ఇయర్​ఫోన్స్​ పెట్టుకుని రైల్వే ట్రాక్​పై పబ్​జీ గేమ్​ ఆడారు- చివరికి రైలు కింద చితికిపోయి..

బిహార్​లో జరిగిన ఒక షాకింగ్​ ఘటన ఇప్పుడు వార్తల్లొ నిలిచింది! రైల్వే ట్రాక్​పై పబ్​జీ ఆడుకుంటుండగా.. ముగ్గురు యువకులపైకి రైలు దూసుకెళ్లింది. ఈ ఘటనలో ఆ ముగ్గురు ప్రాణాలు కోల్పోయారు.

ఇదీ జరిగింది..

బిహార్​ పశ్చిమ్​ చంపారణ్​ జిల్లాలోని మాన్సా టోలా కిందకు వచ్చే నర్కటియాగంజ్​- ముజాఫర్​పూర్​ రైల్​ సెక్షన్​పై గురువారం ఈ ఘటన జరిగింది. ముగ్గురు రైల్వే ట్రాక్​పై కూర్చుని ఇయర్​ఫోన్స్​ పెట్టుకుని పబ్​జీ ఆడటంలో మునిగిపోయారు. ఫలితంగా, ఎదురుగా వస్తున్న రైలు గురించి వారికి తెలియలేదు, శబ్దం వినిపించలేదు. కొన్ని క్షణాల్లోనే వారి మీద నుంచి రైలు దూసుకెళ్లింది. ఆ ముగ్గురు ప్రాణాలు కోల్పోయారు.

రైల్వే ట్రాక్​పై మృతదేహాలను చూసేందుకు స్థానికులు తరలివెళ్లారు. భారీ సంఖ్యలో గుమిగూడి, రైలు ప్రమాదంలో చితికిపోయిన మృతదేహాలను చూసి షాక్​కు గురయ్యారు.

మృతులను రైల్వే గంటికి చెందిన ఫుర్ఖాన్​ ఆలమ్​, బరి టోలాకు చెందిన సమీర్​ ఆలమ్, హబీబుల్లా అన్సారీగా గుర్తించారు. ఘటనపై దర్యాప్తు చేపట్టినట్టు, యువకుల మరణం వెనుక మరిన్ని కారణాలను తెలుసుకునేందుకు ప్రయత్నిస్తున్నట్టు అధికారులు వెల్లడించారు.

మరోవైపు మృతదేహాలను ఆయా కుటుంబాలు తమ ఇళ్లకి తీసుకెళ్లిపోయాయి.

సదర్​ సబ్​ డివిజన్​ పోలీస్​ ఆఫీసర్​ వివేక్​ దీప్​, రైల్వే పోలీసులు.. ఘటనాస్థలానికి వెళ్లి పరిస్థితులను పరిశీలించారు.

"మృతదేహాలను పోస్టుమార్టం కోసం తరలించేందుకు ఆయా కుటుంబాలతో సంప్రదింపులు జరుపుతున్నాము. అసలు ఏం జరిగింది? ఈ ప్రమాదానికి కారణం ఏంటి? అని తెలుసుకునేందుకు బాధిత కుటుంబాలతో మాట్లాడుతున్నాము. అయితే, రైల్వే ట్రాక్​పై ఇయర్​ఫోన్స్​ పెట్టుకుని మొబైల్​ గేమ్​ ఆడారాని, రైలు ఢీకొట్టిందని ప్రాథమిక దర్యాప్తులో తేలింది," అని వివేక్​ దీప్​ తెలిపారు.

రైల్వే ట్రాక్​ ఆటలాడుకోవడం అంటేనే ప్రమాదకరం. ఇక ఇయర్​ఫోన్స్​ పెట్టుకుని మరీ మొబైల్​ గేమ్స్​ ఆడటం సర్వత్రా ఆందోళనకు గురిచేస్తోంది. పిల్లల భద్రతపై తల్లిదండ్రులు ఫోకస్​ చేయాలని, ఏది మంచి? ఏది చెడు? ఏది సురక్షితం? ఏది ప్రమాదకరం? వంటివి నేర్పించాలని అధికారులు చెబుతున్నారు. అప్పుడే భవిష్యత్తులో ఇలాంటి ఘటనలు జరగవని అంంటున్నారు.

అనేక సంవత్సరాలుగా ఈ పబ్​జీ గేమ్​ నిత్యం వార్తల్లో నిలుస్తోంది.. యూజర్స్​పై ప్రతికూల ప్రభావం చూపిస్తోంది. గేమ్​ ఆడుతూ చాలా మంది ప్రమాదవశాత్తు ప్రాణాలు కోల్పోయారు. ఇంకొందరు.. పబ్​జీకి బానిసై.. దాని నుంచి బయటకు రాలేక ప్రాణాలు తీసుకున్నారు.