ఇద్దరు ఉగ్రవాదులు హతం.. పాకిస్థాన్ ‘మిషన్ అమర్నాథ్ యాత్ర’ ఫెయిల్!
సోమవారం అర్ధరాత్రి జమ్ముకశ్మీర్లో ఎన్కౌంటర్ జరిగింది. ఇద్దరు ఉగ్రవాదులను భద్రతా బలగాలు మట్టుబెట్టాయి. అమర్నాథ్ యాత్రలో విధ్వంసం సృష్టించడమే లక్ష్యంగా వీరు ప్రణాళికలు రచించినట్టు సమాచారం.
అమర్నాథ్ యాత్రలో అలజడులు సృష్టించడమే లక్ష్యంగా దేశంలోకి చొరబడిన ఇద్దరు పాక్ ఆధారిత లష్కరే తోయిబా ఉగ్రవాదులను భద్రతా దళాలు మట్టుబెట్టాయి. జమ్ముకశ్మీర్ శ్రీనగర్లోని బేమినా ప్రాంతంలో సోమవారం అర్ధరాత్రి ఈ ఘటన జరిగింది. కాగా.. ఈ ఎన్కౌంటర్లో ఓ పోలీసుకు స్వల్ప గాయాలయ్యాయి.
ట్రెండింగ్ వార్తలు
టార్గెట్ అమర్నాథ్ యాత్ర..!
జూన్ 30న అమర్నాథ్ యాత్ర ప్రారంభంకానుంది. యాత్రలో విధ్వంసం సృష్టించాలని పాక్ ఉగ్రసంస్థలు ప్రణాళికలు రచిస్తున్నట్టు నిఘా వర్గాలు హెచ్చరించాయి. ఈ క్రమంలోనే పటిష్ఠ భద్రతను చేపట్టిన సైన్యం.. తాజా ఎన్కౌంటర్లో ఇద్దరు ముష్కరులను ఎలిమినేట్ చేసింది.
"అనంతనాగ్కు చెందిన అదిల్ హుస్సెన్.. 2018లో సరిహద్దును దాటి పాకిస్థాన్కు వెళ్లాడు. అక్కడ ఉగ్రవాదంలో శిక్షణ పొందాడు. అతడితో పాటు మరో ఇద్దరిని లష్కరే తోయిబా.. జమ్ముకశ్మీర్లోకి పంపించింది. ఎన్కౌంటర్లో ఇద్దరు హతమయ్యారు. అదిల్ ఇప్పటికే మరణించాడు," అని కశ్మీర్ జోన్ పోలీస్ ట్వీట్ చేసింది.
ఇదొక భారీ విజయం అని కశ్మీర్ ఐజీ విజయ్ కుమార్ అభిప్రాయపడ్డారు. మృతుల నుంచి డాక్యుమెంట్లు, ఆయుధాలు స్వాధీనం చేసుకున్నట్టు వివరించారు. మరణించిన ఇద్దరిలో ఒకరు పాకిస్థాన్లోని ఫైసలాబాద్కు చెందిన వ్యక్తి అని పేర్కొన్నారు.
ఎన్కౌంటర్ అనంతరం రెండు ఏకే-47 రైఫిళ్లు, 10 మ్యాగజైన్లు, వై ఎస్ఎంఎస్ డివైజ్తో పాటు మరికొన్ని వస్తువులను భద్రతా బలగాలు స్వాధీనం చేసుకున్నాయి.
సంబంధిత కథనం