బస్సులో నిద్రపోతున్న యువతిపై కండక్టర్ లైంగిక వేధింపులు; వీడియో వైరల్

మహిళా ప్రయాణికురాలిపై లైంగిక వేధింపులకు పాల్పడిన బస్సు కండక్టర్ ను మంగళూరు పోలీసులు అరెస్టు చేశారు. మంగళూరు సమీపంలోని ముదిపు నుంచి స్టేట్ బ్యాంక్ కు వెళ్తున్న కర్ణాటక రాష్ట్ర రోడ్డు రవాణా సంస్థ బస్సులో ఈ ఘటన చోటుచేసుకుంది. నిద్ర పోతున్న యువతిని కండక్టర్ అనుచితంగా తాకుతుండగా సహ ప్రయాణికుడు ఒకరు వీడియో తీశాడు. ప్రస్తుతం వైరల్ అవుతున్న వీడియోలో ఆమె నిద్రపోతున్న సమయంలో కండక్టర్ ఆమెను అనుచితంగా తాకుతున్నట్లు కనిపిస్తుంది.

ప్రభుత్వ స్పందన

ఈ వీడియో ఆన్ లైన్ లో వైరల్ గా మారింది. ఈ వీడియో రాష్ట్ర ప్రభుత్వానికి చేరడంతో కేఎస్ఆర్టీసీ వెంటనే ఆ కండక్టర్ ను విధుల నుంచి తొలగించి విచారణ ప్రారంభించింది. పోలీసులు కూడా వెంటనే స్పందించి, ఆ వీడియో, ఇతర ప్రయాణికుల ఫిర్యాదుల ఆధారంగా నిందితుడిని అరెస్టు చేశారు.

కేసు నమోదు

మహిళా ప్రయాణికురాలిపై లైంగిక వేధింపులకు పాల్పడినందుకు భారతీయ న్యాయ సంహిత సెక్షన్ 74, 75 కింద కేఎస్ఆర్టీసీ కండక్టర్ పై కొనాజే పోలీసులు కేసు నమోదు చేశారు. ఆయనకు 15 రోజుల జ్యుడీషియల్ రిమాండ్ విధించారు.

సోషల్ మీడియా రియాక్షన్స్

ప్రభుత్వం, పోలీసుల స్పందన ఇలా ఉంటే, ఈ వీడియోను రికార్డ్ చేసిన సహ ప్రయాణికుడిపై పలువురు సోషల్ మీడియా యూజర్లు మండిపడ్డారు. ఆ కండక్టర్ ను అడ్డుకోకుండా, వీడియో రికార్డు చేయడంపై ఆగ్రహం వ్యక్తం చేశారు. 'మీరు వీడియో రికార్డ్ చేస్తున్నారు. కానీ, దీన్ని ఆపలేదు' అని ఒక యూజర్ కామెంట్ చేయగా, 'ఆ మూర్ఖుడు ఎవరు?' అని మరో నెటిజన్ ప్రశ్నించారు. ‘ఆ కండక్టర్ ను చెంపదెబ్బ కొట్టలేడా!" అని మరొకరు ప్రశ్నించారు.