Mehul Choksi news : భారత్​కు షాక్​.. ఇక మెహుల్​ చోక్సీ అరెస్ట్​ కష్టమే!

Mehul Choksi news : రూ. 13వేల కుంభకోణానికి పాల్పడి దేశం నుంచి పారిపోయిన వజ్రాల వ్యాపారవేత్త మెహుల్​ చోక్సీని పట్టుకోవాలని ప్రయత్నిస్తున్న భారత ప్రభుత్వానికి షాక్​ తగిలింది! మెహుల్​ చోక్సీకి అనుకూలంగా తీర్పునిస్తూ.. ఆయన్ని తమ దేశం నుంచి బహిష్కరించలేమని పేర్కొంది ఆంటిగ్వా- బార్బౌడాలోని ఓ హైకోర్టు. ఇది మెహుల్​ చోక్సీకి భారీ ఊరటనిచ్చే విషయం.

అసలు కోర్టు కేసు ఏంటి?

ఇండియా నుంచి పారిపోయిన మెహుల్​ చోక్సీని తీసుకొచ్చేందుకు ప్రభుత్వం గతకొన్నేళ్లుగా ప్రయత్నిస్తూనే ఉంది. కాగా ఆయన ఆంటిగ్వాలో తలదాచుకుంటున్నట్టు తెలిసింది. కాగా.. 2021 మే 23న అక్కడి పోలీసులు మెహుల్​ చోక్సీని దేశం నుంచి బహిష్కరించేందుకు ప్రయత్నించారు! బలవంతంగా ఆయన్ని బోటులో ఎక్కించి డామినికాకు తరలించినట్టు అప్పట్లో వార్తలు వచ్చాయి. ఈ నేపథ్యంలో ఆంటిగ్వా కోర్టులో కేసు వేశారు మెహుల్​ చోక్సీ. తనపై దాడి జరిగిందని, పోలీసులు తనతో అమానవీయంగా ప్రవర్తించారని, తనకు న్యాయం జరగాలని మహుల్​ చోక్సీ ఫిర్యాదులో పేర్కొన్నారు. ఈ వ్యవహారంపై పూర్తిస్థాయి దర్యాప్తు చేపట్టాల్సిన బాధ్యత.. కేసులో డిఫెండెంట్లుగా ఉన్న ఆంటిగ్వా అటార్నీ జనరల్​, చీఫ్​ ఆఫ్​ పోలీస్​లకు ఉందని వెల్లడించారు.

Mehul Choksi case : ఈ కేసును శుక్రవారం విచారించిన ఆంటిగ్వాలోని హైకోర్టు.. ఆయనకు సానుకూలంగా తీర్పునిచ్చింది. హైకోర్టు తీర్పు లేకుండా.. మెహుల్​ చోక్సీని దేశం నుంచి తొలగించకూడదని (బహిష్కరించకూడదని) స్పష్టం చేసింది. ఈ వ్యవహారంపై విచారణ కొనసాగుతుందని స్పష్టం చేసింది. మెహుల్​ చోక్సీ ఫిర్యాదు తప్పని నిరూపించుకోవాలి పోలీసులకు పేర్కొంది.

కాగా.. తమ చర్యలు చట్టాల పరిధిలోనే ఉన్నాయని ప్రతివాదులు కోర్టులో వాదించారు. మెహుల్​ చోక్సీ ఫిర్యాదుల్లో అర్థం లేదని, విసుగుపుట్టించే విధంగా ఉన్నాయని పేర్కొన్నారు. ఇవి కోర్టుల దుర్వినియోగానికి కారణమవుతాయని వాదించారు.

'మెహుల్​ చోక్సీని ఎలాగైనా రప్పిస్తాము..'

Mehul Choksi arrest : పంజాబ్​ నేషనల్​ బ్యాంక్​లో రూ. 13వేల కోట్ల మోసానికి పాల్పడ్డారు మెహుల్​ చోక్సీ. అనంతరం ఇండియా నుంచి పారిపోయారు. మోసాలు చేసి దేశంలో నుంచి పారిపోయిన వారిని పట్టుకునేందుకు తాము కట్టుబడి ఉన్నట్టు సీబీఐ చెబుతోంది. 2018లో మెహుల్​ చోక్సీపై తొలిసారిగా సీబీఐ కేసు వేసింది. 2022లో ఆయనపై మరో ఐదు క్రిమినల్​ కేసులు దాఖలు చేసింది. ఫలితంగా మెహుల్​ చోక్సీ ఓ వాంటెడ్​ క్రిమినల్​గా మారారు.

తాజా పరిణామాలతో మెహుల్​ చోక్సీని భారత్​కు రప్పించాలన్న ప్రభుత్వ ప్రయత్నాలు మరింత కష్టతరంగా మారనున్నట్టు తెలుస్తోంది. దీనిపై భారత ప్రభుత్వం స్పందించాల్సి ఉంది.