మెట్రోలో మహిళల వీడియోలు చిత్రీకరించి రీల్స్ పోస్ట్ చేసిన వ్యక్తి అరెస్ట్

బెంగళూరు మెట్రోలో మహిళల అనుమతి లేకుండా వారి ఫోటోలు మరియు వీడియోలను చిత్రీకరించి ఇన్‌స్టాగ్రామ్ ఖాతాలో పోస్ట్ చేస్తున్న 27 ఏళ్ల వ్యక్తిని బెంగళూరు పోలీసులు అరెస్ట్ చేశారు. నిందితుడిని హావేరి జిల్లాకు చెందిన దిగంత్‌గా గుర్తించారు. బెంగళూరు పీణ్య ప్రాంతంలో శుక్రవారం అతన్ని అరెస్ట్ చేశారు. నిందితుడు @metro_chicks అనే ఖాతాలో మహిళల ఆక్షేపణీయమైన, వ్యక్తిగత గోప్యతకు భంగం కలిగించే విధంగా ఫోటోలు, వీడియోలను పోస్ట్ చేస్తున్నాడు. ఎఫ్‌ఐఆర్ దాఖలైన రెండు రోజుల తర్వాత అతన్ని అరెస్ట్ చేశారు.

డిప్యూటీ పోలీస్ కమిషనర్ (దక్షిణ) లోకేష్ బి జగలాసర్ ప్రాథమిక విచారణలో ఆ వ్యక్తి ఒక ప్రైవేట్ సంస్థలో అకౌంటింగ్ విభాగంలో పనిచేస్తున్నట్లు తెలిసింది. అతను రోజువారీ మెట్రో ప్రయాణ సమయంలో, పనికి వెళ్ళేటప్పుడు మహిళల చిత్రాలు, వీడియోలను చిత్రీకరించి, తరువాత వాటిని ఇన్‌స్టాగ్రామ్‌లో పోస్ట్ చేస్తున్నాడని తెలిపారు.

పోలీసులు నిందితుడిని విచారిస్తున్నారు. దిగంత్ ఒంటరిగా ఈ పనికి పాల్పడ్డాడా లేదా భాగస్వాములు ఉన్నారా అనే కోణంలో విచారిస్తున్నారు. ఏ ఉద్దేశంతో ఈ పనులు చేశాడు? వీడియోలను ఇతర చోట్ల పంచుకున్నాడా లేదా డబ్బు సంపాదించే ఉద్దేశంతో చేశాడా అనే విషయాలను పోలీసులు విచారిస్తున్నారు.

ఫిర్యాదు దాఖలైన విషయం తెలిసిన వెంటనే వీడియోలు, ఇన్‌స్టా ఖాతాను డిలీట్ చేశాడు. కనీసం 14 వీడియోలను పోస్ట్ చేశాడు. మెట్రో రైళ్లు లేదా స్టేషన్ ప్లాట్‌ఫామ్‌లలో మహిళల క్లోజ్-అప్ వీడియోలు, ఫోటోలను వారికి తెలియకుండా చిత్రీకరించాడు. 'బెంగళూరు సుందర అమ్మాయిలు' అనే ఎబ్బెట్టు శీర్షికలతో సోషల్ మీడియాలో పోస్ట్ చేసిన ఈ వీడియోలను గమనించిన ప్రజలు మెట్రో, బెంగళూరు పోలీసులను ట్యాగ్ చేసి కఠిన చర్యలు తీసుకోవాలని డిమాండ్ చేశారు.