దారుణంగా పడిపోయిన రాజ్యసభ ఉత్పాదకత- రెండు వారాల్లో పని చేసింది 11గంటలే!

Parliament Monsoon session: ఈ దఫా పార్లమెంట్​ వర్షాకాల సమావేశాల్లో రాజ్యసభ ఉత్పాదకత దారుణంగా పతనమైంది. ముఖ్యంగా రెండోవారం.. ‘పెద్దల సభ’గా పేరొందిన రాజ్యసభ ఉత్పాదకత 16.49శాతంగా నమోదైంది. మొదటి వారంలో అది 26.90శాతంగా ఉంది. ధరల పెరుగుదల, జీఎస్​టీ, ద్రవ్యోల్బణం వంటి అంశాలపై విపక్షాలు నిరసన చేస్తుండటంతో.. ఈ రెండు వారాల్లో రాజ్యసభ అనేకమార్లు వాయిదా పడింది. అంతేకాకుండా.. రెండు వారాల్లోనే 23మంది ఎంపీలు సస్పెన్షన్​కు గురయ్యారు.

మొత్తం మీద.. పార్లమెంట్​ వర్షాకాల సమావేశాల్లో రాజ్యసభ ఉత్పాదకత 21.58శాతంగా ఉంది. జులై 18న ప్రారంభమైన రాజ్యసభ.. ఇప్పటివరకు 10సార్లు సమావేశమైంది. కానీ రాజ్యసభ పనిచేసింది 11గంటల 8 నిమిషాలు మాత్రమే. షెడ్యూల్​ ప్రకారం.. ఈ రెండు వారాల్లో రాజ్యసభ 51 గంటల 35 నిమిషాలు పనిచేయాల్సి ఉంది. అంటే.. ఇప్పటికే 40గంటల 45 నిమిషాల సమయం వృథా అయిపోయింది.

Rajya Sabha productivity : అంతేకాకుండా.. ఈ దఫా పార్లమెంట్​ వర్షాకాల సమావేశాల్లో.. రాజ్యసభలో ఇప్పటివరకు ఒక్క బిల్లు కూడా పాస్​ అవ్వలేదు. జీరో హవర్​(శున్య గంట) కూడా జరగలేదు. రెండు వారాల్లో.. క్వశ్చన్​ హవర్​ కూడా ఆరు రోజులు జరగలేదు.

విపక్షాల నిరసనలపై రాజ్యసభ ఛైర్మన్​ వెంకయ్య నాయుడు తీవ్ర అసహనాన్ని వ్యక్తం చేశారు. పార్లమెంట్​ ప్రజాస్వామ్య వ్యవస్థను నాశనం చేస్తున్నాయని మండిపడ్డారు. సభ వెల్​లోకి ఎంపీలు దూసుకొస్తుండటాన్ని తప్పుబట్టారు.

అటు లోక్​సభలోనూ ఇవే పరిస్థితులు నెలకొన్నాయి. బీజేపీపై తీవ్రస్థాయిలో నిరసనలు తెలుపుతున్నాయి విపక్షాలు. ఫలితంగా స్పీకర్​.. సభను వాయిదా వేయకతప్పడం లేదు.