ఆర్సీబీ విజయోత్సవ ర్యాలీ తొక్కిసలాట.. గందరగోళానికి, ప్రాణనష్టానికి కారణమైన మూడు కీలక తప్పిదాలు

బెంగళూరులో ఆర్సీబీ విజయోత్సవం చిన్నబోయింది. ఎంతో ఆనందంగా మెుదలైన ర్యాలీ.. విషాదంగా ముగిసింది. ఆర్సీబీ విజయోత్సవ వేడుకల సందర్భంగా బెంగళూరులోని చిన్నస్వామి స్టేడియం వెలుపల బుధవారం జరిగిన తొక్కిసలాటలో 11 మంది ప్రాణాలు కోల్పోయారు. 30 మందికి పైగా గాయపడ్డారు. ఈ సంఘటనతో ఈవెంట్ సన్నద్ధత, రద్దీ నియంత్రణపై తీవ్రమైన ప్రశ్నలను లేవనెత్తింది. ఈ విషాదానికి దారితీసిన కొన్ని కీలక అంశాలు ఇలా ఉన్నాయి.

సమన్వయ లోపం

స్టేడియం సమీపంలో మోహరించిన చాలా మంది పోలీసు సిబ్బందికి ఆ రోజు పూర్తి అజెండా గురించి తెలియదు. ఎందుకంటే అంతకుముందే బెంగళూరులో విజయోత్సవర్యాలీని భద్రతా ఇవ్వలేమని పోలీసులు చెప్పారు. కానీ ప్రభుత్వంలోని పెద్దలు రావడంతో పరిస్థితి మారిపోయింది. విధానసౌధలో అధికారిక సన్మాన కార్యక్రమం జరుగుతుండగా, క్షేత్రస్థాయిలో కమ్యూనికేషన్ తెగిపోయిందని డెక్కన్ హెరాల్డ్ తెలిపింది. ఇంత పెద్ద సంఖ్యలో జనాలు వచ్చిన ఈవెంట్‌ను నిర్వహించడానికి అవసరమైన దానికంటే విధుల్లో ఉన్న అధికారుల సంఖ్య చాలా తక్కువగా ఉంది.

రద్దీ నియంత్రణ చర్యలు

బారికేడ్లు చాలా తక్కువగా ఉన్నాయి, భద్రతా సిబ్బంది మోహరింపు జనాల స్థాయికి సరిపోలలేదు. డెక్కన్ హెరాల్డ్ కథనం ప్రకారం క్రౌడ్ మేనేజ్ మెంట్ లోపించింది. 100 మందిని నియంత్రించే బాధ్యతను ఒక అధికారికి అప్పగించినప్పుడు, పటిష్టమైన భద్రతా చర్యలను మోహరించాలి. దీనికితోడు ప్రవేశం గురించి స్పష్టమైన పబ్లిక్ కమ్యూనికేషన్ లేదు. ముందస్తు ప్రకటన లేకుండా గేట్లు ఒక్కొక్కటిగా తెరవడంతో ముందుగా ఏ గేటు తెరిచినా వేలాది మంది తరలిరావడంతో రద్దీ నెలకొంది.

ఎంట్రీపై గందరగోళం

స్టేడియంలోకి ఎలా ప్రవేశించాలి, సరిగ్గా ఏం షెడ్యూల్ చేయాలనే దానిపై హాజరైనవారిలో గందరగోళం ఉంది. సాధారణ క్రికెట్ మ్యాచ్ తరహాలో ఏర్పాట్లు జరుగుతాయని చాలా మంది ఆశించినా స్పష్టత రాలేదు. విధానసౌధ, చిన్నస్వామి స్టేడియం రెండింటిలోనూ అంబులెన్సుల కొరత కనిపించిందని డెక్కన్ హెరాల్డ్ తెలిపింది. విధానసౌధ కార్యక్రమం ముగిసిన తర్వాత పరిస్థితి మరింత దిగజారడంతో స్టేడియం వైపు జనం పోటెత్తారు.

ఇతర కారణాలు

సమన్వయ లోపం, ప్రేక్షకుల నియంత్రణ లోపం, విజయోత్సవ పరేడ్ పై గందరగోళం, చివరి నిమిషంలో ఉచిత పాసుల పంపిణీ, రద్దీ, చిన్నస్వామి స్టేడియంలో పరిమిత సీటింగ్‌తో తొక్కిసలాట జరిగి 11 మంది మృతి చెందారు. 30 మందికి పైగా గాయపడ్డారు.