Chhattisgarh encounter: మావోయిస్టులకు మరో భారీ ఎదురు దెబ్బ; వేర్వేరు ఎన్ కౌంటర్లలో 22 మంది మావోల మృతి

Chhattisgarh encounter: ఛత్తీస్ గఢ్ లోని బీజాపూర్ జిల్లాలో గురువారం ఉదయం జరిగిన ఎన్ కౌంటర్ లో 18 మంది మావోయిస్టులు, ఒక జిల్లా రిజర్వ్ గార్డ్ (DRG) జవాను మృతి చెందారు. కాంకేర్ జిల్లాలో జరిగిన వేర్వేరు ఎన్ కౌంటర్ లలో మరో నలుగురు మావోయిస్టులు చనిపోయారు.

వేర్వేరు ఎన్ కౌంటర్లలో..

‘‘బీజాపూర్, దంతెవాడ జిల్లాల సరిహద్దులోని అడవిలో ఉదయం 7 గంటలకు ఎదురుకాల్పులు జరిగాయి. గంగలూరు పోలీస్ స్టేషన్ ఏరియా (బీజాపూర్) పరిధిలో భద్రతా సిబ్బంది సంయుక్త బృందం నక్సలైట్ వ్యతిరేక ఆపరేషన్ నిర్వహిస్తోంది’’ అని పోలీసులు విడుదల చేసిన ఒక ప్రకటనలో తెలిపారు. ఎన్ కౌంటర్ అనంతరం, 18 మంది మావోయిస్టుల మృతదేహాలతో పాటు తుపాకులు, పేలుడు పదార్థాలను స్వాధీనం చేసుకున్నట్లు ఆ ప్రకటనలో పేర్కొన్నారు. గాలింపు కొనసాగుతోందని, మరిన్ని వివరాలు తెలియాల్సి ఉందని పోలీసులు తెలిపారు. మరోవైపు, కాంకేర్-నారాయణపూర్ సరిహద్దు ప్రాంతంలో రెండో ఎన్ కౌంటర్ కొనసాగుతోంది. ఇప్పటి వరకు నాలుగు మృతదేహాలను, ఒక ఆటోమేటిక్ రైఫిల్ ను స్వాధీనం చేసుకున్నామని కంకేర్ పోలీసు సూపరింటెండెంట్ (ఎస్పీ) ఇందిరా కల్యాణ్ ఎలెసెలా తెలిపారు.

మార్చి 9 తరువాత..

మార్చి 9న బీజాపూర్ లో పోలీసులతో ఎదురుకాల్పుల్లో 11 మంది మహిళలు సహా 31 మంది మావోయిస్టులు చనిపోయారు. నిషేధిత సిపిఐ (మావోయిస్టు) డివిజనల్ కమిటీ సభ్యుడు (డివిసిఎం) సహా 31 మంది మావోయిస్టులలో ఐదుగురిని ఛత్తీస్ గఢ్ పోలీసులు గుర్తించారు. ఎన్కౌంటర్ జరిగిన ప్రదేశం నుంచి స్వాధీనం చేసుకున్న ఆయుధాల్లో ఒక ఏకే-47 రైఫిల్, ఒక ఎస్ఎల్ఆర్ రైఫిల్, ఒక ఇన్సాస్ రైఫిల్, ఒక .303 రైఫిల్, ఒక .315 బోర్ రైఫిల్, స్టాండ్ ఉన్న ఒక బీజీఎల్ రాకెట్ లాంచర్ (పెద్దది), ఆరు బీజీఎల్ లాంచర్లు, లేజర్ ప్రింటర్లు ఉన్నాయి.

ఈ ఏడాది 81 మంది..

ఛత్తీస్ గఢ్ లో ఈ ఏడాది ఇప్పటి వరకు జరిగిన వేర్వేరు ఎన్ కౌంటర్లలో 81 మంది మావోయిస్టులు చనిపోయారు. ఈ 81 మందిలో 65 మంది బీజాపూర్ సహా ఏడు జిల్లాలతో కూడిన బస్తర్ డివిజన్ లో జరిగిన ఎదురుకాల్పుల్లో మృతి చెందారు.