వైద్యుడి చెంప చెళ్లుమనిపించిన సీఎం కుమార్తె..!

Mizoram CM daughter : మిజోరాం సీఎం జోరంతంగా కుమార్తె వివాదంలో చిక్కుకున్నారు. ఆమె ఓ వైద్యుడి చెంప చెళ్లుమనిపించడం.. ఆ దృశ్యాలు సామాజిక మాధ్యమాల్లో వైరల్​గా మారడంతో ఆమె చిక్కుల్లో పడ్డారు. ఆమె చేసిన పనికి.. ముఖ్యమంత్రి స్వయంగా క్షమాపణలు చెప్పుకోవాల్సి వచ్చింది.

అపాయింట్​మెంట్​ లేదని..

మిజోరాం రాజధాని ఐజ్వాల్​లోని ఓ క్లీనిక్​కి వెళ్లి డర్మెంటాలజిస్ట్​ను కలిసేందుకు ప్రయత్నించారు జోరంతంగా కుమార్తె మిలారి ఛంగ్తే. కాగా.. అపాయింట్​మెంట్​ లేకపోవడంతో ఆమెను కలిసేందుకు ఆయన నిరాకరించాడు. ఈ ఘటన బుధవారం జరిగినట్టు తెలుస్తోంది.

సీఎం కూతురైనా సరే.. అపాయింట్​మెంట్​ తీసుకోవాల్సిందే అని ఆ వైద్యుడు చెప్పినట్టు సమాచారం. ఈ ఘటనతో తీవ్ర అసంతృప్తి చెందిన మిలారి.. వైద్యుడి వద్దకు నడుచుకుంటూ వెళ్లి.. ఆయన చెంప చెళ్లుమనిపించారు. ఈ దృశ్యాలు స్థానిక సీసీటీవీ కెమెరాకు చిక్కాయి. ఆమెను అడ్డుకునేందుకు పలువురు విఫలయత్నం చేశారు.

సీఎం కుమార్తె వైద్యుడిపై దాడి చేసిన ఘటనను ఐఎంఏ(ఇండియన్​ మెడికల్​ అసోసియేషన్​) తీవ్రంగా పరిగణించింది. శనివారం.. నల్ల బ్యాడ్జీలు వేసుకుని వైద్యులు విధులకు హాజరయ్యారు. సీఎంకు వ్యతిరేకంగా నిరసనలు చేశారు. సామాజిక మాధ్యమాల్లో సైతం.. జోరంతంగా కుటుంబంపై వ్యతిరేకత ఎదురైంది.

ఈ నేపథ్యంలో.. తన కూతురు చేసిన పనికి 78ఏళ్ల జోరంతంగా క్షమాపణలు తెలిపారు. ఈ మేరకు తన ఇన్​స్టాగ్రామ్​ ఖాతాలో ఓ పోస్టు చేశారు. ఆమె ప్రవర్తనను తాను ఏ విధంగానూ అంగీకరించనని స్పష్టం చేశారు.