LIC IPO | రేపే లిస్టింగ్.. నష్టాలు వస్తే మదుపర్లు ఏం చేయాలి?
LIC IPO listing | రేపే ఎల్ఐసీ ఐపీఓ లిస్టింగ్. మరి లిస్టింగ్ ఎలా ఉండనుంది? ప్రస్తుతం.. జీఎంపీ ఏం సూచిస్తోంది? ఒకవేళ నష్టాలు వస్తే.. మదుపర్లు ఏం చేయాలి?
LIC IPO listing | దాదాపు రెండేళ్ల పాటు కేంద్ర ప్రభుత్వం పడిన శ్రమకు మంగళవారంతో ముగింపు పడనుంది! అనేక అవాంతరాల అనంతరం చివరికి.. ఎల్ఐసీ ఐపీఓ రేపు స్టాక్ మార్కెట్లో లిస్టికానుంది. ఇప్పుడు అందరి చూపు.. ఇండియాలోనే అతిపెద్ద ఐపీఓ లిస్టింగ్పైనే. మరి ఎల్ఐసీ ఐపీఓ లిస్టింగ్ ఎలా జరగనుంది? మదుపర్లకు లాభాలు వస్తాయా? ఎల్ఐసీ ఐపీఓ గ్రే మార్కెట్ ప్రీమియం ఏం సూచిస్తోంది? నష్టాల్లో లిస్ట్ అయితే.. మదుపర్లు ఏం చేయాలి?
ట్రెండింగ్ వార్తలు
ఎల్ఐసీ ఐపీఓ జీఎంపీ..
ఎల్ఐసీ షేర్లు గ్రే మార్కెట్లో ప్రస్తుతం రూ. 19 డిస్కౌంట్లో ట్రేడ్ అవుతున్నాయి. అంటే.. ప్రైజ్ బ్యాండ్(రూ. 949)తో పోల్చుకుంటే.. ఎల్ఐసీ షేర్లు రూ. 930 వద్ద లిస్ట్ అవుతాయని అంచనా! లిస్టింగ్ రోజు స్వల్ప నష్టాలు తప్పవని ఈ ఎల్ఐసీ ఐపీఓ జీఎంపీ సూచిస్తోంది. శుక్రవారం.. ఎల్ఐసీ ఐపీఓ జీఎంపీ మైనస్ రూ. 13గా ఉండేది.
LIC IPO GMP today | ఐపీఓకు వచ్చే కంపెనీల షేర్లు తొలుత గ్రే మార్క్ట్లో ట్రేడ్ అవుతూ ఉంటాయి. దీని బట్టి.. ఐపీఓ లాభాల్లో లిస్ట్ అవుతుందా? లేక నష్టాల్లో లిస్ట్ అవుతుందా? అని మార్కెట్ వర్గాలు అంచనాలు వేసుకుంటాయి. లిస్టింగ్ లాభాలు, స్వల్పకాలిక పెట్టుబడుల కోసం ఐపీఓలో ఇన్వెస్ట్ చేసే ట్రేడర్లు, పెట్టుబడిదారులు ఈ గ్రే మార్కెట్ ప్రీమియంను ఫాలో అవుతూ ఉంటారు.
అయితే.. ఓ సంస్థ ఐపీఓకు అప్లై చేయాలా? వద్దా? అని ఆలోచించేందుకు.. గ్రే మార్కెట్ ప్రీమియంను ప్రామాణికంగా చూడవద్దని మార్కెట్ విశ్లేషకులు సూచిస్తూ ఉంటారు. కంపెనీ ఫండమెంటల్స్, పీ అండ్ ఎల్ స్టేట్మెంట్, బ్యాలెన్స్ షీట్. వ్యాపారం వంటివి చూసి ఐపీఓలో ఇన్వెస్ట్ చేయాలని చెబుతుంటారు.
నష్టాలు వస్తే ఏం చేయాలి?
వాస్తవానికి ఎల్ఐసీ ఐపీఓకు.. ఊహించిన దాని కన్నా ఎక్కువ డిమాండే లభించిందని చెప్పుకోవాలి. పాలసీదారులు, రిటైలర్లు.. ఐపీఓ పాల్గొనేందుకు ఎగబడ్డారు. కానీ ఎఫ్ఐఐలు మాత్రం ఎల్ఐసీ ఐపీఓకు దూరంగానే ఉండిపోయారు. ప్రస్తుతం ఉన్న అంతర్జాతీయ అనిశ్చితులతో పాటు ఈ విషయం.. ఐపీఓకు ప్రతికూలంగా మారింది. ఫలితంగా.. ఎల్ఐసీ ఐపీఓకు నష్టాలు వస్తాయని మార్కెట్ విశ్లేషకులు గతకొంతకాలంగా వ్యాఖ్యలు చేస్తున్నారు.
Will LIC IPO fail | ఈ క్రమంలో స్వస్తిక ఇన్వెస్ట్మార్ట్ సీనియర్ అనలిస్ట్ ఆయుష్ అగర్వాల్ కీలక సూచనలు చేశారు.
"ఎల్ఐసీకి మంచి బ్రాండ్ వాల్యూ ఉంది. కానీ సంస్థ.. తన మార్కెట్ షేరును కోల్పోతుండటం ఆందోళనకర విషయం. బీమా వ్యాపారం అనేది దీర్ఘకాలికం అన్న విషయాన్ని మదుపర్లు గుర్తుపెట్టుకోవాలి. ఇప్పట్లో ఆ వ్యాపారం ముగిసిపోదు. అందుకే.. దీర్ఘకాలం కోసం ఎల్ఐసీలో పెట్టుబడులు పెట్టవచ్చు. లిస్టింగ్ డే రోజు.. నష్టాలు వచ్చినా.. మదుపర్లు భయపడకుండా.. దీర్ఘకాలం కోసం స్టాక్ను విక్రయించకుండా ఉంటే మంచిది," అని అగర్వాల్ తెలిపారు.
మరోవైపు.. లిస్టింగ్ డే రోజు నష్టాలు వస్తే.. మరిన్ని షేర్లు కొనుగోలు చేసుకునేందుకు అవకాశం లభిస్తుందని మెహ్తా ఈక్విటీస్ వైస్ ప్రెసిడెంట్ తాప్సె అభిప్రాయపడ్డారు. అందువల్ల మదుపర్లు భయపడకూడదని సూచించారు.
ఎల్ఐసీ ఐపీఓ వివరాలు..
- LIC IPO details | ఐపీఓ సైజు:- రూ. 21వేల కోట్లు (దేశంలోనే అతిపెద్ద ఐపీఓ)
- ఐపీఓ డేట్:- మే 4- మే 9
- ఐపీఓ ప్రైజ్:- రూ. 902- రూ. 949/షేరు. కచ్చితంగా షేర్లు అలాట్ అవ్వాలంటే.. అప్పర్ బ్యాండ్(రూ. 949)తో బిడ్లు వేయడం ఉత్తమం.
- అప్లికేషన్ లిమిట్:- ఒక వ్యక్తి.. 14 ఐపీఓ బిడ్లను అప్లై చేసుకోవచ్చు.
- పాలసీదారులకు డిస్కౌంట్:- షేరు మీద రూ. 60
- ఎల్ఐసీ ఉద్యోగులకు డిస్కౌంట్:- షేరు మీద రూ. 45
- అలాట్మెంట్ డేట్:- మే 12
ఎల్ఐసీ ఐపీఓ సబ్స్క్రిప్షన్
LIC IPO subscription | ఎల్ఐసీ ఐపీఓ సబ్స్క్రిప్షన్ దాదాపు ముగింపునకు చేరింది. కొన్ని గంటల తర్వాత ఐపీఓను సబ్స్క్రైబ్ చేసుకోలేరు. ప్రస్తుత ఐపీఓ సబ్స్క్సిప్షన్ వివరాలను తెలుసుకుందాము.
- క్యూఐబీ:- 2.22X
- ఎన్ఐఐ:- 2.12X
- రిటైల్:- 1.85X
- ఉద్యోగులు:- 5.73X
- పాలసీదారులు:- 2.55X
(గమనిక ఇది కేవలం సమాచారం కోసం రూపొందించిన కథనం మాత్రమే. హిందుస్థాన్ టైమ్స్ తెలుగుకు ఎలాంటి సంబంధం లేదు. స్టాక్ మార్కెట్ వ్యవహారాల్లో ఏదైనా నిర్ణయం తీసుకునేందుకు మీ ఫైనాన్షియల్ ఎడ్వైజర్లను సంప్రదించడం శ్రేయస్కరం.)
సంబంధిత కథనం
టాపిక్