SP surprise Inspection: నకిలీ ఫిర్యాదుతో పోలీసులను టెస్ట్ చేసిన ఎస్‍పీ

SP surprise Inspection Viral video: కిందిస్థాయి ఉద్యోగుల పనితీరును ఉన్నతాధికారులు తనిఖీ చేస్తుంటారు. సిబ్బంది ఎలా పని చేస్తున్నారో పర్యవేక్షిస్తుంటారు. సాధారణంగా కార్యాలయాలకు వెళ్లి.. ప్రశ్నలు వేసి వివరాలు తెలుసుకుంటారు. అయితే ఉత్తర్ ప్రదేశ్‍కు చెందిన ఓ ఐపీఎస్ ఆఫీసర్.. జిల్లా పోలీసుల పనితీరును పరీక్షించేందుకు కొత్త తరహా పద్ధతిని అవలంబించారు.

SP surprise Inspection Viral video: నకిలీ ఫిర్యాదు

ఉత్తర్ ప్రదేశ్‍లోని ఔరైయా జిల్లా పోలీస్ సూపరింటెండెంట్ (SP) చారు నిగమ్ ఓ ఆకస్మిక ఇన్‍స్పెక్షన్ నిర్వహించారు. అత్యవసర కాల్స్ కు జిల్లా పోలీసులు ఎలా స్పందిస్తారో టెస్ట్ చేశారు. ఇందుకోసం ఎమర్జెన్సీ హెల్ప్ లైన్ నంబర్ 112కు ఎస్‍పీ చారు నిగమ్ కాల్ చేశారు. ఆయుధాలతో వచ్చిన దుండగులు తన బ్యాగ్ దోచుకెళ్లారని పోలీసులకు ఫిర్యాదు చేశారు.

SP surprise Inspection Viral video: పర్స్ పోయిందని..

ఫిర్యాదులు అందుకున్న పోలీసులు సంఘటనా స్థలానికి చేరుకున్నారు. అయితే సిబ్బంది తనను గుర్తుపట్టకుండా సాధారణ వ్యక్తి అనుకునేందుకు ఎస్‍పీ నిగమ్ తన ముఖాన్ని దుపట్టాతో కవర్ చేసుకున్నారు. కళ్లకు సన్ గ్లాసెస్ పెట్టుకున్నారు. దీంతో పోలీసులు ఆమెను గుర్తుపట్టలేదు. బ్రౌన్ కలర్ లో ఉన్న తన పర్స్ దొంగతనానికి గురైందని ఆమె పోలీసులకు చెప్పారు. ఆమె చెప్పిన వివరాలను ఇద్దరు పోలీసులు రాసుకున్నారు. మొత్తానికి వేగంగా స్పందించిన పోలీసులు ఈ పరీక్షలో పాసయ్యారు. ఈ మొత్తం ఘటనకు సంబంధించిన వీడియోను ఔరైయా పోలీసులు అధికారిక ట్విట్టర్ ఖాతాలో పోస్ట్ చేశారు.

SP surprise Inspection Viral video: వీడియో వైరల్

“జిల్లా పోలీసుల స్పందన, అప్రమత్తతను తనిఖీ చేసేందుకు ఎస్‍పీ చారు నిగమ్ (@ipsCharuNigam).. ఆమెను గుర్తుపట్టకుండా.. ఎవరూ లేని రహదారి నుంచి 112కి కాల్ చేశారు. ఆయుధాలతో బైక్‍పై వచ్చిన దుండగులు పర్స్ దోపిడీ చేశారని నకిలీ ఫిర్యాదు చేశారు. ఈ ప్రక్రియ మొత్తం సంతృప్తికరంగా ముగిసింది” అని ఔరైయా పోలీసులు ట్విట్టర్ లో వీడియోను పోస్ట్ చేశారు. ఈ వీడియో ట్విట్టర్ లో వైరల్ అయింది. ఇప్పటికే రెండున్నర లక్షల మందికి పైగా వీక్షించారు. లైక్స్ కూడా వేలలో ఉన్నాయి. పోలీసుల పనితీరును పరీక్షించేందుకు ఎస్‍పీ చేసిన ఆకస్మిక తనిఖీని చాలా మంది ప్రశంసిస్తున్నారు. పోలీస్ వ్యవస్థను అప్రమత్తంగా ఉంచేందుకు తీసుకుంటున్న చర్యలను కొనియాడారు.