Kedarnath Yatra Landslide : కేదార్​నాథ్​ యాత్ర మార్గంలో విరిగిపడిన కొండచరియలు- ముగ్గురు మృతి..

ఉత్తరాఖండ్​లోని కేదార్​నాథ్​లో విషాదకర ఘటన చోటుచేసుకుంది. కేదార్​నాథ్​ యాత్ర మార్గంలోని చిద్వాసాలో ఆదివారం ఉదయం కొండచరియలు విరిగిపడ్డాయి. ఈ ఘటనలో ముగ్గురు ప్రాణాలు కోల్పోయారు. మరో ఎనిమిది మంది గాయపడ్డారు. సంఘటనా స్థలానికి చేరుకున్న రాష్ట్ర విపత్తు ప్రతిస్పందన (ఎస్​డీఆర్​ఎఫ్) బృందం క్షతగాత్రులను ఆసుపత్రికి తరలించింది.

మూడు మృతదేహాలను జిల్లా పోలీసులకు అప్పగించామని, క్షతగాత్రులను చికిత్స కోసం ఆసుపత్రికి తరలించామని అధికారులు తెలిపారు. కేదార్ నాథ్ ధామ్​ను దర్శించుకునేందుకు భక్తులు గౌరీకుండ్ నుంచి బయలుదేరిన సమయంలో ఈ ఘటన చోటుచేసుకుంది.

ఈ ప్రమాదంపై ఉత్తరాఖండ్ సీఎం పుష్కర్ సింగ్ ధామీ తీవ్ర దిగ్భ్రాంతి వ్యక్తం చేశారు. “కేదార్​నాథ్ యాత్ర మార్గం సమీపంలోని కొండపై నుంచి శిథిలాలు, భారీ రాళ్లు పడటంతో కొందరు యాత్రికులు గాయపడ్డారన్న వార్త చాలా బాధాకరం,” అని ఎక్స్ (గతంలో ట్విట్టర్)లో ధామి పేర్కొన్నారు.

ఘటనాస్థలంలో సహాయక చర్యలు కొనసాగుతున్నాయని, ఈ విషయంలో అధికారులతో నిరంతరం సంప్రదింపులు జరుపుతున్నానని ధామి చెప్పారు. ప్రమాదంలో గాయపడిన వారికి వెంటనే మెరుగైన వైద్యం అందించాలని ఆదేశాలు జారీ చేసినట్లు తెలిపారు.

గౌరీకుండ్-కేదార్​నాథ్​ ట్రెక్కింగ్ మార్గంలోని చిద్వాసా ప్రాంతానికి సమీపంలో ఉదయం 7:30 గంటలకు ఈ ప్రమాదం జరిగిందని రుద్రప్రయాగ్ జిల్లా విపత్తు నిర్వహణ అధికారి నందన్ సింగ్ రాజ్వర్ తెలిపారు. శిథిలాలు, భారీ రాళ్లు కొండపై నుంచి పడ్డాయి అని వెల్లడించారు.

ఉత్తరాఖండ్​లో గత కొన్ని రోజులుగా వర్షాలు కురుస్తున్నాయి. ఫలితంగా అనేక ప్రాంతాల్లో కొండచరియలు విరిగి పడిన సంఘటనలు వెలుగులోకి వస్తున్నాయి. అనేక ప్రాంతాల్లో రహదారులు దెబ్బతిన్నాయి. వాటిని పునరుద్ధరించేందుకు అధికారులు చర్యలు చేపట్టారు.

చార్​ధామ్​ యాత్ర..

చార్​ధామ్​ యాత్రలో ఈ కేదార్​నాథ్​ ఆలయం ఒక భాగం. ఈ ఏడాది మే 10న చార్​ధామ్​ యాత్ర ప్రారంభమైంది. యాత్రలో భాగంగా భక్తులు యమునోత్రి, గంగోత్రి, కేదార్​నాథ్​ బద్రినాథ్​లను సందర్శించుకుంటారు. కానీ నైరుతి రుతుపవనాల కారణంగా జూన్​ చివరి వారంలో ఉత్తరాఖండ్​లో వర్షాలు కురుస్తాయి. ఫలితంగా వరదలు, కొండచరియలు విరిగి పడే ఘటనలు వార్తల్లో నిలుస్తుంటాయి. ఫలితంగా ప్రజలు చాలా ఇబ్బందులు పడాల్సి వస్తుంది.