‘‘నేషనల్ హెరాల్డ్ కేసులో సోనియా, రాహుల్ గాంధీలకు రూ.142 కోట్ల అనుచిత లబ్ధి’’: ఢిల్లీ కోర్టుకు తెలిపిన ఈడీ

నేషనల్ హెరాల్డ్ కేసులో కాంగ్రెస్ సీనియర్ నేతలు సోనియా గాంధీ, రాహుల్ గాంధీలు అవినీతికి పాల్పడినట్లు ప్రాథమిక క ఆధారాలున్నాయని ఢిల్లీ కోర్టుకు ఎన్ ఫోర్స్ మెంట్ డైరెక్టరేట్ తెలిపింది. తల్లీకొడుకులిద్దరూ రూ.142 కోట్ల మేర అనుచిత లబ్ధి పొందారని కోర్టుకు తెలిపింది.

ఈడీ వాదనలు

నేషనల్ హెరాల్డ్ మనీలాండరింగ్ కేసులో కాంగ్రెస్ నేతలు సోనియా, రాహుల్ గాంధీలు రూ.142 కోట్లు పొందారని ఎన్ఫోర్స్మెంట్ డైరెక్టరేట్ తరఫున అదనపు సొలిసిటర్ జనరల్ ఎస్వీ రాజు ఢిల్లీ కోర్టుకు తెలిపారు. ఈ కేసులో సోనియా గాంధీ, రాహుల్ గాంధీ లు 1, 2 నిందితులుగా ఉన్నారు. ఈ కేసులో సమర్పించిన చార్జిషీట్ పై ఈడీ ప్రాథమిక వాదనలు వినిపిస్తోంది. ఈ కేసులో ఇటీవల చార్జిషీట్ దాఖలు చేసిన ఈడీ ప్రస్తుతం ప్రత్యేక న్యాయమూర్తి విశాల్ గోగ్నే ముందు తన ప్రాథమిక వాదనలు వినిపిస్తోంది. గాంధీలు, ఇతర నిందితులపై మనీలాండరింగ్ కేసు నమోదైందని ఏఎస్జీ రాజు తెలిపారు.

సుబ్రమణ్యస్వామి ప్రైవేట్ ఫిర్యాదు

2014 జూన్ 26న బీజేపీ నేత సుబ్రమణ్యస్వామి ప్రైవేట్ ఫిర్యాదు చేసిన తర్వాత మొదలైన సుదీర్ఘ విచారణ అనంతరం కోర్టు ఈ చర్యలు చేపట్టింది. స్వామి ఆరోపణలను మేజిస్ట్రేట్ కోర్టు పరిగణనలోకి తీసుకున్న తర్వాత 2021లో ఈడీ అధికారికంగా దర్యాప్తు ప్రారంభించింది. బుధవారం నాటి విచారణలో న్యాయమూర్తి గోగ్నే ఈ కేసులో కీలక ఫిర్యాదుదారుగా ఉన్న సుబ్రమణ్య స్వామికి చార్జిషీట్ కాపీని అందజేయాలని ఈడీని ఆదేశించారు. మరోవైపు ఈడీ ఆరోపణలకు ప్రతిస్పందనగా తమ వాదనలు వినిపించేందుకు సమయం ఇవ్వాలని సోనియా, రాహుల్ గాంధీల న్యాయ ప్రతినిధులు కోర్టును కోరారు.

మే 2న నోటీసులు

నేషనల్ హెరాల్డ్ మనీ లాండరింగ్ కేసులో కాంగ్రెస్ నేతలు సోనియా గాంధీ, రాహుల్ గాంధీలకు ఢిల్లీ కోర్టు మే 2వ తేదీన నోటీసులు జారీ చేసింది. ఛార్జిషీట్ విచారణ సమయంలో వారి వాదనలు వినిపించే హక్కు ఉందని ప్రత్యేక న్యాయమూర్తి విశాల్ గోగ్నే తెలిపారు. ఏ దశలోనైనా విచారణ జరిపే హక్కు న్యాయమైన విచారణకు జీవం పోస్తుందన్నారు. కాంగ్రెస్ నేతలు సోనియా, రాహుల్ లు యంగ్ ఇండియాలో 38 శాతం వాటాలు కలిగి ఉన్నారు.