IIT graduate laid off : 23ఏళ్లకే బడా కంపెనీలో ఉద్యోగం కోల్పోయిన ఐఐటీ గ్రాడ్యుయేట్​!

IIT graduate laid off by Goldman Sachs : ప్రపంచవ్యాప్తంగా ఇప్పుడు వినపడుతున్న ప్రతికూల అంశాల్లో 'లేఆఫ్​' ఒకటి. దీని తీవ్రత చాలా ఎక్కువగానే ఉంది. దేశీయ, అంతర్జాతీయ సంస్థలన్నీ.. కాస్ట్​ కటింగ్​ పేరుతో ఉద్యోగులను తొలగిస్తున్నారు. ఈ విషయాలు నిత్యం వార్తల్లో నిలుస్తున్నాయి. కాగా.. ఓ ఐఐటీ గ్రాడ్యుయేట్​, ఓ బడా కంపెనీలో ఉద్యోగం కోల్పోయిన ఘటన తాజాగా వార్తలకెక్కింది. 'నా పుట్టిన రోజు జరిగిన కొన్ని రోజులకే.. నా ఉద్యోగం పోయినట్టు తెలిసింది,' అంటూ ఆ ఐఐటీ గ్రాడ్యుయేట్​ చెప్పుకొచ్చాడు.

అసలేం జరిగిందంటే..

శుభం సాహు అనే 23ఏళ్ల వ్యక్తి.. 2022లో ఐఐటీ ఖరగ్​పూర్​ నుంచి కెమికల్​ ఇంజినీరింగ్​లో ఉత్తీర్ణుడయ్యాడు. ఆరు నెలల క్రితమే బెంగళూరులోని గోల్డ్​మాన్​ సాక్స్​లో చేరాడు. సాఫ్ట్​వేర్​ డెవలపర్​గా ఉద్యోగం మొదలుపెట్టాడు. కొన్ని రోజుల క్రితమే పుట్టిన రోజు వేడుకలు జరుపుకున్నాడు.

Goldman Sachs layoffs 2023 : జాబ్​​ కట్​ రూపంలో 3,200 మంది ఉద్యోగులను ఇటీవలే తొలగించింది గోల్డ్​మాన్​ సాక్స్​. ఇండియాలో గోల్డ్​మాన్​ సాక్స్​ వర్క్​ఫోర్స్​లో ఇది 6.5శాతం! ఉద్యోగం కోల్పోయిన వారిలో శుభం సాహు కూడా ఉన్నాడు.

"వావ్​.. నూతన ఏడాదిని ఈ విధంగా మొదలుపెట్టడం చాలా భిన్నంగా ఉంది. సాఫ్ట్​వేర్​ డెవలపర్​గా అది నా మొదటి ఉద్యోగం. నా మొదటి అనుభూతి. కానీ ఇప్పుడు నా ఉద్యోగం పోయింది. గోల్డ్​మాన్​ సాక్స్​లో నేను పనిచేసింది తక్కువ కాలమే అయినా.. ఆ అవకాశం నాకు దక్కడం సంతోషకరం. నేను కృతజ్ఞుడిని," అని లింక్​డిన్​లో రాసుకొచ్చాడు శుభం సాహు. ఈ క్రమంలోనే మరో ఉద్యోగం కోసం వెతుక్కుంటున్నట్టు లింక్​డిన్​లో అప్డేట్​ చేశాడు.

Goldman Sachs layoff India : సాహు ఒక్కడే కాదు.. గోల్డ్​మాన్​ సాక్స్​లో ఉద్యోగం కోల్పోయిన వారిలో చాలా మంది ఇప్పుడు లింక్​డిన్​లో పోస్ట్​లు పెడుతున్నారు. ఇండియాకు చెందిన షిల్పి సోని అనే సాఫ్ట్​వేర్​ ఇంజినీర్​.. టెక్సాస్​లోని గోల్డ్​మాన్​ సాక్స్​లో 1.7ఏళ్లుగా ఉద్యోగం చేస్తోంది. తాజా జాబ్​ కట్స్​లో ఆమె కూడా ఉద్యోగం కోల్పోయింది. "జీవితం చాలా వేగంగా తలకిందులైపోతుంది," అని ఆమె తన లింక్​డిన్​లో రాసుకొచ్చింది.