Election commissioner selection : ఎన్నికల కమిషనర్ల నియామకం కోసం ప్యానెల్​- సుప్రీం

Supreme court Election commissioner selection : ఎలక్షన్​ కమిషనర్ల నియామకాల కోసం ప్రత్యేక ప్యానెల్​ను ఏర్పాటు చేస్తూ ఆదేశాలిచ్చింది సుప్రీంకోర్టు. ప్రధానమంత్రి, ప్రతిపక్ష నేత, భారత దేశ ప్రధాన న్యాయమూర్తి.. ఈ ప్యానెల్​లో సభ్యులుగా ఉంటారని స్పష్టం చేసింది.

‘నిస్పక్షపాతంగా జరగాలి..’

"ఎన్నికలు నిస్పక్షపాతంగా జరగాలి. మా ఆదేశాలతో ఎన్నికల్లో స్వచ్ఛత మెరుగుపడుతుందని ఆశిస్తున్నాము," అని జస్టిస్​ కేఎం జోసేఫ్​తో కూడిన ఐదుగురు సభ్యుల ధర్మాసనం వెల్లడించింది. ప్రజాస్వామ్యం, ఎన్నికల్లో స్వచ్ఛతను పరిరక్షించడం చాలా అవసరం అని, లేకపోతే తీవ్ర ప్రమాదకర పరిణామాలు ఎదురవుతాయని సుప్రీం ధర్మాసనం అభిప్రాయపడింది.

Election commissioner supreme court : ఎన్నికల కమిషనర్​ బాధ్యతను అర్హుడైన వ్యక్తికి అప్పగించేందుకు సరైన వ్యవస్థ ఉండాలని గతంలో సుప్రీంకోర్టు వ్యాఖ్యానించింది. ప్రస్తుతం.. ఎన్నికల కమిషనర్లను రాష్ట్రపతి నియమిస్తున్నారు. వీరి టెన్యూర్​ 6ఏళ్ల వరకు ఉంటుంది. ప్రధాని సిఫార్సుల మేరకే మాజీ దౌత్యవేత్తలకు రాష్ట్రపతి ఆ బాధ్యతలు అప్పగిస్తుంటారు.

ఇదీ చదవండి : Adani-Hindenburg case : అదానీ వ్యవహారంపై ప్యానెల్​ ఏర్పాటుకు సుప్రీం ఆదేశం

దేశంలో ఎన్నికలు నిస్పక్షపాతంగా జరగాలంటే.. ఎన్నికల కమిషనర్ల నియామకానికి కొలీజియం తరహా వ్యవస్థ ఉండాలని పిటిషన్లు దాఖలయ్యాయి. ప్రస్తుతం ఉన్న విధానాల్లో అనేక లోపాలున్నాయని పిటిషనర్లు అభిప్రాయపడ్డారు. సీబీఐ డైరక్టర్​, లోక్​పాల్​ ఎంపిక చేసే అవకాశం న్యాయవ్యవస్థ, విపక్షానికి కూడా ఉందని, ఎన్నికల కమిషనర్ల విషయంలో అలా జరగడం లేదని వివరించారు.

1985 బ్యాచ్​ ఐఏఎస్​ అధికారి అరుణ్​ గోయెల్​ను గతేడాది నవంబర్​లో ఎన్నికల కమిషనర్​గా నియమించింది కేంద్ర ప్రభుత్వం. మెరుపువేగంతో జరిగిన ఈ ప్రక్రియపై సుప్రీంకోర్టు పలు సందర్భాల్లో అసంతృప్తి వ్యక్తం చేసింది. అప్పటి నుంచి ఈ వ్యవహారంపై చర్చలు జరుగుతున్నాయి.