'వధువు కావలెను..' ఇదెక్కడి ఆలోచన రా బాబు!

పెళ్లి కోసం మంచి సంబంధాలను చూడాలంటే బంధులను, వారి స్నేహితులను అడుగుతుంటారు. ఇంకో అడుగు ముందుకేసి మాట్రిమోనీల్లో వివరాలు పెడుతూ ఉంటారు. అయితే యూకేలోని ఓ భారత సంతతి వ్యక్తి.. చాలా వినూత్నంగా ఆలోచించాడు. బిల్​బోర్డులపై 'వధువు కావలెను' అని భారీ ప్రకటనలు చేశాడు.

31ఏళ్ల జీవన్​ బాచు అనే వ్యక్తి లండన్​లో నివాసముంటున్నాడు. అక్కడి అండర్​గ్రౌండ్​ మెట్రో స్టేషన్లలో రెండు బిల్​బోర్డులు అద్దెకు తీసుకుని.. తాను పెళ్లికి అమ్మాయి కోసం వెతుకుతున్నట్టు అందరికి కనిపించే విధంగా యాడ్​లు ముద్రించాడు. ఆ యాడ్​లో జీవన్​ స్టిల్​ ఇస్తూ కనిపించాడు. 'ఉత్తమమైన ఇండియన్​ మీ సొంతమవుతాడు,' అంటూ యాడ్​పై రాశాడు.

ఆక్స్​ఫర్డ్​ సర్కస్​లోని సెంట్రల్​, బేకర్​లూ లైన్స్​లో ఈ బిల్​బోర్డులు దర్శనమిస్తున్నాయి. వేలాది మంది ఆ యాడ్​లను చూస్తున్నారు.

మార్కెటింగ్​లో పని చేసే జీవన్​.. యాడ్​ల కోసం​ భారీగానే ఖర్చు చేసినట్టు తెలుస్తోంది. ఒక్కో బిల్​బోర్డుకు రూ. 2లక్షలు ఖర్చు చేశాడు.

దీనిపై జీవన్​ స్పందించాడు.

"కొవిడ్​ కారణంగా బయటకు వెళ్లడం కష్టమైంది. ఏదైనా వినూత్నంగా చేయాలని అనుకున్నాను. అందుకే ఇలా చేశాను. మంచి స్పందనే లభించింది. ఇప్పటివరకు 50మంది సంప్రదించారు. వాటిల్లో మంచి సంబంధాన్ని వెతుక్కోవాలి," అని స్థానిక వార్తా సంస్థకు జీవన్​ వివరించాడు.

జీవన్​ ఏర్పాటు చేసిన యాడ్​.. బిల్​బోర్డులపై రెండు వారాల పాటు ఉండనుంది.

వెబ్​సైట్​ కూడా..!

జీవన్​.. యాడ్​లతో ఆగిపోలేదు. www.findjeevanawife.com అని ఓ వెబ్​సైట్​ కూడా క్రియేట్​ చేసుకున్నాడు. అందులో తన వివరాలు పొందుపరిచాడు. 'ఇది జోక్​ కాదు..' అంటూ ఓ వీడియో తన గురించి వివరించాడు.

ఈ వార్త సామాజిక మాధ్యమాల్లో వైరల్​ అయ్యింది. జీవిన్​ విషయంపై నెటిజన్లు విశేషంగా స్పందిస్తున్నారు. ‘నీకు మంచి భార్య రావాలని కోరుకుంటున్నాము,’ అంటూ కామెంట్లు పెడుతున్నారు.