Los Angeles wildfire: లాస్ ఏంజిల్స్ లో కార్చిచ్చు; 3 వేల ఎకరాలు దగ్ధం; హాలీవుడ్ స్టార్స్ ఇళ్లు కూడా..

Los Angeles wildfire: అమెరికాలోని లాస్ ఏంజిల్స్ శివారులో ప్రమాదకరమైన కార్చిచ్చు చెలరేగింది. ఈ కార్చిచ్చు కారణంగా 3 వేల ఎకరాల్లో ఇళ్లు నాశనమయ్యాయి. సుమారు 30 వేల మంది ప్రజలు నిరాశ్రయులయ్యారు. లాస్ ఏంజిల్స్ శివారులోని పసిఫిక్ పాలిసేడ్స్ ప్రాంతంలో ఈ కార్చిచ్చు సంభవించింది. ఈ కార్చిచ్చుతో ఇప్పటివరకు దాదాపు 3,000 ఎకరాల (1,200 హెక్టార్లు) ప్రాంతం నాశనం అయింది.

కార్చిచ్చును ఆర్పే ప్రయత్నాలు

అమెరికాలోని (usa news telugu) లాస్ ఏంజిల్స్ శివారులో చెలరేగిన కార్చిచ్చు మంటలు సమీప ప్రాంతాలకు వేగంగా వ్యాపిస్తున్నాయి. హరికేన్ గాలులు పరిస్థితిని మరింత దిగజార్చాయని, మంటలు చెలరేగుతుండటంతో స్థానికులు తీవ్ర భయాందోళనలకు గురవుతున్నారు. కార్చిచ్చును ఆర్పేందుకు చాపర్లతో నీటిని వెదజల్లుతున్నారు. మరోవైపు, బాధితులను సురక్షిత ప్రాంతాలకు తరలిస్తున్నారు. అయితే, సహాయ చర్యలపై బాధితులు అసంతృప్తి వ్యక్తం చేస్తున్నారు.

బాధితుల్లో సెలబ్రిటీలు

ప్రస్తుతం కార్చిచ్చు చుట్టుముట్టిన ప్రాంతంలో పెద్ద ఎత్తున సెలబ్రిటీలు (celebrities) , హాలీవుడ్ ప్రముఖులు నివాసం ఉంటున్నారు. శాంటా మోనికా మౌంటెయిన్స్ లో మిలియన్ డాలర్ల విలువైన విల్లాలతో నిండిన ప్రాంతాన్ని మంటలు మరింత చుట్టుముట్టాయి. ఆ ప్రాంతంలో భీకర గాలుల కారణంగా మంటలు వేగంగా వ్యాప్తి చెందుతున్నాయి. బిఎమ్ డబ్ల్యూ (BMW), టెస్లా, మెర్సిడెస్ వంటి లగ్జరీ కార్లు కార్చిచ్చుతో దగ్ధమయ్యాయి. అక్కడ అగ్నిమాపక సిబ్బంది సహాయ చర్యలు ముమ్మరంగా కొనసాగిస్తున్నారు. బుల్డోజర్లను ఉపయోగించి వాహనాలను దూరంగా తరలించారు.

ప్రాణ నష్టం లేదు

ఈ కార్చిచ్చు కారణంగా ఇప్పటివరకు ఎటువంటి మరణాలు నమోదు కాలేదు. స్వల్ప గాయాలు మినహాయిస్తే, తీవ్ర స్థాయిలో ఎవరూ క్షతగాత్రులు కాలేదు. 30,000 మందికి పైగా ప్రజలను ఈ ప్రాంతాన్ని ఖాళీ చేయాలని ఆదేశించినట్లు లాస్ ఏంజిల్స్ ఫైర్ డిపార్ట్మెంట్ చీఫ్ క్రిస్టిన్ క్రౌలీ తెలిపారు.

లాస్ ఏంజిల్స్ అగ్నిప్రమాదం: టాప్ అప్డేట్స్

• దక్షిణ కాలిఫోర్నియాను అతలాకుతలం చేసిన భీకర గాలుల మధ్య లాస్ ఏంజిల్స్ లో కార్చిచ్చు చెలరేగింది.
• అర్ధరాత్రి మంటలు చెలరేగి వేగంగా వ్యాపించాయి.
• ఈ ప్రాంతంలో సీజనల్ శాంటా అనా గాలులు వీస్తుండటంతో ఈ అగ్నిప్రమాదం సంభవించిందని, ఈ సీజన్ లో అత్యంత తీవ్రమైన గాలులు వీస్తాయని, గంటకు 100 మైళ్ల (160 కిలోమీటర్లు) వేగంతో గాలులు వీస్తాయని వాతావరణ నిపుణులు తెలిపారు.
• పశ్చిమ లాస్ ఏంజిల్స్ లోని పసిఫిక్ పాలిసేడ్స్ పరిసరాల్లో దాదాపు 2 చదరపు మైళ్ల ప్రాంతాన్ని మంటలు దగ్ధం చేశాయి.
• వందలాది మంది అగ్నిమాపక సిబ్బంది సహాయ చర్యల్లో పాల్గొంటున్నారు.
• కార్చిచ్చు కారణంగా లాస్ ఏంజిల్స్ నగరంలో అత్యవసర పరిస్థితిని ప్రకటించినట్లు తాత్కాలిక మేయర్, లాస్ ఏంజిల్స్ సిటీ కౌన్సిల్ అధ్యక్షుడు మార్క్వీస్ హారిస్-డాసన్ ప్రకటించారు.
• మంగళవారం సాయంత్రానికి ఈదురుగాలుల ధాటికి 28,300 ఇళ్లకు విద్యుత్ సరఫరా నిలిచిపోయిందని మేయర్ కార్యాలయం తెలిపింది.
• ప్రస్తుతం లాస్ ఏంజిల్స్ పర్యటనలో ఉన్న అమెరికా అధ్యక్షుడు జో బైడెన్ (joe biden) కు ఈ కార్చిచ్చు గురించి వివరించినట్లు వైట్ హౌస్ తెలిపింది.