Lokesh Kanagaraj : లోకేశ్​ కనగరాజ్​పై కోర్టులో పిటిషన్​- డైరక్టర్​కు మానసిక పరీక్షలు చేయాలంటూ..!

Lokesh Kanagaraj latest news : ప్రముఖ డైరక్టర్​ లోకేశ్​ కనగరాజ్​కు వ్యతిరేకంగా మధురై కోర్టులో ఓ పిటిషన్​ దాఖలైంది. డైరక్టర్​పై మానసిక పరీక్షలు నిర్వహించాలని పిటషనర్​ పేర్కొన్నారు. అసలు విషయం ఏంటంటే..

ఇదీ జరిగింది..

ఖైదీ, విక్రమ్​, లియో సినిమాలతో మంచి పేరు సంపాదించుకున్నారు తమిళ డైరక్టర్​ లోకేశ్​ కనగరాజ్​. ఆయన దర్శకత్వం వహించిన లియో సినిమా.. 2023 బిగ్గెస్ట్​ హిట్స్​లో ఒకటిగా నిలిచింది. అయితే.. రాజ మురుగన్​ అనే వ్యక్తి.. లోకేశ్​ కనగరాజ్​కు వ్యతిరేకంగా పిటిషన్​ వేశారు. తన సినిమాలతో లోకేశ్​ హింసను ప్రేరేపిస్తున్నారని ఆయన ఆరోపించారు. లోకేశ్​పై వెంటనే సైకలాజికల్​ పరీక్షలు జరపాలని పిటిషన్​లో పేర్కొన్నారు.

Petition on Lokesh Kanagaraj : "లియోతో పాటు అనేక సినిమాల్లో లోకేశ్​ కనగరాజ్​ హింసను ప్రేరేపిస్తున్నారు. ఇది సామాజానికి మంచి విషయం కాదు. అక్రమ కార్యకలాపాలు సాగించే వారిని ఫేమస్​ చేసి చూపిస్తున్నారు. పోలీసుల మద్దతుతోనే నేరాలు జరుగుతున్నట్టు చిత్రీకరిస్తున్నారు," అని పిటిషన్​లో వివరించారు రాజ మురుగన్​.

లోకేశ్​ కనగరాజ్ వంటి దర్శకులు​ తీసే సినిమాలపై సెన్సార్​ బోర్డు ప్రత్యేక దృష్టిసారించాలని విజ్ఞప్తి చేశారు రాజ మురుగన్​. లోకేశ్​ని సైకలాజికల్​గా ఇవాల్యుయేట్​ చేయాలని కోరారు. ఆయనపై క్రిమినల్​ చర్యలు తీసుకోవాలని డిమాండ్​ చేశారు.

Lokesh Kanagaraj Madhurai court : ఈ వ్యవహారంపై మధురై కోర్టుకు చెందిన జస్టిస్​ కృష్ణ కుమార్​, జస్టిస్​ విజయ్​ కుమార్​లతో కూడిన ధర్మాసనం విచారణ చేపట్టింది. కాగా.. పిటిషన్​ తరఫు న్యాయవాది రాకపోవడంతో.. విచారణను వాయిదా వేసింది.

కాగా.. తనపై మధురై కోర్టులో దాఖలైన పిటిషన్​ గురించి లోకేశ్​ కనగరాజ్​ ఇంకా స్పందించలేదు. దీనిపై ఆయన ఏ విధంగా మాట్లాడతారు? అనేది ఆసక్తిగా మారింది.

లోకేశ్​ కనగరాజ్​ లియో..

Lokesh Kanagaraj Leo movie : ఎల్​సీయూ (లోకేశ్​ సినిమాటిక్​ యూనివర్స్​)గా మంచి గుర్తింపు తెచ్చుకున్నారు లోకేశ్​ కనగరాజ్​. ఆయన సినిమాల కోసం ప్రేక్షకులు ఎంతగానో ఎదురుచూస్తూ ఉంటారు. డ్రగ్స్​, మర్డర్​, యాక్షన్​, థ్రిల్లర్​ చుట్టూ సాగే కథలపై ఆయన ఫోకస్​ చేస్తారు. ప్రముఖ నటుడు విజయ్​తో ఆయన తీసిన లియో సినిమా అక్టోబర్​లో విడుదలైంది. సినిమాకు మిశ్రమ స్పందన లభించినప్పటికీ.. వసూళ్ల పరంగా దూసుకెళ్లింది. ఈ సినిమా త్రిష హిరోయిన్​గా నటించగా.. అనిరుధ్​ రవించందర్​ మ్యూజిక్​ని అందించాడు.

వాస్తవానికి ఇలాంటి విషయాలు ఇటీవలి కాలంలో ఎక్కువగానే వినిపిస్తున్నాయి. సందీప్​ రెడ్డీ వంగా తీసిన యానిమల్​ సినిమాలోని కొన్ని దృశ్యాలపై విమర్శలు ఎదురయ్యాయి. హింసను గ్లోరిఫై చేస్తున్నారంటూ చాలా మంది విమర్శించారు.