Matthew Perry death : ‘ఫ్రెండ్స్​’ యాక్టర్​ మాథ్యూ పెర్రీని వైద్యులు- సహాయకుడే చంపేశారా?

ప్రముఖ అమెరికన్​ టీవీ సిట్​కామ్​ సిరీస్​ 'ఫ్రెండ్స్​' యాక్టర్​ మాథ్యూ పెర్రీ మరణంపై తాజాగా పలు సంచలన విషయాలు బయటపడ్డాయి. మాథ్యూ పెర్రీకి ఉన్న డ్రగ్​ అడిక్షన్​తో ‘ప్రయోజనం’ పొందేందుకు కొందరు ప్రయత్నించారని అధికారులు తాజాగా చెప్పారు. ఈ మేరకు ఇద్దరు వైద్యులు, ఒక సహాయకుడితో సహా మొత్తం ఐదుగురిని పోలీసులు అరెస్ట్​ చేశారు.

మాథ్యూ పెర్రీ మరణం చుట్టూ వివాదం..

ఎన్నో ఏళ్లుగా డ్రగ్​ అడిక్షన్​తో సతమతమవుతూ, లాస్​ ఏంజెల్స్​లోని తన నివాసంలో మాథ్యూ పెర్రీ గతేడాది అనుమానాస్పద రీతిలో మరణించారు. ఆయన మృతదేహం బాత్​ టబ్​లో మునిగిపోయి కనిపించింది. ఈ వార్త ప్రపంచ వినోద రంగం, ఫ్రెండ్స్​ సిరీస్​ అభిమానులను దిగ్బ్రాంతికి గురిచేసింది. కంట్రోల్డ్​ డ్రగ్​ కేటమైన్​ ప్రభావం కారణంగా ఆయన ప్రాణాలు కోల్పోయారని పోస్టుమార్టంలో తేలింది. దీనిపై అధికారులు ఇంతకాలం విచారణ చేపట్టి, ఐదుగురిని అరెస్ట్​ చేశారు.

డ్రగ్స్ నుంచి బయటపడేందుకు తన వైద్యులు సాయం చేయకపోవడంతో కొత్తగా ఇద్దరు వైద్యులతో ఈ ఫ్రెండ్స్​ యాక్టర్​కి పరిచయమైంది. చికిత్సలో భాగంగా వైద్యులు మాథ్యూ పెర్రీకి కేటమైన్​ని సిఫార్సు చేశారు. పెర్రీ దానికి కూడా బానిసయ్యారు! ఈ ఇద్దరు వైద్యుల ద్వారా 'కేటమైన్​ క్వీన్​'గా పిలిచే 41ఏళ్ల జస్వీన్​ సంఘతో మాథ్యూకి పరిచయం ఏర్పడింది. డిప్రెషన్​తో ఉన్న తనకు సాయం చేయాలని వారిని పెర్రీ అభ్యర్థించారు. కానీ ఆయన పరిస్థితిని వాళ్లు పూర్తిగా వినియోగించుకుని, లబ్ధిపొందాలని చూశారు.

"మాథ్యూ పెర్రీ డ్రగ్​ అడిక్షన్​ని ఈ ఐదుగురు తమకు ప్రయోజనకరంగా మార్చుకున్నారు. చేస్తున్నది తప్పు అని తెలిసినా, కొన్ని పనులు చేశారు. తాము చేస్తున్నది మాథ్యూ పెర్రీ జీవితానికి రిస్క్​ అని తెలిసినా వారు ఆగలేదు," అని యూఎస్​ అటార్నీ మార్టిన్​ ఎస్ట్రాడా తెలిపారు.

"ఈ మోరాన్​ (మూర్ఖుడు) ఎంత వరకు డబ్బులు ఇవ్వగలడో చూద్దాము," అని ఇద్దరు వైద్యుల్లో ఒకరు పంపిన మెసేజ్​లు కీలక ఆధారంగా మారాయి. అంతేకాదు.. ఓ సందర్భంలో 12 డాలర్లు విలువ చేసే కేటమైన్​ వెయిల్​ని మాథ్యూ పెర్రీకి 2000 డాలర్లకు విక్రయించినట్టు ఆధారాలు బయటపడ్డాయి.

అరెస్ట్​ అయిన ఐదుగురిలో ఒక డాక్టర్​ సాల్వేడార్​ ప్లాసెన్షియాకి 120ఏళ్లు జైలు శిక్ష పడే అవకాశం ఉందని అటార్నీ వివరించారు.

సహాయకుడే మోసం చేశాడు..!

కెన్నెత్​ ఇవామస అనే వ్యక్తి మాథ్యూ పెర్రీ దగ్గర దాదాపు 20ఏళ్ల పాటు సహాయకుడిగా పనిచేస్తున్నాడు. బాత్​టబ్​లో పడి, మాథ్యూ మరణించిన రోజున ఇతనే తొలుత పోలీసులకు సమాచారం ఇచ్చాడు. అయితే కెన్నెత్​ని విచారించగా తాను తప్పు చేసినట్టు కెన్నెత్​ ఒప్పుకున్నాడని సమాచారం. కేటమైన్​ క్వీన్​ నుంచి ఎరిక్​ ఫ్లెమింగ్​ అనే డ్రగ్​ డీలర్​ ద్వారా కేటమైన్​ని అధిక మొత్తంలో కొని మాథ్యూ పెర్రీకి ఇచ్చినట్టు పోలీసులకు అతను చెప్పాడని సమాచారం.

తాజా ఆరోపణల ప్రకారం.. ఎలాంటి వైద్య కారణాలు లేకుండా సాల్వెడార్​ అనే వైద్యుడు కెన్నెత్​ ద్వారా మాథ్యూ పెర్రీకి కనీసం 7సార్లు కేటమైన్​ని ఇచ్చాడు.

థ్యూ పెర్రీ పోస్టుమార్ట్​ నివేదిక ప్రకారం.. ఆయన కడుపులో కేటమైన్​ తక్కువ మోతాదులోనే కనిపించింది. కానీ ఆయన రక్తంలో చాలా పర్సెంట్​ కేటమైన్​ ఉంది.

ఫ్రెండ్స్​లో ఐకానిక్​ ‘ఛాండ్లర్​’ రోల్​ ప్లే చేసిన మాథ్యూ పెర్రీ.. వినోద ప్రపంచంలో తనకంటూ ప్రత్యేక గుర్తింపును సంపాదించుకున్నారు. మరణం నాటికి ఆయన వయస్సు 54ఏళ్లు మాత్రమే!