ICAI MoU with CBSE: అకౌంటింగ్ లో స్కిల్ బేస్డ్ ఎడ్యుకేషన్ కోసం సీబీఎస్ఈతో ఐసీఏఐ ఎంఓయూ

ICAI MoU with CBSE: దేశవ్యాప్తంగా విద్యార్థులకు కామర్స్ ఆధారిత స్కిల్ కోర్సులను ప్రోత్సహించడానికి సెంట్రల్ బోర్డ్ ఆఫ్ సెకండరీ ఎడ్యుకేషన్ (CBCE) స్కిల్ ఎడ్యుకేషన్ విభాగంతో ఇన్స్టిట్యూట్ ఆఫ్ చార్టర్డ్ అకౌంటెంట్స్ ఆఫ్ ఇండియా (ICAI) అవగాహన ఒప్పందం కుదుర్చుకుంది. మారుతున్న ఇండస్ట్రీ అవసరాలకు అనుగుణంగా వాణిజ్య ఆధారిత నైపుణ్యాలను విద్యార్థులకు అందించే లక్ష్యంతో ఈ ఒప్పందం కుదుర్చుకున్నారు.

పరిశ్రమల అవసరాలకు అనుగుణంగా..

పరిశ్రమల అవసరాలకు అనుగుణంగా రూపొందించిన ప్రత్యేక కోర్సుల ద్వారా విద్యార్థుల్లో నైపుణ్యాలను, ఉపాధి అవకాశాలను పెంపొందించడంపై ప్రధానంగా దృష్టి సారిస్తామని ఐసీఏఐ పేర్కొంది. ‘‘సీబీఎస్ఈతో ఈ అవగాహన ఒప్పందం కుదుర్చుకోవడం దేశవ్యాప్తంగా విద్యార్థులకు నైపుణ్యాభివృద్ధి ఎకో సిస్టమ్ ను పెంచే దిశగా ఒక ముఖ్యమైన అడుగు. ఈ సహకారం ద్వారా, కామర్స్ ఆధారిత నైపుణ్య కోర్సులను ప్రోత్సహించడం, విద్యార్థులు సంబంధిత, పరిశ్రమ-ఆధారిత సామర్థ్యాలను కలిగి ఉన్నారని నిర్ధారించడం ఐసీఏఐ లక్ష్యంగా పెట్టుకుంది. ఈ భాగస్వామ్యం అకడమిక్ లెర్నింగ్, ప్రొఫెషనల్ అవసరాల మధ్య అంతరాన్ని పూడ్చడానికి మా నిబద్ధతను ప్రతిబింబిస్తుంది. ఇది అకౌంటెన్సీ, ఫైనాన్స్ రంగాల్లో లాభదాయకమైన కెరీర్లను కొనసాగించడానికి విద్యార్థులకు కొత్త మార్గాలను తెరుస్తుందని మేము విశ్వసిస్తున్నాము’’ అని ఐసీఏఐ ప్రెసిడెంట్ రంజీత్ కుమార్ అగర్వాల్ అన్నారు.

ఎంఓయూ ద్వారా ఈ కింది కార్యక్రమాలు

• ఈ సహకారంలో భాగంగా, ఐసీఏఐ (ICAI), సీబీఎస్ఈ (CBSE) సంయుక్తంగా భారతదేశం అంతటా ఉన్న సీబీఎస్ఈ అనుబంధ పాఠశాలల ప్రధానోపాధ్యాయులు, ఉపాధ్యాయులు మరియు నిర్వహణ బృందాలను లక్ష్యంగా చేసుకుని అవగాహన కార్యక్రమాలను నిర్వహిస్తాయి.
• బిఎఫ్ఎస్ఐ సెక్టార్ కింద కామర్స్ ఆధారిత నైపుణ్య కోర్సులను ప్రోత్సహించడం, విద్యార్థుల కెరీర్ అభివృద్ధికి ఈ కోర్సుల ప్రాముఖ్యతను హైలైట్ చేయడంపై ఈ కార్యక్రమాలు దృష్టి పెడతాయి.
• కామర్స్ సంబంధిత సబ్జెక్టుల ఉపాధ్యాయులకు ఈ కోర్సులను సమర్థవంతంగా బోధించడానికి అవసరమైన నైపుణ్యాలు, పరిజ్ఞానంతో సన్నద్ధం చేయడానికి సిబిఎస్ఇ సామర్థ్యాన్ని పెంపొందించే కార్యక్రమాలను నిర్వహిస్తుంది.
• కోర్సు కంటెంట్, సిలబస్ డెవలప్ మెంట్, స్టడీ మెటీరియల్, ట్రైనింగ్ మాడ్యూల్స్, కెరీర్ గైడెన్స్ పై నిపుణుల ఇన్ పుట్స్ ను ఐసీఏఐ అందిస్తుంది.
• అకౌంటెన్సీ, సంబంధిత రంగాల్లో ఉద్యోగావకాశాల గురించి అధ్యాపకులు, విద్యార్థులకు అవగాహన కల్పించడంపై ప్రత్యేక దృష్టి సారించి సీబీఎస్ఈ నిర్వహించే వర్క్ షాపులు, శిక్షణా సెషన్లలో ఐసీఏఐ పాల్గొంటుంది.