జపాన్ మరో అద్భుతం- పిడుగును ‘కంట్రోల్’ చేసే టెక్నాలజీ ఇది..
జపాన్ మరో అద్భుతం చేసింది! తమ దేశంలో సమస్యగా మారిన ‘పిడుగు’లను కంట్రోల్ చేసి, దారి మళ్లించే విధంగా ఒక ప్రత్యేక టెక్నాలజీని రూపొందించింది.
'పిడుగు పడి ఏడుగురు మృతి', 'పిడుగుపాటుకు ఆరుగురు బలి' అని నిత్యం వార్తలు వింటూనే ఉంటాము. మరీ ముఖ్యంగా వర్షా కాలంలో పిడుగు అనేది ఎప్పుడు, ఎక్కడ, ఎలా పడుతుందో అంచనా వేయడం ఆ నిమిషంలో కష్టం కాబట్టి, పరిస్థితులు ఇంకా తీవ్రంగా ఉంటున్నాయి. కానీ ఇప్పుడు ఈ సమస్యకు జపాన్ శాస్త్రవేత్తలు పరిష్కారాన్ని కనుగొన్నారు! పిడుగును కంట్రోల్ చేసే విధంగా ఒక టెక్నాలజీని రూపొందించారు. ఈ టెక్నాలజీ ద్వారా మెరుపును కంట్రోల్ చేసి, దాన్ని సురక్షిత ప్రాంతంలో పడే విధంగా దారి మళ్లిస్తారు. పిడుగుపాటు ప్రమాదాల్లో మరణాలను తగ్గించేందుకే ఈ టెక్నాలజీని తీసుకొచ్చినట్టు జపాన్ చెబుతోంది. అసలేంటి ఈ టెక్నాలజీ?
పిడుగును కంట్రోల్ చేసే టెక్నాలజీ..
జపాన్ రూపొందించిన ఈ టెక్నాలజీ.. ప్రపంచంలోనే తొలి వాతావరణ కంట్రోల్ వ్యవస్థగా గుర్తింపు తెచ్చుకోబోతోంది. మెరుపులను ఇది పూర్తిస్థాయిలో కంట్రోల్ చేస్తుందని శాస్త్రవేత్తలు చెబుతున్నారు. పిడుగును కంట్రోల్ చేసేందుకు ఈ స్పెషల్ డ్రోన్ టెక్నాలజీని జపాన్ రూపొందించింది. ఇందులో భాగంగా ఒక డ్రోన్ మేఘాల్లోకి వెళ్లి, వాటిల్లో ఏర్పడే మెరుపులను కంట్రోల్ చేస్తుంది. అనంతరం సరక్షిత ప్రాంతాల్లో అవి పడే విధంగా ఈ టెక్నాలజీ చర్యలు చేపడుతుంది.
మెరుపుల వల్ల జపాన్కు ప్రతియేటా 113.66 బిలియన్ల నష్టం వాటిల్లుతోందని అంచనాలు ఉన్నాయి. వాటిని తగ్గించడంతో పాటు ప్రజా భద్రత దృష్ట్యా జపాన్కి చెందిన నిప్పాన్ టెలిగ్రాఫ్ అండ్ టెలిఫోన్ కార్పొరేషన్ ఈ ప్రాజెక్ట్ని డెవలప్ చేసింది. రెండు నెలల పాటు ఈ టెక్నాలజీని పరీక్షించారు. గతేడాది డిసెంబర్లో హమద అనే నగరంలో ఈ టెక్నాలజీ టెస్టింగ్ మొదలైంది. ఒక డ్రోన్ని ఎగిరేసి, మేఘాల్లోకి తీసుకెళ్లారు. మేఘాల్లోకి వెళ్లిన తర్వాత ఈ డ్రోన్ ఒక ఎలక్ట్రికల్ ఫీల్డ్ని డిటెక్ట్ చేసింది. ఆ తర్వాత డ్రోన్కి ఉన్న ఒక స్విచ్ని కింద ఉన్న శాస్త్రవేత్తలు యాక్టివేట్ చేశారు. ఆ తర్వాత, పిడుగును కంట్రోల్ చేసినట్టు, దాని దిశను మార్చి, సురక్షిత ప్రాంతంలో పడేసినట్టు జపాన్ అధికారులు వెల్లడించారు.
ఈ టెక్నాలజీలో ఉపయోగించిన డ్రోన్ని ప్రత్యేకంగా తయారు చేశారు. ఒక ప్రత్యేక లోహంతో తయారు చేసిన కేజ్ (బోను)లో దానిని పెట్టారు. ఈ బోను.. మెరుపులను తట్టుకోగలదు. డ్రోన్లోని కొన్ని సున్నితమైన ప్రాంతాలకు మాత్రమే మెరుపు చేరుకోగలుగే విధంగా జాగ్రత్తలు తీసుకున్నారు.
జపాన్లోని నగరాలు, భారీ భవనాలు, ఫ్యాక్టరీలు, ఇతర మౌలికవసతులను రక్షించేందుకు ఈ తరహా డ్రోన్ టెక్నాలజీని రూపొందించారు.
ఈ కొత్త టెక్నాలజీతో పిడుగులపై పరిశోధనలు కూడా చేయవచ్చు. అవి ఏర్పడటానికి వెనక కారణాలను మరింత లోతుగా విశ్లేషించవచ్చు. తద్వారా మరింత మెరుగైన వ్యవస్థలను రూపొందించవచ్చు.
సంబంధిత కథనం