LIC share price : ఎల్ఐసీతో మదుపర్లకు రూ. 1.5లక్షల కోట్ల నష్టం!
LIC share price : లిస్టింగ్ డే నుంచి ఎల్ఐసీ షేర్లు పతనమవుతూనే ఉన్నాయి. ఈ పతనం ఇంకా కొనసాగుతుందని మార్కెట్ విశ్లేషకులు భావిస్తున్నారు.
LIC share price : ఎన్నో అంచనాలతో మార్కెట్లోకి అడుగుపెట్టిన ఎల్ఐసీ.. అందుకు తగ్గట్టుగా రాణించలేకపోతోందా? ఈ స్టాక్.. మదుపర్లకు ఓ పీడకలగా మిగిలిపోనుందా? ఎల్ఐసీ స్టాక్ ప్రస్తుత పరిస్థితిని చూస్తుంటే ఈ భయాలు నిజమయ్యేడట్టే కనిపిస్తోంది. ఎల్ఐసీలో పెట్టుబడులు పెట్టిన మదుపర్లకు.. లిస్టింగ్ డే నాటి నుంచి ఇప్పటివరకు రూ. 1.49లక్షల కోట్ల నష్టం వాటిల్లింది!
ట్రెండింగ్ వార్తలు
దాదాపు ఏడాది కాలం పాటు వాయిదా పడిన ఎల్ఐసీ ఐపీఓ.. రూ. 949 ప్రైజ్ బ్యాండ్తో మార్కెట్లోకి వచ్చింది. కానీ దాని లిస్టింగ్ మాత్రం రూ. 872 వద్ద జరిగింది. అప్పటికే మదుపర్లకు 8శాతం నష్టం కలిగింది. ఇక అప్పటి నుంచి ఇప్పటివరకు ఎల్ఐసీ షేర్లు.. రూ. 949ను ఒక్కసారి కూడా తాకలేదు. అంతేకాకుండా అప్పటి నుంచి ఇప్పటివరకు భారీగానే పడింది. ప్రస్తుతం ఎల్ఐసీ స్టాక్ రూ. 712 వద్ద ట్రేడ్ అవుతోంది.
ఈ పరిణామాలతో.. ఎల్ఐసీ మార్కెట్ క్యాపిటల్ రూ. 6లక్షల కోట్ల నుంచి సుమారు రూ. 4.51లక్షల కోట్లకు దిగొచ్చింది. ఫలితంగా మదుపర్లకు దాదాపు రూ. 1.5లక్షల కోట్ల నష్టాన్ని కలిగించింది ఎల్ఐసీ.
ఇంకా పడుతుందా?
ఎల్ఐసీ యాంకర్ ఇన్వెస్టర్ల లాకిన్ పీరియడ్ త్వరలో ముగియనుంది. ఈ లెక్కన చూసుకుంటే.. ఎల్ఐసీ షేర్లు మరింత పడతాయని మార్కెట్ విశ్లేషకులు భావిస్తున్నారు. పైగా.. ప్రస్తుత మార్కెట్ పరిస్థితులు ప్రతికూలంగా ఉన్న విషయాన్ని గుర్తుచేస్తున్నారు. ఎఫ్ఐఐలు ఇంకా అమ్మకాలవైపే ఉన్నారని, ఎల్ఐసీ షేర్లను కొనేందుకు వారు ఆసక్తి చూపించడం లేదని చెబుతున్నారు. మరోవైపు ఎల్ఐసీ క్యూ4 ఫలితాలు కూడా అంత ప్రభావితంగా లేవని అంటున్నారు. మరో 2-3 త్రైమాసిక ఫలితాలు కూడా ఇదే విధంగా ఉండొచ్చని, అది ఎల్ఐసీ షేర్ల మీద ప్రతికూల ప్రభావం చూపించవచ్చని అంచనా వేస్తున్నారు.
"ఎల్ఐసీ ఐపీఓ సమయంలో రిటైలర్లే ఎక్కువమంది పాల్గొన్నారు. అందువల్ల ఇప్పుడు వాళ్లు కూడా షేర్లు కొనుగోలు చేయడం లేదు. చార్ట్ను పరిశీలిస్తే ఎల్ఐసీ బలహీనంగానే కనిపిస్తోంది. రూ. 680 వరకు కూడా పడే అవకాశం ఉంది," అని ఐఐఎఫ్ఎల్ సెక్యూరిటీస్కు చెందిన అనూజ్ గుప్తా వెల్లడించారు.
(గమనిక: ఇవి నిపుణుల అభిప్రాయాలు మాత్రమే. హిందుస్థాన్ టైమ్స్ తెలుగు ఎలాంటి సంబంధం లేదు. ఏదైనా పెట్టుబడి చేసే ముందు మీ ఫైనాన్షియల్ ఎడ్వైజర్లను సంప్రదించడం శ్రేయస్కరం)
సంబంధిత కథనం
టాపిక్