NEET : ఇక నుంచి రెండంచెల్లో నీట్​ పరీక్ష! కమిటీ కీలక సిఫార్సులు..

నేషనల్ ఎలిజిబిలిటీ కమ్ ఎంట్రన్స్ టెస్ట్ (నీట్)తో పాటు ఇతర జాతీయ ప్రవేశ పరీక్షల్లో పలు కీలక మార్పులు కనిపించే అవకాశం ఉంది! ఈ మేరకు కే. రాధాకృష్ణన్ కమిటీ ఇటీవల కేంద్ర విద్యా మంత్రిత్వ శాఖకు సమగ్ర నివేదికను సమర్పించింది. నీట్​ని రెండంచెల్లో నిర్వహించడం ఉత్తమం అని రిపోర్టులో ఉందని సమాచారం.

రాధాకృష్ణన్​ కమిటీ ఏంటి?

గత కొన్నేళ్లుగా నీట్​ వివాదాల్లో కొనసాగుతోంది. ఈ ఏడాది పేపర్​ లీక్​తో పరిస్థితులు మరింత ఆందోళనకరంగా మారాయి. ఈ నేపథ్యంలో నీట్​తా పాటు వివిధ జాతీయ పరీక్షల పరిశీలన కోసం కేంద్రం రాధాకృష్ణన్​ కమిటీ వేసింది. ఇస్రో మాజీ చీఫ్ రాధాకృష్ణన్​ నేతృత్వంలోని ఈ ప్యానెల్​లో మొత్తం ఏడుగురు సభ్యులు ఉన్నారు. ఈ కమిటీ తాజాగా తన నివేదికను కేంద్రానికి సమర్పించినట్టు తెలుస్తోంది.

నివేదికలో నీట్​ గురించి ఏముంది?

నివేదికను కేంద్రం ఇంకా విడుదల చేయలేదు. కాగా, పలు విశ్వసనీయ సమాచారం ప్రకారం.. నీట్​ పరీక్షలో కీలక మార్పులు తప్పవు! నీట్​ యూజీ పరీక్ష అపారమైన ఒత్తిడిని గుర్తిస్తూ.. జేఈఈ నిర్మాణాన్ని పోలి ఉండే బహుళ-దశల పరీక్షల వ్యవస్థను సమర్ధిస్తుంది. వైద్య కళాశాలల్లో పరిమిత సీట్ల కోసం దాదాపు 2 మిలియన్ల మంది విద్యార్థులు పోటీ పడుతుండగా, ఈ రెండు అంచెల వ్యవస్థ విద్యార్థులు తమ విద్యార్హతలను మరింత క్షుణ్ణంగా ప్రదర్శించేందుకు వీలు కల్పిస్తుంది! ప్రతిపాదిత మొదటి దశ స్క్రీనింగ్ పరీక్షగా ఉపయోగపడుతుంది. జేఈఈ మెయిన్స్​లో క్వాలిఫై అయితే అడ్వాన్స్​డ్​కి అర్హత పొందినట్టుగానే, నీట్​ మొదటి రౌండ్​లో ఉత్తీర్ణత సాధిస్తే, రెండో రౌండ్​కి వెళతారు. ఈ విధంగా విద్యార్థులను ఫిల్టర్​ చేయడం సులభం అవుతుందని, పరీక్షా కేంద్రాలపై లాజిస్టికల్ భారం కూడా తగ్గుతుందని కమిటీ పేర్కొంది.

పేపర్​ లీక్స్​కి చెక్​..!

పేపర్​ లీక్స్​ సహా ఇతర సమస్యలకు పరిష్కారాన్ని సైతం రాధాకృష్ణన్​ కమిటీ సిఫార్సు చేసింది. ఆన్‌లైన్ పరీక్షకు దశలవారీగా మారాలని కమిటీ సూచించింది. పూర్తి ఆన్‌లైన్ పరీక్ష సాధ్యం కాని సందర్భాల్లో, హైబ్రిడ్ మోడల్‌ను సిఫార్సు చేసింది. ఇక్కడ ప్రశ్న పత్రాలు డిజిటల్‌గా పరీక్షా కేంద్రాలకు ప్రసారం చేయాలని, విద్యార్థులు పేపర్‌పై సమాధానాలను రికార్డ్ చేయాలని పేర్కొంది. ఈ హైబ్రిడ్ విధానం, పరీక్ష ప్రారంభమయ్యే వరకు ప్రశ్నపత్రాలను డిజిటల్‌గా ప్రసారం చేయడం ద్వారా వాటిని నిర్వహించే వ్యక్తుల సంఖ్యను తగ్గించడంలో సహాయపడుతుందని అభిప్రాయపడింది. తద్వారా లీక్‌లను తగ్గిస్తుందని పేర్కొంది.

ఈ మోడల్ ప్రింటింగ్ ప్రెస్, స్ట్రాంగ్-రూమ్ స్టోరేజ్, బహుళ ట్రాన్సిట్ దశల అవసరాన్ని కూడా తొలగిస్తుంది.

అయితే ఇవన్నీ విశ్వసనీయ వర్గాల సమాచారం మాత్రమే! రాధాకృష్ణన్​ కమిటీ సిఫార్సులను కేంద్రం త్వరలోనే అధికారికంగా ప్రకటించే అవకాశం ఉంది.