DK Shivkumar : నిబంధనలు అతిక్రమించిన డిప్యూటీ సీఎంకు రూ. 50వేల ఫైన్​!

DK Shivakumar latest news : అధికార పక్షంలోని సీనియర్​ నేతకు జరిమానా పడిన అరుదైన సంఘటనకు బెంగళూరు వేదికగా నిలిచింది! కాంగ్రెస్​ పార్టీ కార్యాలయం వద్ద అక్రమంగా ఫ్లెక్సీలను ఏర్పాటు చేశారన్న కారణంగా.. కర్ణాటక డిప్యూటీ సీఎం డీకే శివకుమార్​కు రూ. 50వేల జరిమానా విధించారు అధికారులు.

ఇదీ జరిగింది..

కర్ణాటకలో కొన్ని నెలల క్రితమే కాంగ్రెస్​ పార్టీ ప్రభుత్వంలోకి వచ్చింది. పార్టీ సీనియర్​ నేత డీకే శివకుమార్​ డిప్యూటీ సీఎంగాను, బెంగళూరు అభివృద్ధి మంత్రిగాను ప్రమాణం చేశారు. కాగా.. బెంగళూరులో ఫ్లేక్సీ సమస్యలకు సంబంధించి ఆయన ఓ కీలక నిర్ణయం తీసుకున్నారు. నగరంలో అక్రమంగా ఫ్లేక్సీల ఏర్పాటును నిషేధించారు. ఫ్లేక్సీలను ఏర్పాటు చేయకూడదని రాజకీయ నేతలను అభ్యర్థించారు. ఒక వేళ నిబంధనలను అతిక్రమించి అక్రమంగా ఫ్లేక్సీలు ఏర్పాటు చేస్తే, బృహత్​ బెంగళూరు మహానగర పాలిక.. సంబంధిత వ్యక్తులపై రూ. 50వేల ఫైన్​ విధిస్తుందని తేల్చిచెప్పారు.

ఫైన్​ గురించి డీకే శివకుమార్​ ప్రకటన చేసిన 13 రోజుల తర్వాత.. క్వీన్స్​ రోడ్​లోని కర్ణాటక ప్రదేశ్​ కాంగ్రెస్​ పార్టీ కార్యాలయం వద్ద ఓ భారీ ఫ్లెక్సీ వెలిసింది! రాజీవ్​ గాంధీ, మాజీ సీఎం డీ దేవరాజ్​ల జయంతి నేపథ్యంలో ఫ్లెక్సీని ఏర్పాటు చేశారు. పార్టీ నేతల ఫొటోలు కూడా ఆ ఫ్లెక్సీలో ఉన్నాయి. మరి శివకుమార్​ ఆదేశించారో లేదో తెలియదు కానీ.. పార్టీకి చెందిన వెనకబడిన వర్గాల విభాగం, ఈ భారీ ఫ్లెక్సీని కార్యాలయం ఎదుట పెట్టింది.

ఇదీ చూడండి:- KSRTC: ఉచిత ప్రయాణం తిప్పలు.. సీటు కోసం బస్సులో మహిళల రచ్చ..!

ఈ విషయం బీబీఎంపీ దృష్టికి వెళ్లింది. అనుమతులు లేకుండా ఫ్లెక్సీని ఏర్పాటు చేశారని తెలుసుకుంది. వసంత్​నగర్​ సబ్​ డివిజన్​లోని ఏఆర్​ఓ (అసిస్టెంట్​ రెవెన్యూ ఆఫీసర్​) నేతృత్వంలోని ఓ బృందం.. కేపీసీసీ కార్యాలయానికి వెళ్లి, ఫ్లెక్సీని పరిశీలించింది. అనంతరం డీకే శివకుమార్​పై రూ. 50వేల ఫైన్​ను విధించింది.

BBMP fines DK Shivakumar : "కేపీసీసీ కార్యాలయం వద్ద ఓ భారీ ఫ్లెక్సీని ఏర్పాటు చేసినట్టు మా దృష్టికి వచ్చింది. ఈ నేపథ్యంలో కాంగ్రెస్​ పార్టీ రాష్ట్ర అధ్యక్షుడు డీకే శివకుమార్​పై రూ. 50వేల జరిమానా విధిస్తున్నాము," అని బీబీఎంపీ ఓ ప్రకటనలో తెలిపింది.

కర్ణాటకలో విపక్ష పార్టీలు, ప్రజలకే కాదు అధికారంలో ఉన్న నేతలకు కూడా నిబంధనలు ఒకే విధంగా వర్తిస్తాయని ఈ సంఘటన చెబుతోంది.