Justin Trudeau : 'ఖలిస్థానీ ఉగ్రవాది హత్యలో భారత్​ హస్తం'- కెనడా ప్రధాని సంచలన ఆరోపణలు!-canada expels indian diplomat over alleged links to khalistani terrorist killing ,జాతీయ - అంతర్జాతీయ న్యూస్
తెలుగు న్యూస్  /  జాతీయ - అంతర్జాతీయ  /  Justin Trudeau : 'ఖలిస్థానీ ఉగ్రవాది హత్యలో భారత్​ హస్తం'- కెనడా ప్రధాని సంచలన ఆరోపణలు!

Justin Trudeau : 'ఖలిస్థానీ ఉగ్రవాది హత్యలో భారత్​ హస్తం'- కెనడా ప్రధాని సంచలన ఆరోపణలు!

Sharath Chitturi HT Telugu
Sep 19, 2023 11:58 AM IST

Justin Trudeau : ఖలిస్థానీ ఉగ్రవాది హర్దీప్​ సింగ్​ నిజ్జార్​ హత్య నేపథ్యంలో భారత ప్రభుత్వంపై సంచలన ఆరోపణలు చేశారు కెనడా ప్రధాని జస్టిన్​ ట్రూడో. అతని హత్య వెనుక భారత్​ హస్తం ఉన్నట్టు అనుమానాలు వ్యక్తం చేశారు.

'ఖలిస్థానీ ఉగ్రవాది హత్యలో భారత్​ హస్తం'
'ఖలిస్థానీ ఉగ్రవాది హత్యలో భారత్​ హస్తం'

Justin Trudeau latest news : భారత ప్రభుత్వంపై కెనడా ప్రధానమంత్రి జస్టిన్​ ట్రూడో సంచలన ఆరోపణలు చేశారు. ఖలిస్థానీ ఉగ్రవాది, టైగర్​ ఫోర్స్​ చీఫ్​ హర్దీప్​ సింగ్​ నిజ్జార్​ హత్య వెనుక భారత్​ హస్తం ఉందని వ్యాఖ్యానించారు. ఇదే విషయంపై.. కెనడాలో భారత్​కు చెందిన సీనియర్​​ దౌత్యవేత్తను అక్కడి ప్రభుత్వం బహిష్కరించింది. ఫలితంగా ఇప్పటికే బలహీనంగా ఉన్న భారత్​- కెనడా బంధం మధ్య మరింత ఉద్రిక్త పరిస్థితులు నెలకొనే అవకాశం ఉంది.

నిజంగా భారత్​ హస్తం ఉందా..?

పంజాబ్​ జలంధర్​లోని భార్​సింఘ్​పూర్​లో జన్మించాడు నిజ్జార్​. అతడిని ఎన్​ఏఏ (నేషనల్​ ఇన్​వెస్టిగేషన్​ ఏజెన్సీ).. పరారీలో ఉన్న నిందితుడిగా గుర్తించింది. గతేడాది జులైలో నిజ్జార్​పై రూ. 10లక్షల క్యాష్​ రివార్డ్​ను కూడా ప్రకటించింది.

కాగా.. కెనడా సర్రే ప్రాంతంలోని ఓ గురుద్వారాలో జూన్​ 18న కొందరు దుండగులు.. హర్దీప్​ సింగ్​ నిజ్జార్​ను చంపేశారు. ఇది ప్రపంచవ్యాప్తంగా సంచలనంగా మారింది.

ఈ విషయంపై తాజాగా సంచలన వ్యాఖ్యలు చేశారు జస్టిన్​ ట్రూడో.

India Canada relations "ఈ విషయంపై కొంత కాలంగా దర్యాప్తు చేస్తున్నాము. హర్దీప్​ సింగ్​ నిజ్జార్​ హత్య వెనుక భారత ప్రభుత్వ ఏజెంట్ల హస్తం ఉందనేందుకు.. కెనడా భద్రతా దళాల వద్ద బలమైన ఆధారాలు ఉన్నట్టు కనిపిస్తోంది. ఇతర దేశాలు మా అంతర్గత విషయాల్లో జోక్యం చేసుకోకూడదు. ఈ విషయంపై మా మిత్రపక్షాలతో చర్చలు జరుపుతున్నాము. ఇది చాలా తీవ్రమైన అంశం. మేము చాలా సీరియస్​గా పరిగణిస్తున్నాము," అని కెనడా ప్రధాని జస్టిన్​ ట్రూడో వెల్లడించారు.

ఈ విషయంపై తమకు సహకరించాలని భారత ప్రభుత్వానికి విజ్ఞప్తి చేశారు ట్రూడో. ఈ పరిస్థితులతో ఇండో- కెనడియన్లు భయపడాల్సి అవసరం లేదని, ఎప్పటిలాగే అందరు కలిసి మెలిసి ఉండొచ్చని హామీనిచ్చారు ట్రూడో.

భారత దౌత్యవేత్త బహిష్కరణ..

Hardeep Singh Nijjar : భారత ప్రభుత్వంపై జస్టిన్​ ట్రూడో సంచలన ఆరోపణలు చేసిన కొంతసేపటికి.. ఒటావాలోని భారత ఇంటెలిజెన్స్​ చీఫ్​ను బహిష్కరించింది కెనడా.

"కెనడాలోని భారతీయ సీనియర్​ దౌత్యవేత్తను బహిష్కరిస్తున్నాము," అని ఆ దేశ విదేశాంగశాఖ ఓ ప్రకటనలో తెలిపింది. ఆయన రా (రీసెర్చ్​ అండ్​ ఎనాలసిస్​ వింగ్​) చీఫ్​ అని పేర్కొంది.

ప్రతిఘటించిన భారత్​..

జస్టిన్​ ట్రూడో చేసిన ఆరోపణలను భారత ప్రభుత్వం తిప్పికొట్టింది. వాటిల్లో నిజం లేదని తేల్చిచెప్పింది. ఇండియాలోని కెనడా హైకమిషనర్​ను పిలిపించింది. అనంతరం.. భారత్​లో ఉన్న కెనడాకు చెందిన సీనియర్​ దౌత్యాధికారిని దేశం నుంచి బహిష్కరించింది.

బలహీనపడుతున్న బంధం..!

Canada expels Indian diplomat : ఖలిస్థానీ ఉగ్రవాదం అంశంలో భారత్​- కెనడా బంధం రోజురోజుకు బలహీనపడుతూ వస్తోంది. ఖలిస్థానీ ఉగ్రవాద సమస్యను కెనడా పరిష్కరించట్లేదని భారత్​ అంసతృప్తిగా ఉంది. జీ20 సదస్సులో భాగంగా.. భారత ప్రధాని మోదీ- జస్టిన్​ ట్రూడో మధ్య జరిగిన సమావేశంలో కూడా ఈ అంశం ప్రస్తావనకు వచ్చింది. ఈ విషయంపై మోదీ కాస్త గట్టిగానే మాట్లాడినట్టు తెలుస్తోంది.

టీ20 వరల్డ్ కప్ 2024

సంబంధిత కథనం