Masks not mandatory on flights: విమానాల్లో మాస్క్ ధరించడంపై కొత్త సూచనలు

Masks not mandatory on flights: విమానాల్లో ఇకపై మాస్క్ ధరించాల్సిన అవసరం లేదని కేంద్ర పౌర విమానయాన శాఖ బుధవారం ప్రకటించింది. మాస్క్ ధరించని వారిపై ఎలాంటి చర్యలు ఉండవని స్పష్టం చేసింది. మాస్క్ ధరించడం కచ్చితం కాదు కానీ, తమతో పాటు సహ ప్రయాణీకుల భద్రతను దృష్టిలో పెట్టుకుని మాస్క్ లు ధరించడం మంచిదని సూచించింది. విమాన ప్రయాణాల్లో మాస్క్ ను ఉపయోగించడం ఇప్పటివరకు తప్పని సరి అన్న నిబంధన ఉంది. ఆ నిబంధన పాటించనివారిపై చర్యలు కూడా ఉండేవి.

Masks not mandatory on flights: తగ్గుతున్న కేసుల సంఖ్య

కరోనా వైరస్ ముప్పు తగ్గుతోంది. కోవిడ్ 19 కేసుల సంఖ్య కూడా గణనీయంగా తగ్గుతోంది. కరోనా కేసులు ఇప్పుడు నామమాత్రంగానే నమోదవుతున్నాయి. చైనాను మినహాయిస్తే, దాదాపు ప్రపంచ దేశాలన్నీ కోవిడ్ ఆంక్షలను సడలించడం ప్రారంభించాయి. భారత్ లో అయితే, ప్రజలు మాస్క్ ను మర్చిపోయి చాలాకాలమైంది. ఇతర కొవిడ్ ప్రొటోకాల్ ను సైతం పట్టించుకోవడం లేదు. ఈ నేపథ్యంలో, పౌర విమానయాన శాఖ తాజా ఆదేశాలను జారీ చేసింది.

Masks not mandatory on flights: మాస్క్ మంచిది..

విమాన ప్రయాణాల్లో మాస్క్ కచ్చితంగా ధరించాలన్న నిబంధనను ఎత్తివేస్తూనే, మాస్క్ ను ధరించడం ఆరోగ్యరీత్యా మంచిదని విమానయాన శాఖ సూచించింది. మాస్క్ ధరించడం వల్ల తమతో పాటు సహ ప్రయాణీకులకు కరోనా ముప్పు తగ్గుతుందని వివరించింది. ఈ మేరకు అన్ని విమానయాన సంస్థలకు సమాచారం ఇచ్చింది. ఫ్లైట్ అనౌన్స్ మెంట్లలో కూడా.. ప్రయాణీకులు మాస్క్ లు ధరిస్తే మంచిదన్న సూచన మాత్రమే ఇవ్వాలని అందులో పేర్కొంది.