Congress manifesto: ఉచిత విద్యుత్, 6 వేల పెన్షన్ సహా మేనిఫెస్టోలో 7 హామీలు ఇచ్చిన కాంగ్రెస్

Congress manifesto: హర్యానా అసెంబ్లీ ఎన్నికల కోసం కాంగ్రెస్ పార్టీ బుధవారం తన మేనిఫెస్టోను ఆవిష్కరించింది. అందులో ప్రధానంగా ఏడు హామీలను కాంగ్రెస్ ఇచ్చింది. వాటిలో రూ .500 కు నెలవారీ గ్యాస్ సిలిండర్, 300 యూనిట్ల వరకు ఉచిత విద్యుత్, వృద్ధులు, వితంతు మహిళలు, వికలాంగులకు రూ.6 వేల పెన్షన్ మొదలైనవి ఉన్నాయి. కాంగ్రెస్ అధ్యక్షుడు మల్లిఖార్జున ఖర్గే, హర్యానా కాంగ్రెస్ చీఫ్ ఉదయ్ భాన్, మాజీ ముఖ్యమంత్రి భూపిందర్ సింగ్ హుడా ఈ మేనిఫెస్టో (manifesto) విడుదల కార్యక్రమంలో పాల్గొన్నారు.

కాంగ్రెస్ పార్టీ 7 హామీలు

1. కుటుంబ సంక్షేమం

• నెలకు 300 యూనిట్ల ఉచిత విద్యుత్
• చిరంజీవి పథకం తరహాలో రూ.25 లక్షల వరకు ఉచిత వైద్యం

2. మహిళా సాధికారత

• 18 ఏళ్లు నిండిన మహిళలకు నెలకు రూ.2 వేలు
• గ్యాస్ సిలిండర్లకు నెలకు రూ.500

3. యువతకు భవిత

• ఖాళీగా ఉన్న 2 లక్షల పోస్టుల భర్తీ
• మాదకద్రవ్యాల రహిత హర్యానా

4. సామాజిక భద్రత

• రూ.6,000 వృద్ధాప్య పింఛన్
• రూ.6,000 వికలాంగుల పెన్షన్
• రూ.6,000 వితంతు పెన్షన్
• పాత పెన్షన్ పథకం పునరుద్ధరణ

5. వెనుకబడిన తరగతుల హక్కులు

• కుల గణన నిర్వహించడం
• క్రీమీ లేయర్ పరిమితిని రూ.10 లక్షలకు పెంచడం

6. రైతుకు భరోసా

• కనీస మద్దతు ధరకు చట్టబద్దమైన హామీ
• తక్షణ పంట నష్టపరిహారం

7. పేదలకు ఇళ్లు

• పేదలకు 100 గజాల ప్లాట్లు
• స్థలం ఉన్న పేదలకు ఇల్లు నిర్మించుకోవడానికి రూ. 3.5 లక్షల నగదు సహాయం

హరియాణా నంబర్ వన్

2014 లో తలసరి ఆదాయం, ఉద్యోగాలు, శాంతిభద్రతలు, క్రీడల్లో పెద్ద రాష్ట్రాల్లో హరియాణా నంబర్ వన్ గా నిలిచిందని కాంగ్రెస్ (congress) నేత భూపిందర్ హుడా అన్నారు. గత పదేళ్ల బీజేపీ, జేజేపీల పాలనలో పరిస్థితి తారుమారైంది. రెజ్లర్లు ఇప్పటికీ న్యాయం కోసం ఎదురు చూస్తున్నారు. మల్లిఖార్జున ఖర్గే (mallikarjun kharge), రాహుల్ గాంధీ నాయకత్వంలో ప్రభుత్వాన్ని ఏర్పాటు చేసి హర్యానాను మళ్లీ నంబర్ వన్ గా మారుస్తామని హామీ ఇస్తున్నానన్నారు. 90 స్థానాలున్న హర్యానా అసెంబ్లీకి అక్టోబర్ 5న పోలింగ్ జరగనుంది. అక్టోబర్ 8న ఫలితాలను ప్రకటిస్తారు.