బెంగళూరు ‘పోర్టు’ను ధ్వంసం చేశారంటూ పాక్​లో సంబరాలు- ఇండియాలో ట్రోలింగ్​..

పహల్గామ్​ ఉగ్రదాడి, ఆపరేషన్​ సిందూర్​ నేపథ్యంలో భారత్​- పాకిస్థాన్​లు దాదాపు యుద్ధం అంచు వరకు వెళ్లాయి. శనివారం సాయంత్రం జరిగిన కాల్పుల విరమణ ఒప్పందానికి ముందు ఇరు దేశాలు పరస్పర దాడులకు దిగాయి. వీటి వల్ల పాకిస్థాన్​కి చాలానే నష్టం జరిగింది. వీటన్నింటి మధ్య సోషల్​ మీడియాలో తప్పుడు సమాచారం విపరీతంగా వ్యాపించింది. మరీ ముఖ్యంగా పాకిస్థాన్​లో పరిస్థితులు చాలా హాస్యాస్పదంగా ఉన్నాయి. బెంగళూరు 'పోర్టు'ను పాక్​ నేవీ ధ్వంసం చేసిందంటూ అక్కడి ప్రజలు సంబరాలు చేసుకున్నారు! ఈ వ్యవహారం ఎక్స్​లో వైరల్​ అయ్యింది. అది గమనించిన భారతీయులు పాకిస్థానీలను ట్రోల్​ చేయడం మొదలుపెట్టారు. అసలేం జరిగిందంటే..

ఇదీ జరిగింది..

బెంగళూరు ఓడరేవును పాకిస్థాన్ నావికాదళం 'నాశనం' చేసినందుకు సంబరాలు చేసుకున్న పాకిస్థానీయులను సీనియర్ ఐపీఎస్ అధికారి అరుణ్ బోత్రా సహా వేలాది మంది భారతీయులు ట్రోల్​ చేశారు.

వాస్తవానికి, బెంగళూరు - కర్ణాటక రాజధాని - తీరానికి కనీసం 300 కిలోమీటర్ల దూరంలో ఉంది. కానీ భారత్- పాక్ మధ్య ఉద్రిక్తతల నేపథ్యంలో పలువురు పాకిస్థానీలు, పాక్ మద్దతుదారులు తమ నౌకాదళం బెంగళూరు పోర్టును ధ్వంసం చేసిందంటూ సోషల్ మీడియాలో తప్పుడు ప్రచారం చేశారు. అలాంటి ఓ కామెంట్ స్క్రీన్ షాట్​ను భారత సోషల్ మీడియాలో విపరీతంగా ప్రచారం చేశారు.

'బెంగళూరు పోర్టును పాక్ నావికాదళం ధ్వంసం చేసింది' అని ఫవాద్​ యువర్ రెహ్మాన్ అనే వ్యక్తి కామెంట్ చేశాడు. దీంతో ఆయన కామెంట్ ఒక్కసారిగా తీవ్ర ట్రోలింగ్​కి గురైంది.

'బెంగళూరులో యూఎస్​బీ పోర్టులు మాత్రమే ఉన్నాయి,' అంటూ ఐపీఎస్ అధికారి అరుణ్ బోత్రా సరదాగా స్పందించారు.

ఐఏఎస్ అవనీష్ శరణ్ తన ఎక్స్ పోస్టుకు సమాధానమిస్తూ, "పట్నా సముద్ర రేవును కూడా నాశనం చేశారు," అని పేర్కొన్న మరొక వైరల్ స్క్రీన్ షాట్​పై విరుచుకుపడ్డారు. బిహార్​లోని పట్నా కూడా పోర్టు లేదు.

పాకిస్థానీల వింత వాదనలను తోసిపుచ్చడానికి ప్రజలు వ్యంగ్యంగా స్పందించారు.

“నిజమే నేను మన్యత బీచ్​లో మార్నింగ్​ కాఫీ తాగుతున్నప్పుడు పేలుడు శబ్దాలు వినిపించాయి. మరతహళ్లి షిప్​యార్డు, సిల్క్​ బోర్డ్​ హార్బర్​ని కూడా టార్గెట్​ చేశారు,” అని బెంగళూరులోని ప్రాంతాల పేర్లను ఓ వ్యక్తి చెప్పుకొచ్చాడు.

“నేను బెంగళూరు సీ పోర్టులోనే ఉన్నాను. నా కోసం ప్రార్థనలు చేయండి,” అని మరొక యూజర్​ వ్యంగ్యంగా స్పందించాడు.

భారత్​ పాక్​ ఉద్రిక్తతల వేళ సోషల్​ మీడియాలో చక్కర్లు కొడుతున్న అనేక తప్పుడు వాదనలను తిప్పికొట్టేందుకు ప్రెస్ ఇన్ఫర్మేషన్ బ్యూరో ఫ్యాక్ట్ చెక్ యూనిట్ తీవ్రంగా శ్రమిస్తోంది. పలు యుద్ధ గేమింగ్ వీడియోలను భారత్-పాక్ ఘర్షణకు సంబంధించిన రియల్​ వీడియోలుగా ఆన్​లైన్​లో షేర్ చేస్తున్నారని పీఐబీ ఫ్యాక్ట్ చెక్ ఇటీవల ఓ పోస్ట్​లో చెప్పింది.

కాల్పుల విరమణ ఒప్పందం ఉల్లంఘన..?

నాలుగు రోజులుగా సీమాంతర డ్రోన్, క్షిపణి దాడుల నేపథ్యంలో భూ, వాయు, సముద్ర సరిహద్దుల్లో యుద్ధాన్ని తక్షణమే నిలిపివేయాలని భారత్, పాకిస్థాన్ దేశాలు అంగీకరించాయి. అయితే ఈ ప్రకటన వెలువడిన కొన్ని గంటల్లోనే జమ్ముకశ్మీర్ లో వరుస డ్రోన్ దృశ్యాలు, ఆ తర్వాత పేలుళ్ల శబ్దాలు రావడంతో భద్రతా సిబ్బంది వాటిని కూల్చివేసేందుకు వైమానిక రక్షణ వ్యవస్థలను రంగంలోకి దింపారు.