ఎలాన్ మస్క్ అమెరికా అధ్యక్షుడయ్యే అవకాశం ఉందా? అమెరికా రాజ్యాంగం ఏం చెబుతోంది?

ప్రపంచంలోనే అత్యంత ధనవంతుడు, 2024లో డొనాల్డ్ ట్రంప్‌ను రెండోసారి అధికారం వైపు నడిపించిన కింగ్ మేకర్ ఎలాన్ మస్క్. టెస్లా, స్పేస్ఎక్స్ సీఈఓ ఎలాన్ మస్క్ ఇప్పుడు అమెరికా రాజకీయాల్లోకి స్వయంగా ప్రవేశించారు. అమెరికా పార్టీ పేరుతో కొత్త రాజకీయ పార్టీని ప్రకటించారు. అమెరికాలో 80 శాతం ఓటర్ల గొంతుకగా ఈ పార్టీ మారుతుందని మస్క్ పేర్కొన్నారు. ఎలాన్ మస్క్ ప్రకటన సహజమేనని ఆయన సన్నిహితులు చెబుతున్నారు.

ఈ బిల్లుతో దూరం!

ఎందుకంటే, ఇటీవల డొనాల్డ్ ట్రంప్ అమెరికా పార్లమెంటులో బిగ్ బ్యూటిఫుల్ చట్టాన్ని ఆమోదించారు. మస్క్ ఈ బిల్లును వ్యతిరేకించారు. ఈ బిల్లు ఆమోదం పొందితే, అమెరికా ప్రజల కోసం కొత్త పార్టీని ప్రకటిస్తానని చెప్పారు. ఈ బిల్లు అమెరికా ప్రజలకు వినాశకరమని మస్క్ అభివర్ణించారు. ఈ బిల్లు కేవలం ధనవంతులకు మాత్రమే ప్రయోజనకరంగా ఉంటుందని, పేద, మధ్యతరగతికి కాదని మస్క్ అభిప్రాయపడ్డారు.

అమెరికా రాజ్యాంగం

మస్క్ పార్టీని ప్రకటించిన వెంటనే.. అతిపెద్ద ప్రశ్న తలెత్తింది. ఎలాన్ మస్క్ స్వయంగా అధ్యక్ష ఎన్నికల్లో పోటీ చేయగలరా? అమెరికాలో అధ్యక్ష ఎన్నికల్లో పోటీ చేయడం అంత సులువు కాదు. అమెరికా రాజ్యాంగంలోని ఆర్టికల్ 2, క్లాజ్ 1 ప్రకారం ఒక వ్యక్తి మూడు షరతులను పూర్తి చేస్తేనే అమెరికా అధ్యక్షుడు కావచ్చు. మొదటి షరతు ఏమిటంటే అతను పుట్టుకతోనే యునైటెడ్ స్టేట్స్ పౌరుడు అయి ఉండాలి. రెండోది కనీసం 35 సంవత్సరాల వయస్సు కలిగి ఉండాలి. కనీసం 14 సంవత్సరాలు యునైటెడ్ స్టేట్స్‌లో నివసించి ఉండాలి.

దక్షిణాఫ్రికాలో

ఇక్కడ ఎలాన్ మస్క్ ఈ షరతులలో మొదటిదాన్ని తీర్చలేరు. ఇది చాలా ముఖ్యమైనది. మస్క్ 1971 జూన్ 28న దక్షిణాఫ్రికాలోని ప్రిటోరియా నగరంలో జన్మించారు. తరువాత అతను యూఎస్ పౌరసత్వం తీసుకున్నారు. పుట్టుకతో యూఎస్ పౌరుడు కాదు. రాజ్యాంగం అతన్ని అధ్యక్ష అభ్యర్థిగా ఉండటానికి అనుమతించదు. ఎలాన్ మస్క్‌కు అపారమైన సంపద ఉన్నా, టెక్నాలజీ, వ్యాపారంపై పట్టు ఉన్నా, ప్రత్యేకమైన ఫ్యాన్ ఫాలోయింగ్ ఉన్నా, అమెరికా రాజ్యాంగంలోని ఈ షరతు ఆయన మార్గాన్ని అడ్డుకుంటుంది.

రాజ్యాంగాన్ని సవరించకపోతే ఎలాన్ మస్క్ ఎప్పటికీ అమెరికా అధ్యక్షుడు కాలేరు. అటువంటి సవరణ చాలా కష్టం. ఎందుకంటే దీనికి ఉభయ సభలలో మూడింట రెండు వంతుల మెజారిటీ అవసరం. తరువాత 50 రాష్ట్రాలలో 38 రాష్ట్రాల ఆమోదం అవసరం.

కింగ్ మేకర్ టూ కింగ్ దిశగా!

ఎలాన్ మస్క్ ఇప్పుడు కింగ్ మేకర్ నుంచి కింగ్ అయ్యే దిశగా అడుగులు వేస్తున్నారని రాజకీయ విశ్లేషకులు అభిప్రాయపడుతున్నారు. 2026 కొన్ని స్థానాలకు వచ్చే మధ్యంతర ఎన్నికల్లో ఆయన తన అభ్యర్థులను బరిలోకి దింపవచ్చు. అంతేకాకుండా 2028లో అమెరికా సంతతికి చెందిన నాయకుడిని అధ్యక్ష పదవికి పోటీకి దింపి పార్టీ చీఫ్, పాలసీ డైరెక్టర్ లేదా ఇలా ఏదైనా ఉండవచ్చు.

అప్పుడు మద్దతు

2024లో ఎలాన్ మస్క్ ట్రంప్‌నకు బహిరంగ మద్దతు ప్రకటించారు. ట్రంప్ ను గెలిపించేందుకు మస్క్ శతవిధాలా ప్రయత్నించారు. నిధుల నుంచి బహిరంగ ప్రకటనల వరకు ఎలాన్ మస్క్ అడుగడుగునా ట్రంప్ వెంటే ఉన్నారు. కానీ ఇప్పుడు సొంతంగా పార్టీ పెట్టడంతో మస్క్ ఇప్పుడు ట్రంప్ జోన్ నుంచి బయటకు వచ్చినట్టుగా తెలుస్తోంది. తనదైన రాజకీయ పునాదిని సిద్ధం చేసుకుంటున్నట్లు సంకేతాలు స్పష్టంగా కనిపిస్తున్నాయి.