, తక్కువ ధరకే టమాటాలను ఇస్తున్నాయి.