RSS Ban lifted : ఆర్​ఎస్​ఎస్​కి సంబంధించిన దశాబ్దాల నాటి నిషేధం ఎత్తివేత! ప్రభుత్వ ఉద్యోగులు ఇక..

ప్రభుత్వ ఉద్యోగులు ఆర్​ఎస్​ఎస్​ (రాష్ట్రీయ స్వయంసేవక్​ సంఘ్​) కార్యకలాపాల్లో పాల్గొనకుండా ఇప్పటివరకు ఉన్న నిషేధాన్ని బీజేపీ ప్రభుత్వం ఇటీవలే ఎత్తివేసినట్టు తెలుస్తోంది! ఈ మేరకు ప్రభుత్వ ఉత్తర్వులను చూపిస్తూ పలు కీలక వ్యాఖ్యలు చేశారు కాంగ్రెస్​ నేత జైరామ్​ రమేశ్​.

కాంగ్రెస్​ నేత షేర్​ చేసిన ఉత్తర్వులను కేంద్ర ప్రభుత్వం జులై 9న జారీ చేసినట్టు కనిపిస్తోంది. ప్రభుత్వ ఉద్యోగులు ఆర్​ఎస్​ఎస్​లో పాల్గొనకుండా 1966 నాటి నిషేధాన్ని ఎత్తివేస్తున్నట్టు ఆ ఉత్తర్వుల్లో ఉంది.

1966 నాటి నిషేధం ఎత్తివేత..!

మహాత్మా గాంధీ మరణం అనంతరం ఆర్​ఎస్​ఎస్​పై 1948లో నిషేధం పడింది. అప్పటి హోంమంత్రి సర్దార్​ వల్లభాయ్​ పటేల్​ స్వయంగా ఈ నిర్ణయం తీసుకున్నారు.

"మహాత్మా గాంధీ హత్య అనంతరం 1948 ఫిబ్రవరిలో ఆర్​ఎస్​ఎస్​ని సర్దార్​ పటేల్​ నిషేధించారు. అనంతరం కాలంలో ఆ నిషేధాన్ని ఎత్తివేశారు. ఆ తర్వాత కూడా త్రివర్ణ పతాకాన్ని ఆర్​ఎస్​ఎస్​ నాగ్​పూర్​ (ప్రధాన కార్యాలయం)లో ఎగరవేయలేదు," అని జైరామ్​ రమేశ్​ ఆరోపించారు.

కానీ 1966లో ఆర్​ఎస్​ఎస్​పై మళ్లీ నిషేధం పడిందని కాంగ్రెస్​ నేత గుర్తు చేశారు. ఆర్​ఎస్​ఎస్​, జమాత్​-ఈ- ఇస్లామీ వంటి సంస్థల కార్యకలాపాల్లో ప్రభుత్వ ఉద్యోగులు పాల్గొంటే, అది కేంద్ర సివిల్​ సర్వీసెస్​ రూల్స్​కి వ్యతిరేకమని నాటి ఉత్తర్వుల్లో స్పష్టంగా ఉన్నట్టు జైరామ్​ రమేశ్​ స్పష్టం చేశారు. ఈ నిషేధాన్ని జులై 9న నరేంద్ర మోదీ ప్రభుత్వం ఎత్తివేసిందని కాంగ్రెస్​ నేత అన్నారు.

"జూన్​ 4న విడుదలైన లోక్​సభ ఎన్నికల ఫలితాలు తర్వాత ఆర్​ఎస్​ఎస్​- ప్రధాని మధ్య బంధం మరింత బలహీనపడింది. ఇప్పుడు జులై 9న, 58ఏళ్ల పాటు ఉన్న నిషేధాన్ని ప్రభుత్వం ఎత్తివేసింది. ప్రభుత్వ ఉద్యోగులు ఆర్​ఎస్​ఎస్​ కార్యక్రమాల్లో పాల్గొనకూడదన్న నిషేధం వాజ్​పేయీ హయాంలో కూడా కొనసాగింది," అని జైరామ్​ రమేశ్​ చెప్పుకొచ్చారు.

"నాకు తెలిసి.. దౌత్యవేత్తలు ఇక నుంచి నిక్కర్ల (ఆర్​ఎస్​ఎస్​ కార్యకర్తల దుస్తులు)లో కూడా రావొచ్చు," అని కాంగ్రెస్​ నేత వ్యంగ్యాస్త్రం సంధించారు.

జులై 9 నాటి ఉత్తర్వులను బీజేపీ ఐటీ డిపార్ట్​మెంట్​ చీఫ్​ అమిత్​ మాల్వియా సోషల్​ మీడియాలో పోస్ట్​ చేశారు. ప్రభుత్వ నిర్ణయాన్ని సమర్థిస్తున్నట్టు వెల్లడించారు.

"58ఏళ్ల క్రితం, 1966లో ప్రభుత్వ ఉద్యోగులు ఆర్​ఎస్​ఎస్​ కార్యక్రమాల్లో పాల్గొనకుండా నిషేధం విధించారు. ఇది అసలు జరిగి ఉండకూడదు. ఇది రాజ్యాంగ విరుద్ధం. దీనిని మోదీ ప్రభుత్వం ఉపసంహరించుకుంది. దీనిని నేను స్వాగతిస్తున్నాను," అని అమిత్​ చెప్పుకొచ్చారు.