‘మీ స్వేచ్ఛ కోసం’- అమెరికాలో కొత్త పార్టీని ప్రారంభించిన ఎలాన్​ మస్క్​.. ట్రంప్​కి ఝలక్​!

అమెరికా అధ్యక్షుడు తీసుకొచ్చిన బిగ్​ బ్యూటిఫుల్​ బిల్లకు ఆమోదం లభిస్తే కొత్త పార్టీ పెడతానని హెచ్చరించిన అపర కుబేరుడు ఎలాన్​ మస్క్..​ చెప్పింది చేశారు! రిపబ్లికన్​, డెమొక్రటిక్​లకు ప్రత్యామ్నాయంగా ‘అమెరికా పార్టీ’ అనే మూడో రాజకీయ పార్టీని మస్క్​ తాజాగా లాంచ్​ చేశారు.

అమెరికా పార్టీని ప్రారంభించిన ఎలాన్​ మస్క్​..

సోషల్ మీడియాలో వచ్చిన సూచనలకు సానుకూలంగా స్పందించిన టెస్లా సీఈఓ ఎలాన్ మస్క్, తన ప్లాట్‌ఫామ్ ఎక్స్​ వినియోగదారుల నుంచి అఖండ మద్దతు లభించడంతో ఈ నిర్ణయం తీసుకున్నట్లు తెలిపారు.

"మీరు కొత్త రాజకీయ పార్టీని కోరుకుంటున్నారు. అది మీకు లభిస్తుంది! ఈ రోజు, మీకు మీ స్వేచ్ఛను తిరిగి ఇవ్వడానికి అమెరికా పార్టీ ఏర్పడింది," అని ఎలాన్​ మస్క్​ 'ఎక్స్' (గతంలో ట్విట్టర్) లో పోస్ట్ చేశారు.

ఒకప్పటి కీలక మిత్రుడు అమెరికా అధ్యక్షుడు డొనాల్డ్ ట్రంప్‌తో మస్క్​కి పెరుగుతున్న బహిరంగ విభేదాల మధ్య ఈ ఆశ్చర్యకరమైన ప్రకటన వెలువడింది.

ట్రంప్ తిరిగి అధ్యక్షుడిగా ఎన్నిక కావడానికి మస్క్ వందల మిలియన్ల డాలర్లు వెచ్చించారు. అంతేకాకుండా, ట్రంప్ అధ్యక్షుడిగా ఉన్న సమయంలో డిపార్ట్‌మెంట్ ఆఫ్ గవర్నమెంట్ ఎఫిషియెన్సీకి అధిపతిగా ఉంటూ, ఖర్చులను తగ్గించాలని మస్క్​ అనేక కఠిన నిర్ణయాలు తీసుకున్నారు.

అయితే, "ది వన్ బిగ్ బ్యూటిఫుల్ బిల్" పేరుతో భారీ పన్ను కోత, వ్యయ బిల్లుపై ట్రంప్ సంతకం చేసిన తర్వాత ఈ వారం ఇరువురి మధ్య సంబంధాలు దెబ్బతిన్నాయి. ఈ బిల్లును మస్క్ తీవ్రంగా వ్యతిరేకించారు.

దీనికి ప్రతిస్పందనగా, టెస్లా, స్పేస్‌ఎక్స్ సీఈఓ మస్క్ రాజకీయ ప్రతీకారం తీర్చుకుంటానని కొన్ని రోజుల క్రితం సంకేతమిచ్చారు. ఈ చట్టానికి మద్దతు ఇచ్చిన చట్టసభ సభ్యులను పదవుల నుంచి తొలగించడానికి తన సంపదను వెచ్చిస్తానని ప్రతిజ్ఞ చేశారు.

ట్రంప్‌తో మస్క్ ఎప్పటికప్పుడు సాగుతున్న ఈ వివాదం 2026 మధ్యంతర కాంగ్రెస్ ఎన్నికలలో తమ మెజారిటీని నిలుపుకునే అవకాశాలను దెబ్బతీస్తుందని రిపబ్లికన్లు ఆందోళన వ్యక్తం చేశారు.

తన పార్టీని ప్రారంభించడానికి ముందు, అమెరికా స్వాతంత్ర్య దినోత్సవం సందర్భంగా మస్క్ ఒక పోల్‌ను పంచుకున్నారు. అందులో, దాదాపు రెండు శతాబ్దాలుగా యూఎస్​ రాజకీయాలపై ఆధిపత్యం చెలాయించిన "రెండు-పార్టీ (కొందరు యూనిపార్టీ అని అంటారు) వ్యవస్థ నుంచి స్వాతంత్ర్యం కావాలా?" అని ఆయన అడిగారు.

ఈ అవును/కాదు సర్వేకు 1.2 మిలియన్లకు పైగా స్పందనలు వచ్చాయి. అది చూసి మస్క్​ అమెరికా పార్టీని లాంచ్​ చేసేశారు.

ట్రంప్‌తో మస్క్ విభేదాలు..

డిపార్ట్‌మెంట్ ఆఫ్ గవర్నమెంట్ ఎఫిషియెన్సీ అధిపతిగా రిపబ్లికన్ల వ్యయాన్ని తగ్గించడం, ఫెడరల్ ఉద్యోగాలను రద్దు చేసే ప్రయత్నాలకు నాయకత్వం వహించిన తర్వాత స్పేస్‌ఎక్స్ అధినేతకు, అధ్యక్షుడికి మధ్య తీవ్ర విభేదాలు తలెత్తాయి.

గత నెల చివర్లో ట్రంప్ తన భారీ దేశీయ అజెండాను "ది వన్ బిగ్ బ్యూటిఫుల్ బిల్" రూపంలో కాంగ్రెస్‌లో ఆమోదింపజేయడానికి రిపబ్లికన్లను ఒత్తిడి చేయడంతో ఈ వివాదం మళ్లీ తీవ్రమైంది.

మస్క్ ఈ కీలక వ్యయ బిల్లును తీవ్రంగా విమర్శించిన తర్వాత – అది చివరికి కాంగ్రెస్ ఆమోదం పొంది చట్టంగా మారిన తర్వాత – ట్రంప్ ఈ టెక్ దిగ్గజమైన మస్క్‌ను దేశం నుంచి బహిష్కరిస్తానని, అతని వ్యాపారాల నుంచి ఫెడరల్ నిధులను తొలగిస్తానని బెదిరించారు.

దక్షిణాఫ్రికాలో జన్మించి, 2002 నుంచి యూఎస్​ పౌరసత్వం పొందిన మస్క్‌ను దేశం నుంచి బహిష్కరించడాన్ని పరిశీలిస్తారా అని విలేకరులు అడిగినప్పుడు, "మనం ఒకసారి చూద్దాం" అని అధ్యక్షుడు అన్నారు.