Nitish Kumar : ఆర్జేడీ మహిళా ఎమ్మెల్యేలపై నీతీశ్ కుమార్ సీరియస్.. మీకేమీ తెలియదంటూ కామెంట్స్

బీహార్ ముఖ్యమంత్రి నితీష్ కుమార్ ఆ రాష్ట్ర అసెంబ్లీలో కొంతమంది మహిళా సభ్యులపై అరిచారు. రాష్ట్రంలోని సవరించిన రిజర్వేషన్ చట్టాలను రాజ్యాంగంలోని 9వ షెడ్యూల్‌లో పొందుపరచాలనే డిమాండ్‌పై ప్రతిపక్ష సభ్యుల నిరసనతో సీరియస్ అయి సహనం కోల్పోయారు. నితీశ్‌కుమార్‌కు వ్యతిరేకంగా మహిళా ఎమ్మెల్యేలు డౌన్ డౌన్ అంటూ నినాదాలు చేశారు. దీంతో మహిళా ఎమ్మెల్యేలపై సీఎం ఆగ్రహం వ్యక్తం చేశారు.

నితీష్‌ కుమార్‌ రిజర్వేషన్‌ వ్యతిరేకి అని కూడా ఆర్జేడీ ఎమ్మెల్యేలు ఆరోపించారు.ఈ ఆరోపణలతో విసిగిపోయిన సీఎం తాను బీహార్ ముఖ్యమంత్రి అయిన తర్వాతనే మహిళలు తమ బకాయిలు పొందడం ప్రారంభించారని గుర్తు చేశారు. శాసనసభ్యుల వైపు ముఖ్యంగా RJD మహిళా ఎమ్మెల్యే రేఖాదేవి వైపు వేళ్లు ఊపుతూ నీతీష్ కుమార్ ఇలా అరిచారు..'నువ్వు స్త్రీవా. నేను అధికారం చేపట్టిన తర్వాతనే బీహార్‌లో మహిళలు తమ బకాయిలు పొందడం ప్రారంభించారని మీరు గ్రహించారా? మీరు ఒక మహిళా? మీకు ఏమీ తెలియదు, మీరు నాకు డౌన్ డౌన్ అని చెబితే, అది అందరికీ చెప్పినట్టే.' అని సహనం కోల్పోయారు.

'నా ఉద్దేశంతోనే మీరందరూ కులాల సర్వేకు అంగీకరించారు, ఆ తర్వాత ఎస్సీ, ఎస్టీ, ఓబీసీలు, అత్యంత వెనుకబడిన తరగతులకు కోటాలు పెంచారు.' అని ఆయన అన్నారు. ముఖ్యమంత్రి ప్రవర్తనపై బీహార్‌లో ప్రధాన ప్రతిపక్ష పార్టీ ఆర్జేడీ విమర్శలు చేసింది. మహిళల పట్ల ఆయనకు గౌరవం లేదని ఆరోపించింది.

నీతీశ్ కుమార్ ప్రవర్తన మహిళలను అవమానించేలా ఉందని ఆర్జేడీ సీనియర్ నేత రబ్రీ దేవి అన్నారు. ముఖ్యమంత్రికి మహిళల పట్ల గౌరవం లేదని ప్రజలకు తెలుసునని, ఈరోజు ఆయన అసెంబ్లీలో ఏం చేసినా మహిళలను అవమానించడమేనని అన్నారు.

అధికార ఎన్డీయే నాయకులు మహిళలను గౌరవించరని, ఇండియా కూటమి నాయకులు మాత్రమే మహిళలను గౌరవిస్తారని రబ్రీ దేవి అన్నారు. ఆర్జేడీ ఎమ్మెల్యే రేఖాదేవి కూడా నితీష్ కుమార్ తనను అవమానించారని ఆరోపించారు. నితీష్ కుమార్ మనస్సుపై నియంత్రణ కోల్పోయారని అన్నారు.

'నితీష్‌ కుమార్‌ అసెంబ్లీలో ఏం మాట్లాడినా మహిళను అవమానించడమే.. మనం ఈరోజు ఇక్కడ ఉన్నామంటే.. మన నాయకుడు, పార్టీ అధినేత లాలూ ప్రసాద్‌ వల్లే తప్ప నితీష్‌ కుమార్‌ వల్ల కాదు. ఆయన ఈరోజు సభలో దళిత ఎమ్మెల్యేను అవమానించారని అర్థమవుతోంది. ముఖ్యమంత్రికి మనసుపై నియంత్రణ లేదు.' అని రేఖాదేవి అన్నారు.