లిబరల్స్​దే కెనడా! ఎన్నికల్లో మార్క్​ కార్నీ సక్సెస్​- భారత్​తో రిలేషన్​ పరిస్థితేంటి?

2025 కెనడా ఎన్నికల్లో ప్రధానమంత్రి మార్క్​ కార్నీ నేతృత్వంలోని లిబరల్​ పార్టీ విజయం దిశగా అడుగులు వేస్తోంది. ఫలితంగా మార్క్​ మరోసారి ప్రధాని బాధ్యతలు చేపట్టడానికి రెడీ అవుతున్నారు. అయితే ఇంకొన్ని సీట్లల్లో కౌంటింగ్​ కొనసాగుతుండటంతో లిబరల్​ పార్టీకి పూర్తి మెజారిటీ దక్కుతుందా? లేదా మైనారిటీ ప్రభుత్వాన్ని నడిపించాలా? లేక స్వల్ప మెజారిటీతో గట్టెక్కుతందా? అన్న ప్రశ్నలు ఇప్పుడు ఉత్కంఠగా మారింది. మరోవైపు.. మార్క్​ కార్నీ గెలుపుతో ఇటీవలి కాలంలో బలహీనపడిన భారత్​- కెనడా సంబంధాలవైపు ఫోకస్​ షిఫ్ట్​ అయ్యింది.

2025 కెనడా ఎన్నికల ఫలితాలు..

లేటెస్ట్​ అప్డేట్స్​ ప్రకారం.. 343 సీట్లున్న కెనడా పార్లమెంట్​ని లిబరల్స్​ దక్కించుకున్నారు. కానీ సీట్ల విషయంలో ప్రతిపక్ష కన్జర్వేటివ్​ పార్టీకి లిబరల్స్​ పార్టీకి మధ్య స్వల్ప వ్యత్యాసం మాత్రమే ఉంది. లిబరల్స్​ 163 చోట్ల గెలుపు/ లీడ్​లో ఉండగా.. కన్జర్వేటివ్​లు 146 సీట్ల దగ్గర ఉన్నారు. కొన్ని కొన్ని చోట్ల క్లోజ్​ ఫైజ్​ సాగుతోంది! 100 ఓట్ల తేడాతో గెలుపోటములు డిసైడ్​ అవుతున్నాయి. మెజారిటీకి 172 సీట్లు కావాలి!

వాస్తవానికి ఇప్పటివరకు అధికారంలో ఉన్న లిబరల్స్​ ఈసారి కెనడా ఎన్నికల్లో గెలవకపోవచ్చని అంచనాలు ఉండేవి. పెరిగిపోతున్న కాస్ట్​ ఆఫ్​ లివింగ్​, నిరుద్యోగం, హౌజింగ్ సమస్యలు వంటివి ప్రతికూలంగా ఉన్నాయి. కానీ మార్క్​ కార్నీ లిబరల్స్​ గెలుపునకు అమెరికా అధ్యక్షుడు డొనాల్డ్​ ట్రంప్​ కూడా ఒక కారణం అని చెబుతున్నారు. కెనడాను అమెరికాలో కలిపేస్తానని అనడంతో పాటు ఆ దేశంపై ట్రంప్​ టారీఫ్​లు, హెచ్చరికలతో విరుచుకుపడ్డారు. మార్క్​ కార్నీ నేతృత్వంలోని ప్రభుత్వం వెనకడుగువేయకుండా.. 'మేక్​ కెనడా స్ట్రాంగ్​' నినాదంతో ముందుకువెళ్లారు. ఇది ప్రజలకు నచ్చిందని తెలుస్తోంది. ఆ తర్వాత లిబరల్స్​ గెలుపు అంచనాలు పెరిగాయి.

భారత్​- కెనడా రిలేషన్​ పరిస్థితేంటి?

వాస్తవానికి భారత్​- కెనడాల మధ్య ఎన్నో దశాబ్దాలుగా సత్సంబంధాలు ఉన్నాయి. కానీ కెనడాలో యాక్టివ్​గా ఉండే ఖలిస్థానీ ఉద్యమంలో చిరుకుగా ఉండే​ హర్దీప్​ సింగ్​ నిజ్జర్​ హత్యతో పరిస్థితులు మారిపోయాయి. అతని హత్య వెనుక భారత్​ హస్తం ఉందంటూ.. మాజీ ప్రధాని జస్టిన్​ ట్రూడో ఆరోపించారు. ఫలితంగా ఇరు దేశాల మధ్య బంధంం బలహీన పడింది.

కాగా.. అనంతరం కాలంలో ప్రభుత్వ, సొంత వైఫల్యాల మధ్య జస్టిన్​ ట్రూడో తన ప్రధాని పదవికి రాజీనామా చేశారు. ఆయన స్థానంలో వచ్చిన మార్క్​ కార్నీ.. కెనడా ఎన్నికలకు పిలుపునిచ్చి, ఇప్పుడు విజయం సాధించారు.

ఈ నేపథ్యంలో కెనడా- భారత్​ బంధంపై ఫోకస్​ పడింది. మార్క్​ కార్నీ గెలుపు ఇండియాకు మంచిదనే సూచనలు కనిపిస్తున్నాయి. భారత్​తో బంధాన్ని బలపరుచుకునేందుకు ప్రయత్నిస్తామని మార్క్​ కార్నీ ఇప్పటకే అనేకసార్లు సంకేతాలిచ్చారు.

"భారత్​తో బలమైన బంధం చాలా కీలకం. భారత్​తో కెనడా ప్రజలకు ఆర్థికంగా, వ్యూహాత్మకంగా, వ్యక్తిగతంగా సంబంధాలు ఉన్నాయి," అని అన్నారు.

ప్రో-ఖలిస్థానీ​ నేత ఓటమి..

న్యూ డెమొక్రటిక్​ పార్టీ నేత, ఖలిస్థానీ ఉద్యమానికి అనుకూలంగా ఉండే జగ్మీత్​ సింగ్​.. తాజాగా జరిగిన కెనడా ఎన్నికల్లో ఓటమి పాలయ్యారు. ఆయన ఓటమే కాదు, ఆయన పార్టీ కూడా ఘోర ప్రదర్శన చేసింది. 2021 ఎన్నికల్లో 20కిపైగా చోట్ల గెలిచిన ఆ పార్టీ.. ఇప్పుడు 7 సీట్లకు పరిమితమయ్యే సూచనలు కనిపిస్తున్నాయి.