Nipah virus Kerala : ‘భయపడాల్సిన అవసరం లేదు’- నిపా వైరస్​ పరిస్థితిపై కేరళ

Nipah virus Kerala : కేరళలో నిపా వైరస్​ కలకలం నేపథ్యంలో ఆ రాష్ట్ర ఆరోగ్యశాఖ మంత్రి వీనా జార్జ్​ కీలక ప్రకటన చేశారు. రాష్ట్రంలో పరిస్థితులు కంట్రోల్​లో ఉన్నట్టు వెల్లడించారు. 200కుపైగా అనుమానిత శాంపిళ్లను పరీక్షించగా.. అవన్నీ నెగిటివ్​గా వచ్చినట్టు స్పష్టం చేశారు.

కేరళలో ఆరు నిపా వైరస్​ కేసులు వెలుగులోకి వచ్చిన విషయం తెలిసిందే. కొజికోడ్​ జిల్లాలోనే ఈ కేసులన్నీ నమోదయ్యాయి. వీరిలో ఇద్దరు ప్రాణాలు కోల్పోయారు. కాగా.. వీరితో సన్నిహితంగా ఉన్న 1233మందిని ట్రేస్​ చేసి, ఐసొలేషన్​లో పెట్టింది స్థానిక యంత్రాంగం. కానీ తాజాగా కేసులేవీ నమోదు కాలేదని వీనా జార్జ్​ తెలిపారు.

"అన్నిటికన్నా సానుకూల విషయం ఏంటంటే.. ఆసుపత్రిలో చికిత్స పొందుతున్న నాలుగురి ఆరోగ్యం కూడా మెరుగుపడుతోంది. వీరిలో.. ఇంతకాలం వెంటిలేటర్​ సపోర్ట్​పై ఉన్న 9ఏళ్ల బాలుడి ఆరోగ్యం కూడా మెరుగు అవుతోంది," అని వీనా జార్జ్​ అన్నారు. కేరళ ప్రజలు భయపడాల్సిన అవసరం లేదని హామీనిచ్చారు.

"ఇప్పటివరకు ఆరు కేసులు వెలుగులోకి వచ్చాయి. 3 రోజులుగా పరీక్షిస్తున్న శాంపిళ్లన్నీ నెగిటివ్​గానే ఉన్నాయి. కంట్రోల్​ రూమ్​ 24 గంటల పాటు పనిచేస్తోంది. 19 బృందాలు.. క్షేత్రస్థాయిలో అద్భుతంగా పనిచేసి, నిపా వైరస్​ సంబంధిత నిబంధనలను కఠినంగా అమలు చేస్తోంది," అని కేరళ ఆరోగ్యశాఖ మంత్రి తెలిపారు.

ఇదీ చూడండి:- Nipah virus in Kerala : అంతకంతకు పెరుగుతున్న 'నిపా' కేసులు.. కేరళలో కొవిడ్​ తరహా పరిస్థితి!

నిపా వైరస్​ నేపథ్యంలో మూడు కేంద్ర బృందాలు (ఐసీఎంఆర్, ఎన్​ఐవీ, ఎపిడెమియోలాజికల్​ ఇన్​స్టిట్యూట్​​) కేరళలో పర్యటిస్తున్నాయి. కాగా.. రాష్ట్ర ప్రభుత్వం చేస్తున్న పనిని కేంద్ర బృందం సైతం ప్రశంసించినట్టు తెలుస్తోంది.

"కేంద్ర బృందాలు అన్ని చర్చల్లో పాల్గొంటాయి. ప్రతి రోజు.. తాజా పరిస్థితులను మా బృందాలు వారికి వివరిస్తాయి," అని వీనా జార్జ్​ స్పష్టం చేశారు.

నిపా వైరస్​ అంటే ఏంటి..?

గబ్బిలాలు, పందుల నుంచి మనిషికి వ్యాపించేదే ఈ నిపా వైరస్​. కొన్నేళ్ల క్రితం ప్రపంచవ్యాప్తంగా కలకలం సృష్టించిన కొవిడ్​ తరహాలోనే ఇదీ ఉంటుంది. తొలుత జంతువుల నుంచి మనుషులకు సోకుతుంది. ఆ తర్వాత.. ఈ వ్యాధి మనిషి నుంచి మనిషికి కూడా వ్యాపిస్తుంది.

ఈ నిపా వైరస్​కు ఇప్పటికీ సరైన చికిత్స లేకపోవడం, వ్యాక్సిన్​ సైతం అందుబాటులో లేకపోవడం ఆందోళనకర విషయం.